പലസ്തീനിലെ ഗാസ സ്ട്രിപ്പിന്റെ നിയന്ത്രണം അമേരിക്ക ഏറ്റെടുക്കുമെന്ന പ്രസിഡന്റ് ഡൊണാള്‍ഡ് ട്രംപിന്റെ പ്രഖ്യാപനം ഏറെ വാര്‍ത്താ പ്രാധാന്യം നേടിയിരിക്കുകയാണ്. ഗാസയുടെ നിയന്ത്രണം പൂര്‍ണമായി ഏറ്റെടുക്കാന്‍ പദ്ധതിയുണ്ടെന്നും പലസ്തീനികളെ മറ്റ് രാജ്യങ്ങളില്‍ പുനരധിവസിപ്പിക്കണമെന്നുമാണ് ട്രംപ് വ്യക്തമാക്കിയിരിക്കുന്നത്.

ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായി വൈറ്റ്ഹൗസില്‍ നടത്തിയ സംയുക്ത പത്രസമ്മേളനത്തിലാണ് ട്രംപ് ഇക്കാര്യം വ്യക്തമാക്കിയത്. ആവശ്യമെങ്കില്‍ അമേരിക്കന്‍ സൈന്യത്തെ ഗാസയില്‍ വിന്യസിക്കുമെന്നും അദ്ദേഹം അഭിപ്രായപ്പെട്ടിരുന്നു.

'ഗാസ മുനമ്പ് യുഎസ് ഏറ്റെടുക്കും, ഞങ്ങള്‍ അത് കൈകാര്യം ചെയ്യും, ഞങ്ങള്‍ അത് നിയന്ത്രിക്കും, വേണമെങ്കില്‍ അമേരിക്കന്‍ സൈന്യത്തേയും വിന്യസിക്കും' ട്രംപ് പറഞ്ഞു. നിലവില്‍ ഗാസ വാസയോഗ്യമല്ലെന്നും പലസ്തീനികള്‍ അവിടേക്ക് തിരിച്ചുവരേണ്ട ആവശ്യമില്ലെന്നും അദ്ദേഹം വ്യക്തമാക്കിയിരുന്നു.

ഗാസയിലെ ജനങ്ങള്‍ നരകതുല്യമായാണ് അവിടെ ജീവിക്കുന്നതെന്നും പ്രദേശം അമേരിക്ക ഏറ്റെടുത്ത് വികസനം കൊണ്ടുവരുമെന്നും വാര്‍ത്താസമ്മേളനത്തിനിടെ ട്രംപ് പറഞ്ഞു. 'ഗാസയിലെ ജീവിതം അവര്‍ക്ക് വളരെ നിര്‍ഭാഗ്യകരമായിരുന്നു. അവര്‍ നരകതുല്യമായാണ് അവിടെ ജീവിക്കുന്നത്. ആളുകള്‍ക്ക് ജീവിക്കാന്‍ വാസയോഗ്യമല്ല ഗാസ, അവര്‍ തിരികെ പോകാന്‍ ആഗ്രഹിക്കുന്നതിന്റെ കാരണം അവര്‍ക്ക് മറ്റ് മാര്‍ഗമില്ലാത്തതു കൊണ്ടാണെന്ന് ഞാന്‍ വിശ്വസിക്കുന്നു,'-ട്രംപ് പറഞ്ഞു.

ഗാസയെ യുഎസ് ഏറ്റെടുത്ത് പുനര്‍നിര്‍മ്മാണ പ്രവര്‍ത്തനങ്ങള്‍ നടത്തുമെന്നും അദ്ദേഹം വ്യക്തമാക്കി. പ്രദേശത്തെ തകര്‍ന്ന കെട്ടിടങ്ങള്‍ നീക്കം ചെയ്യും, ഗാസയിലെ എല്ലാ ആയുധങ്ങളും ബോംബുകളും നിര്‍വീര്യമാക്കും. അമേരിക്കയിലെ ജനങ്ങളെ ഗാസയില്‍ പുനരധിവസിപ്പിക്കുമെന്നും വികസനം സൃഷ്ടിക്കുകയാണ് ലക്ഷ്യമെന്നും ട്രംപ് വ്യക്തമാക്കി. എന്നാല്‍, ഈ പദ്ധതി എങ്ങനെ നടപ്പിലാക്കുമെന്ന കാര്യം വിശദീകരിക്കാന്‍ ട്രംപ് തയ്യാറായില്ല.

പിന്തുണച്ച് ഇസ്രായേല്‍ പ്രധാനമന്ത്രി

ട്രംപിന്റെ പ്രസ്താവനയെ പൂര്‍ണമായും പിന്തുണച്ച് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു രംഗത്തെത്തി. അമേരിക്ക തങ്ങളുടെ ഉറ്റസുഹൃത്താണെന്ന് പറഞ്ഞ നെതന്യാഹു, ട്രംപിന്റെ തീരുമാനം ചരിത്രം മാറ്റിമറിക്കുമെന്നും വ്യക്തമാക്കി. വൈറ്റ്ഹൗസിലെ കൂടിക്കാഴ്ചയ്ക്ക് ശേഷം പ്രതികരിക്കുകയായിരുന്നു അദ്ദേഹം. 'ഇസ്രായേലിന് ഇതുവരെ ഉണ്ടായിരുന്നതില്‍ വച്ച് ഏറ്റവും വലിയ സുഹൃത്ത്' എന്ന് ട്രംപിനെ പ്രശംസിച്ചുകൊണ്ട് നെതന്യാഹു പറഞ്ഞു.

