വില ഇടിവിന് വിരാമം; ടൊറന്റോയിൽ വീടുവിൽപ്പനയിൽ വലിയ ഉയർച്ച

MAY 6, 2026, 9:39 PM

ടൊറന്റോ: ഗ്രേറ്റർ ടൊറന്റോ ഏരിയയിലെ വീടുവിൽപ്പന ഏപ്രിലിൽ കഴിഞ്ഞ ഒമ്പത് മാസത്തിനിടയിലെ ഏറ്റവും വലിയ വർധന രേഖപ്പെടുത്തിയതായി റിപ്പോർട്ട്. വീടുകളുടെ വില സ്ഥിരത കൈവരിച്ചതും കൂടുതൽ ആളുകൾക്ക് വീട് വാങ്ങാൻ സാധിക്കുന്ന സാഹചര്യം രൂപപ്പെട്ടതുമാണ് വിപണിക്ക് ഉണർവ് നൽകിയതെന്ന് ടൊറന്റോ റീജിയണൽ റിയൽ എസ്റ്റേറ്റ് ബോർഡിന്റെ കണക്കുകൾ വ്യക്തമാക്കുന്നു.

മാർച്ചിനെ അപേക്ഷിച്ച് സീസണൽ ക്രമീകരണത്തിന് ശേഷം വീടുവിൽപ്പന 6.1 ശതമാനം ഉയർന്ന് 4,829 യൂണിറ്റായി. തുടർച്ചയായ രണ്ടാം മാസമാണ് വിൽപ്പനയിൽ വർധനയുണ്ടാകുന്നത്. കഴിഞ്ഞ വർഷം ജൂലൈയ്ക്ക് ശേഷമുള്ള ഏറ്റവും വലിയ ഉയർച്ചയാണിത്.

അതേസമയം, ഹോം പ്രൈസ് ഇൻഡക്സ് മാസാന്തര അടിസ്ഥാനത്തിൽ വലിയ മാറ്റമില്ലാതെ 9,29,300 കാനേഡിയൻ ഡോളറിലായിരുന്നു. ഇതോടെ തുടർച്ചയായി പത്ത് മാസമായി തുടരുന്ന വില ഇടിവിന് വിരാമമായി.

ഗ്രേറ്റർ ടൊറന്റോ ഏരിയയിൽ കാനഡയിലെ ഏറ്റവും വലിയ നഗരമായ ടൊറന്റോയും സമീപമുള്ള നാല് പ്രാദേശിക മുനിസിപ്പാലിറ്റികളും ഉൾപ്പെടുന്നു.

“ഈ വസന്തകാലത്ത് വീടുവാങ്ങൽ പ്രവർത്തനങ്ങളിൽ വർധനവ് കാണുന്നുണ്ട്. വീടുകളുടെ വില കുറഞ്ഞതിനെ തുടർന്ന് കൂടുതൽ അനുകൂലമായ സാഹചര്യങ്ങൾ ഉണ്ടായതുകൊണ്ടാണ് പലരും വീടുകൾ വാങ്ങാൻ മുന്നോട്ടുവന്നത്” എന്ന് ടൊറന്റോ റീജിയണൽ റിയൽ എസ്റ്റേറ്റ് ബോർഡ് പ്രസിഡന്റ് ഡാനിയൽ സ്റ്റെയിൻഫെൽഡ് പറഞ്ഞു.

കഴിഞ്ഞ വർഷത്തോടു താരതമ്യം ചെയ്യുമ്പോൾ വീടുവിൽപ്പന 7 ശതമാനം ഉയർന്നു. അതേസമയം പുതിയ ലിസ്റ്റിംഗുകൾ 9.3 ശതമാനം കുറഞ്ഞു. ഹോം പ്രൈസ് ഇൻഡക്സ് വാർഷിക അടിസ്ഥാനത്തിൽ ഇപ്പോഴും 6.6 ശതമാനം താഴെയാണ്. ഒരു അമേരിക്കൻ ഡോളറിന് ഏകദേശം 1.36 കാനേഡിയൻ ഡോളർ എന്ന നിരക്കിലാണ് നിലവിലെ വിനിമയമൂല്യം.