കാനഡയിൽ വർദ്ധിച്ചുവരുന്ന പലചരക്ക് (Grocery) സാധനങ്ങളുടെ വിലക്കയറ്റം തടയുന്നതിനും ആഭ്യന്തര ഭക്ഷ്യ ഉത്പാദനം വർദ്ധിപ്പിക്കുന്നതിനുമായി 3.2 ബില്യൺ (320 കോടി) ഡോളറിന്റെ വൻകിട ദേശീയ ഭക്ഷ്യ സുരക്ഷാ തന്ത്രം (National Food Security Strategy) പ്രഖ്യാപിച്ച് കനേഡിയൻ പ്രധാനമന്ത്രി മാർക്ക് കാർണി. “കൂടുതൽ തിരഞ്ഞെടുപ്പുകൾ, കൂടുതൽ നിയന്ത്രണം, കൂടുതൽ കാനഡ” (More Choice. More Control. More Canada) എന്ന പേരിൽ പത്ത് വർഷത്തെ കാലയളവിലേക്ക് വിഭാവനം ചെയ്തിരിക്കുന്ന ഈ സമഗ്ര പദ്ധതി ടൊറന്റോയിലെ ഒന്റാറിയോ ഫുഡ് ടെർമിനലിൽ വെച്ചാണ് പ്രധാനമന്ത്രി ഔദ്യോഗികമായി പ്രഖ്യാപിച്ചത്.

വിദേശ ഇറക്കുമതികളെ അമിതമായി ആശ്രയിക്കുന്നത് കുറയ്ക്കാനും നിലവിൽ കാനഡയിലെ ഭക്ഷ്യ വിപണിയുടെ 75 ശതമാനവും നിയന്ത്രിക്കുന്ന അഞ്ച് വൻകിട റീട്ടെയിൽ ശൃംഖലകളുടെ കുത്തക അവസാനിപ്പിക്കാനും ഈ തന്ത്രത്തിലൂടെ ലക്ഷ്യമിടുന്നു. ഇതിന്റെ പ്രധാന ഭാഗമായി 1 ബില്യൺ ഡോളർ ചിലവഴിച്ചുകൊണ്ട് 'ഫുഡ്-ലിങ്ക് ഫണ്ട്' (Food-Link Fund) രൂപീകരിക്കും. ഇത് വഴി ഒന്റാറിയോ ഫുഡ് ടെർമിനൽ വികസിപ്പിക്കുകയും രാജ്യത്തുടനീളം പുതിയ പ്രാദേശിക 'ഫുഡ് ഹബ്ബുകൾ' സ്ഥാപിക്കുകയും ചെയ്യും. ഈ ഹബ്ബുകൾ വഴി ചെറുകിട കച്ചവടക്കാർക്കും പ്രാദേശിക കർഷകർക്കും വൻകിട കമ്പനികളെ ആശ്രയിക്കാതെ തന്നെ ഉത്പന്നങ്ങൾ മത്സരാധിഷ്ഠിത വിലയ്ക്ക് വിപണിയിലെത്തിക്കാൻ സാധിക്കും.

ഇതിന് പുറമെ, വിപണിയിലെ ആരോഗ്യകരമായ മത്സരം ഉറപ്പാക്കാനും നിയമവിരുദ്ധമായ വിലക്കയറ്റങ്ങൾ തടയാനും കാനഡയിലെ കോമ്പറ്റീഷൻ ബ്യൂറോയ്ക്ക് 130 മില്യൺ ഡോളർ അധികമായി അനുവദിക്കും. രാജ്യത്തെ ഹരിതഗൃഹ കൃഷിയും (Greenhouses) ഹൈഡ്രോപോണിക്‌സ് സംവിധാനങ്ങളും ആധുനികവത്കരിക്കാൻ 750 മില്യൺ ഡോളറും, കാനഡയ്ക്കുള്ളിൽ തന്നെ ഭക്ഷ്യസംസ്‌കരണ ശേഷി വർദ്ധിപ്പിക്കുന്നതിനായി പ്രത്യേക അഗ്രി-ഫുഡ് പ്രൊജക്റ്റ് ഫൈനാൻസ് ഫണ്ടിലേക്ക് 1 ബില്യൺ ഡോളറും മാറ്റിവെച്ചിട്ടുണ്ട്. വിപണിയിലെ ഈ വലിയ മാറ്റങ്ങളിലൂടെ നിലവിൽ ലഭ്യമാകുന്ന ആഭ്യന്തര ഭക്ഷ്യവിഹിതം 75 ശതമാനത്തിൽ നിന്നും 2032-ഓടെ 85 ശതമാനമായി ഉയർത്താനാണ് കാനഡ ലക്ഷ്യമിടുന്നത്.

സ്വന്തമായി ഭക്ഷണം ഉത്പാദിപ്പിക്കാൻ കഴിയാത്ത ഒരു രാജ്യം യഥാർത്ഥത്തിൽ പരമാധികാരമുള്ള രാജ്യമല്ലെന്നും ആഗോള പ്രതിസന്ധികൾക്ക് മുന്നിൽ അവർ എളുപ്പത്തിൽ തകരുമെന്നും പ്രധാനമന്ത്രി മാർക്ക് കാർണി ഓർമ്മിപ്പിച്ചു. വിത്ത്, വളം, മൃഗസംരക്ഷണ മരുന്നുകൾ എന്നിവയുടെ അനുമതികൾ വേഗത്തിലാക്കാൻ ഫുഡ് ഇൻസ്പെക്ഷൻ നിയമങ്ങളിൽ ഭേദഗതി വരുത്തുമെന്നും, കൃഷിസ്ഥലങ്ങൾ അടുത്ത തലമുറയ്ക്ക് കൈമാറുന്ന യുവകർഷകർക്ക് വായ്പകളിലും നികുതികളിലും വലിയ ഇളവുകൾ നൽകുമെന്നും ഈ പുതിയ തന്ത്രത്തിൽ വ്യക്തമാക്കിയിട്ടുണ്ട്.

English Summary:

Canadian Prime Minister Mark Carney has unveiled a $3.2-billion National Food Security Strategy titled "More Choice. More Control. More Canada," aimed at lowering grocery bills, boosting domestic food production, and breaking the monopoly of major retail chains over a ten-year period.

Tags:

Malayalam News, News Malayalam, Latest Malayalam News, Vachakam News, World News, Canada Food Security Strategy, Canada Grocery Price Cut Malayalam

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്