ഗാസയുടെ നിയന്ത്രണം അമേരിക്ക ഏറ്റെടുക്കുമെന്ന ട്രംപിന്റെ തീരുമാനം 'ചരിത്രം മാറ്റിമറിക്കാന്‍' കഴിയുമെന്നും അത് പരിഗണിക്കേണ്ടതാണെന്നും അദ്ദേഹം പറഞ്ഞു. ട്രംപിന്റെ നിലപാടുകള്‍ കൊണ്ട് ഇസ്രയേലിലെ ജനങ്ങള്‍ക്ക് അദ്ദേഹത്തെ ഇഷ്ടപ്പെടുന്നതെന്നും ബഹുമാനിക്കുന്നതെന്നും നെതന്യാഹു കൂട്ടിച്ചേര്‍ത്തു.

ഇനി എന്ത് സംഭവിക്കും?

അമേരിക്കന്‍ പ്രസിഡന്റ് തെരഞ്ഞെടുപ്പ് സമയത്ത് പശ്ചിമേഷ്യയില്‍ സമാധാനം കൊണ്ടുവരുമെന്ന പ്രഖ്യാപനം ട്രംപ് നടത്തിയിരുന്നു. ഇതിന് പിന്നാലെ അധികാരത്തിലെത്തിയ ട്രംപ് ഇസ്രായേലും ഹമാസും തമ്മിലുള്ള വെടിനിര്‍ത്തല്‍ കരാറിനെ പിന്തുണയ്ക്കുകയും ചെയ്തിരുന്നു. എന്നാല്‍ ഗാസയുടെ നിയന്ത്രണം അമേരിക്ക ഏറ്റെടുക്കണമെന്ന ട്രംപിന്റെ പുതിയ പ്രഖ്യാപനം പശ്ചിമേഷ്യയെ കൂടുതല്‍ സംഘര്‍ഷത്തിലേക്ക് തള്ളിവിടാനാണ് സാധ്യതയെന്ന് വിദഗ്ധര്‍ ചൂണ്ടിക്കാട്ടുന്നു.

ഗാസയിലെ ജനങ്ങളെ ജോര്‍ദാന്‍, ഈജിപ്ത് ഉള്‍പ്പെടെയുള്ള രാജ്യങ്ങള്‍ ഏറ്റെടുക്കണമെന്നാണ് ട്രംപിന്റെ നിര്‍ദേശം. എന്നാല്‍ ഇക്കാര്യം നിരസിച്ചുകൊണ്ട് ഇരുരാജ്യങ്ങളും രംഗത്തെത്തിയിട്ടുണ്ട്. ട്രംപിന്റെ നീക്കത്തെ വിമര്‍ശിച്ചും അപലപിച്ചും സൗദി അറേബ്യയും ഹമാസും രംഗത്തെത്തി. ഗാസയില്‍ നിന്നും 2.2 ദശലക്ഷം പാലസ്തീനികളെ പുറത്താക്കുന്നത് അംഗീകരിക്കാനാകില്ലെന്നും, പാലസ്തീന്‍ എന്ന സ്വതന്ത്ര രാഷ്ട്രം സ്ഥാപിക്കുന്നതു വരെ അമേരിക്കയുമായി യാതൊരു നയതന്ത്ര ബന്ധവും സ്ഥാപിക്കില്ലെന്നും സൗദി അറേബ്യ വ്യക്തമാക്കി.

ട്രംപിന്റെ പദ്ധതി അംഗീകരിക്കാനാകില്ലെന്ന് ചൂണ്ടിക്കാട്ടി ഹമാസും രംഗത്തെത്തി. ഹമാസ് നേതാവ് സാമി അബു സുഹ്രിയാണ് അമേരിക്കയുടെ നീക്കത്തെ അപലപിച്ചും വിമര്‍ശിച്ചും രംഗത്തെത്തിയത്. ഇത്തരം പരാമര്‍ശങ്ങള്‍ പശ്ചിമേഷ്യയെ കൂടുതല്‍ അസ്ഥിരപ്പെടുത്തുമെന്നും അഗ്നിക്കിരയാക്കുമെന്നും ഹമാസ് നേതാവ് ചൂണ്ടിക്കാട്ടി. അസംബന്ധവും പരിഹാസ്യവുമായ നിലപാടുകളാണ് ട്രംപ് സ്വീകരിക്കുന്നതെന്നും പലസ്തീന്‍ ജനത അവരുടെ ജന്മനാടായ ഗാസയില്‍ തന്നെ തുടരുമെന്നും ഹമാസ് നേതാവ് കൂട്ടിച്ചേര്‍ത്തു.

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1