വംശീയത ആരോപണം; മോൺട്രിയൽ പോലീസിൽ മാറ്റത്തിന് മാറ്റത്തിന് വർഷങ്ങൾ വേണ്ടിവരുമെന്ന് മേധാവി

AUGUST 13, 2026, 12:12 AM

മോൺട്രിയൽ: വംശീയത, വിവേചനം, പീഡനം എന്നിവയുമായി ബന്ധപ്പെട്ട ഗുരുതര ആരോപണങ്ങൾ ഉയർന്ന സാഹചര്യത്തിൽ മോൺട്രിയൽ പോലീസ് സേനയിൽ മാറ്റം കൊണ്ടുവരാനും സമൂഹത്തിന്റെ വിശ്വാസം വീണ്ടെടുക്കാനും ഏഴ് മുതൽ പത്ത് വർഷം വരെ വേണ്ടിവന്നേക്കുമെന്ന് പോലീസ് മേധാവി ഫാദി ദാഗർ പറഞ്ഞു.

ചൊവ്വാഴ്ച മോൺട്രിയൽ സിറ്റി ഹാളിൽ നടന്ന പ്രത്യേക യോഗത്തിൽ ആദ്യമായി പൊതുജനങ്ങളുടെ ചോദ്യങ്ങൾക്ക് ദാഗർ മറുപടി നൽകി. ഒരു ദശാബ്ദത്തിലേറെയായി മോൺട്രിയൽ നോർത്ത് മേഖലയിലെ താമസക്കാർ പോലീസിനെതിരെ വംശീയതയും വിവേചനവും ആരോപിച്ച് പ്രതിഷേധിച്ചിരുന്നു.

ജൂണിൽ ചില പോലീസുകാർ വംശീയവും അധിക്ഷേപപരവുമായ പെരുമാറ്റം നടത്തിയെന്ന ആരോപണത്തെ തുടർന്ന് മോൺട്രിയൽ നോർത്തിലെ 16 അംഗ പട്രോൾ യൂണിറ്റ് ദാഗർ പിരിച്ചുവിട്ടിരുന്നു. വംശീയ ന്യൂനപക്ഷ വിഭാഗങ്ങളിൽപ്പെട്ട ചിലരുടെ മുടി പോലീസുകാർ മുറിച്ച് ട്രോഫിയായി സൂക്ഷിച്ചെന്ന ആരോപണവും ഉയർന്നിരുന്നു. സംഭവത്തിൽ രണ്ട് പോലീസുകാരെ സസ്പെൻഡ് ചെയ്തു. മറ്റൊരു കേസിൽ മൂന്നാമതൊരാളെയും സസ്പെൻഡ് ചെയ്തിട്ടുണ്ട്.

സംഭവത്തിന്റെ ഗൗരവം തന്നെ ഞെട്ടിച്ചെന്നും 2026ൽ ഇത്തരമൊരു പെരുമാറ്റം സേനയിൽ ഉണ്ടാകുമെന്ന് പ്രതീക്ഷിച്ചിരുന്നില്ലെന്നും ദാഗർ പറഞ്ഞു.

പോലീസും മോൺട്രിയൽ നോർത്തിലെ വിവിധ സമൂഹങ്ങളും തമ്മിലുള്ള വിശ്വാസക്കുറവ് വർഷങ്ങളായി തുടരുന്നതാണെന്ന് യോഗത്തിൽ പങ്കെടുത്തവർ ചൂണ്ടിക്കാട്ടി. പ്രശ്നപരിഹാരത്തിന് പോലീസിനൊപ്പം നഗര ഭരണകൂടവും രാഷ്ട്രീയ നേതൃത്വവും ഇടപെടണമെന്നും ആവശ്യപ്പെട്ടു.

പോലീസ് സേനയിൽ നിരോധിച്ചിട്ടുള്ള കാരണമില്ലാത്ത തെരുവ് പരിശോധനകൾ ചില ഉദ്യോഗസ്ഥർ ഇപ്പോഴും നടത്തുന്നതായും ദാഗർ സമ്മതിച്ചു. ഇത്തരം രീതികൾ പൂർണമായി ഇല്ലാതാക്കാൻ സമയമെടുക്കുമെന്നും അദ്ദേഹം പറഞ്ഞു.

വംശീയതയും വിവേചനവും സേനയിൽ നിലനിൽക്കുന്നുണ്ടെന്ന് നേരത്തെ തന്നെ അംഗീകരിച്ചിരുന്നുവെന്നും, എന്നാൽ ആരോപണങ്ങളുടെ ഗൗരവം ഞെട്ടിച്ചെന്നും ദാഗർ വ്യക്തമാക്കി.

സംഭവവുമായി ബന്ധപ്പെട്ട ആഭ്യന്തര അന്വേഷണം തുടരുകയാണ്. മൂന്ന് പോലീസുകാരുമായി ബന്ധപ്പെട്ട രണ്ട് കേസുകൾ ക്യൂബെക്കിലെ പ്രോസിക്യൂഷൻ സർവീസിന് കൈമാറിയതായും ദാഗർ അറിയിച്ചു.