മതം, ഒപ്പം അതിൽ ചേരുന്നു ദാനധർമ്മം. ഒപ്പമൊരു ആൾദൈവവും. കേരളത്തിലെ പുതുകാല തട്ടിപ്പുകളിൽ ഈ ചേരുവയ്ക്ക് കയ്‌പേറെയാണ്. കേരളം ദാനധർമ്മത്തിൽ സമ്പന്നമായ ഒരു സമൂഹമാണ്. വർഷങ്ങളായി ഹിന്ദു, ക്രൈസ്തവ, മുസ്ലിം ധാരകളിലെ സ്ഥാപനങ്ങൾ വിദ്യാഭ്യാസം, ആരോഗ്യരംഗം, സേവനപ്രവർത്തനങ്ങൾ എന്നിവയിൽ വലിയ പങ്കുവഹിച്ചിട്ടുമുണ്ട്. പക്ഷേ അതിനൊപ്പം, അടുത്തിടെ മതത്തിന്റെ പേരിൽ നടക്കുന്ന ചില സംശയാസ്പദമായ ചാരിറ്റി ശേഖരണങ്ങളും സാമ്പത്തിക ക്രമക്കേടുകളും ജനങ്ങളുടെ ശ്രദ്ധ പിടിച്ചുപറ്റുന്നതാണ്.

ഇതിൽ ഏറ്റവും ആശങ്കാജനകമായത് 'ആൾ ദൈവങ്ങൾ' എന്നുവിളിക്കപ്പെടുന്ന  തങ്ങളെത്തന്നെ ആത്മീയ നേതാക്കളായി അവതരിപ്പിച്ച്, എന്നാൽ യഥാർത്ഥത്തിൽ ദാനധർമ്മത്തെ സ്വകാര്യ ലാഭത്തിനായി ഉപയോഗിക്കുന്ന ചില വ്യക്തികളുടെ ഉയർച്ചയാണ്. ഈ സ്വയം പ്രഖ്യാപിത ദൈവങ്ങൾ സമൂഹത്തെ മലീമസമാക്കുകയും വ്യക്തികളെ ഭക്തിയുടെ പേരിൽ ചൂഷണം ചെയ്യുകയുമാണ്.

എല്ലാ മതസമൂഹങ്ങളും ഈ പ്രശ്‌നത്തിൽ നിന്ന് വിട്ടുനിൽക്കുന്നില്ല എന്നതാണ് ശ്രദ്ധേയം.. ചില ക്ഷേത്രചടങ്ങുകളിൽ പരിഹാര ക്രിയ, ഭാഗ്യ കടാഷം തുടങ്ങിയ പേരിൽ നടക്കുന്ന അനാവശ്യ പിരിവുകൾ, ചില ക്രൈസ്തവ കൂട്ടായ്മകളിൽ 'ആശീർവാദം', 'മിഷൻ', 'പ്രാർത്ഥനാ സഹായം' എന്നീ പേരുകളിൽ സുതാര്യതയില്ലാത്ത സംഭാവന ശേഖരണം, മുസ്ലിം സമൂഹത്തിൽ 'സകാത്ത്' അല്ലെങ്കിൽ 'മസ്ജിദ് സഹായം' എന്നീ പേരുകളിൽ കണക്കില്ലാത്ത ധനശേഖരണം- ഇതെല്ലാം ഒരു പൊതുവായ സാമൂഹിക പ്രശ്‌നത്തിന്റെ വ്യത്യസ്ത രൂപങ്ങൾ മാത്രമാണ്. ഇതിനൊരു അറുതി വന്നേ മതിയാകു.

ഇവിടെ മതത്തിന്റെ കുറ്റമല്ല സംഭവിക്കുന്നത്. മതത്തിന്റെ വിശ്വാസം ഉപയോഗിക്കുന്ന ഈ 'ആൾ ദൈവങ്ങൾ' ആണ് യഥാർത്ഥ പ്രശ്‌നം. ഇവർ ആത്മീയതയുടെ വാതിലുകൾ ഉപയോഗിച്ച് വിശ്വാസികളെ ആകർഷിക്കുകയും, വികാരപ്രേരിതമായ ഭക്തിയെ സാമ്പത്തിക അവസരമാക്കി മാറ്റുകയും ചെയ്യുന്നു. പണം എങ്ങനെ ഉപയോഗിക്കുന്നു, ആരുടെ കൈയിലേക്ക് പോകുന്നു, എന്താണ് ലക്ഷ്യം-ഇവയെല്ലാം മറഞ്ഞിരിക്കുമ്പോൾ സമൂഹത്തിന്റെ ആശങ്ക സ്വാഭാവികമാണ്. ഇത് നാൾക്കുനാൾ വർദ്ധിച്ചു വരികയുമാണ്.

ഇന്നത്തെ സാഹചര്യത്തിൽ മൂന്ന് കാര്യങ്ങൾ അനിവാര്യമാണ്:

ഒന്ന്, ഏതു മതസംഘടനയായാലും പണം പിരിച്ചാൽ അതിന്റെ കണക്കുകൾ ജനങ്ങൾക്ക് തുറന്ന് കാണിക്കണം. ഓഡിറ്റ് റിപ്പോർട്ട്, രജിസ്‌ട്രേഷൻ, ഔദ്യോഗിക രേഖകൾ എല്ലാം സുതാര്യമായി ഉണ്ടായിരിക്കണം.

രണ്ട്, ദാതാക്കൾ ജാഗ്രത പാലിക്കണം. 'ദൈവം പറഞ്ഞു', 'വിശേഷ അനുഗ്രഹം ലഭിക്കും', 'ഒരുപാട് നേട്ടം ലഭിക്കും' എന്നിങ്ങനെ സംസാരിക്കുന്ന 'ആൾ ദൈവങ്ങളെ' സംശയത്തോടെ പരിശോധിക്കണം. വികാരമല്ല, തെളിവാണ് സുരക്ഷ.

മൂന്ന്, നിയമസംവിധാനം ഇത്തരം വിഷയങ്ങളിൽ അന്വേഷണം നടത്തുകയും, മതത്തിന്റെ മറവിൽ നടക്കുന്ന സാമ്പത്തിക ക്രമക്കേടുകൾക്ക് ശക്തമായ നടപടികൾ സ്വീകരിക്കുകയും വേണം.

ദാനം ഒരു വിശുദ്ധ പ്രവർത്തിയാണ്. അത് മലിനമാകുന്നത് സമൂഹത്തിനാണ് നഷ്ടം. അതിനാൽ സത്യസന്ധരായ മതസ്ഥാപനങ്ങളെ സംരക്ഷിക്കാനും, തെറ്റായി പ്രവർത്തിക്കുന്ന 'ആൾ ദൈവങ്ങളെ' തിരിച്ചറിയാനും, പൊതുജനങ്ങളുടെ വിശ്വാസം സംരക്ഷിക്കാനും കേരളം ശക്തമായ ഒരു തീരുമാനത്തിലേക്ക് നീങ്ങേണ്ട സമയമാണിത്.

മതം ശുദ്ധമാണ്; അതിന്റെ പേരിൽ പ്രവർത്തിക്കുന്ന അനധികൃത ശക്തികളെ തൂത്തെറിയുക തന്നെ വേണം.

ജെയിംസ് കൂടൽ

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1