ബാങ്ക് ഓഫ് കാനഡ പലിശനിരക്ക് 2.25%ൽ നിലനിർത്താൻ സാധ്യതയെന്ന് വിദഗ്ധർ

APRIL 27, 2026, 6:25 AM

ഒട്ടാവ: ബാങ്ക് ഓഫ് കാനഡ ഈ ബുധനാഴ്ച തങ്ങളുടെ പ്രധാന പലിശനിരക്ക് 2.25 ശതമാനത്തിൽ തന്നെ നിലനിർത്താൻ സാധ്യതയുണ്ടെന്ന് സാമ്പത്തിക വിദഗ്ധർ പറയുന്നു. ഇറാൻ യുദ്ധത്തെ തുടർന്ന് എണ്ണവില ഉയർന്നതിന്റെ ആഘാതം താൽക്കാലികമായിരിക്കുമെന്നും, അത് ദീർഘകാല പണപ്പെരുപ്പത്തിൽ വലിയ സ്വാധീനം ചെലുത്തില്ലെന്നുമാണ് വിലയിരുത്തൽ.

ഇറാൻ യുദ്ധത്തെ തുടർന്ന് പെട്രോൾ വില ഉയർന്നത് ഏപ്രിൽ മാസത്തിലെ പണപ്പെരുപ്പം വർധിപ്പിക്കാമെങ്കിലും, ഈ വർധനവ് ദീർഘകാലം തുടരില്ലെന്നാണ് സാമ്പത്തിക വിദഗ്ധരുടെ അഭിപ്രായം. സ്ഥിരമായ വിലക്കയറ്റ സമ്മർദ്ദം ഉണ്ടാകുമ്പോഴാണ് കേന്ദ്രബാങ്കുകൾ സാധാരണയായി പലിശനിരക്കിൽ മാറ്റം വരുത്തുന്നത്.

മാർച്ചിൽ കാനഡയുടെ വാർഷിക പണപ്പെരുപ്പ നിരക്ക് 2.4 ശതമാനമായി ഉയർന്നു. ക്രൂഡ് ഓയിൽ വില വർധിച്ചതാണ് പെട്രോൾ വില ഉയരാൻ കാരണമായത്. എന്നാൽ ഇത് ഇപ്പോഴും ബാങ്ക് ഓഫ് കാനഡയുടെ 1% മുതൽ 3% വരെയുള്ള ലക്ഷ്യപരിധിക്കുള്ളിലാണ്.

ഇതിനിടെ, അമേരിക്കൻ ടാരിഫ് ആശങ്കകൾക്കിടയിലും മാന്ദ്യത്തിൽ നിന്ന് രക്ഷപ്പെട്ടെങ്കിലും കാനഡയുടെ സമ്പദ്‌വ്യവസ്ഥ ദുർബലമായ നിലയിലാണ്. ബാങ്ക് ഗവർണർ ടിഫ് മാക്ലം നേരത്തെ പറഞ്ഞത്, യുദ്ധത്തെ തുടർന്ന് ഉണ്ടായ താൽക്കാലിക പണപ്പെരുപ്പ ആശങ്കകളെ കുറിച്ച് ആശങ്കയില്ലെന്നാണ്.

ഇന്ധനവില ഉയർച്ച മൂലമുള്ള പണപ്പെരുപ്പം ദീർഘകാലം തുടരുകയാണെങ്കിൽ മാത്രമേ പലിശനിരക്കിൽ മാറ്റം വരുത്തേണ്ട സാഹചര്യം ഉണ്ടാകൂ എന്നാണ് സാമ്പത്തിക വിദഗ്ധർ പറയുന്നത്. നിലവിൽ പണപ്പെരുപ്പ പ്രതീക്ഷകൾ ഉപഭോക്താക്കളിലും ബിസിനസുകളിലും സ്ഥിരമായി രൂപപ്പെടുന്ന ലക്ഷണങ്ങൾ കാണുന്നില്ല. മാർക്കറ്റുകളും പലിശനിരക്ക് ഇപ്പോൾ മാറ്റമില്ലാതെ തുടരുമെന്നാണ് പ്രതീക്ഷിക്കുന്നത്.

എന്നാൽ വർഷാവസാനത്തോടെ നിരക്ക് ഉയരാൻ സാധ്യതയുണ്ടെന്ന് അവർ കണക്കാക്കുന്നു. റോയിറ്റേഴ്സ് സർവേ പ്രകാരം, ഭൂരിഭാഗം സാമ്പത്തിക വിദഗ്ധരും ഈ വർഷം മുഴുവൻ പലിശനിരക്കിൽ മാറ്റമുണ്ടാകില്ലെന്നാണ് കരുതുന്നത്.

ഏപ്രിൽ 29ന് ബാങ്ക് ഓഫ് കാനഡ നാണയനയം പ്രഖ്യാപിക്കും. അതോടൊപ്പം സമ്പദ്‌വ്യവസ്ഥയെയും പണപ്പെരുപ്പത്തെയും കുറിച്ചുള്ള പ്രവചനങ്ങൾ ഉൾക്കൊള്ളുന്ന റിപ്പോർട്ടും പുറത്തുവിടും. ജിഡിപിയും പണപ്പെരുപ്പവും സംബന്ധിച്ച പ്രവചനങ്ങൾ ബാങ്ക് ഉയർത്താൻ സാധ്യതയുണ്ട്. എന്നാൽ എണ്ണവിലാഘാതം നേരിടാൻ ബാങ്കിന് പരിമിതമായ ഉപാധികളേയുള്ളൂ.ധനകാര്യ നയങ്ങളാണ് കൂടുതൽ പ്രധാനമാകുക എന്നും വിദഗ്ധർ പറയുന്നു.

ശമ്പള വർധനവ് 2 ശതമാന ലക്ഷ്യത്തിന് അനുസൃതമായി നിലനിർത്തുന്നതിലാണ് ബാങ്കിന്റെ ശ്രദ്ധ. കാരണം, ദീർഘകാല പണപ്പെരുപ്പ പ്രതീക്ഷകളെ ഇത് ബാധിക്കും. ഈ നാണയനയ പ്രഖ്യാപനത്തിന് ഒരു ദിവസം മുമ്പ് ധനകാര്യ മന്ത്രി ഫ്രാൻസ്വാ-ഫിലിപ്പ് ഷാംപെയിൻ മധ്യകാല സാമ്പത്തിക അവലോകനം അവതരിപ്പിക്കും.