ചാർലി കിർക്ക് കൊലപാതകം: കോൺഗ്രസ് ഓൺലൈൻ പ്ലാറ്റ്‌ഫോമുകളുടെ പങ്ക് പരിശോധിക്കുന്നു; ഓൺലൈൻ ഫോറം സിഇഒമാർക്ക് നോട്ടീസ്

SEPTEMBER 17, 2025, 9:27 PM

വാഷിങ്ടൺ: അമേരിക്കൻ പ്രതിനിധി സഭയിലെ ഒരു കമ്മിറ്റി, ഓൺലൈൻ പ്ലാറ്റ്‌ഫോംകളായ ഡിസ്കോർഡ് (Discord), സ്റ്റീം (Steam), ആമസോണിന്റെ ഉടമസ്ഥതയിലുള്ള ട്വിച്ച് (Twitch), റെഡിറ്റ് (Reddit) എന്നിവയുടെ സിഇഒമാരെ ഒക്ടോബർ 8-നുള്ള ഹിയറിംഗിൽ സാക്ഷ്യം പറയാൻ ആവശ്യപ്പെട്ടതായി റിപ്പോർട്ട്. ചാർലി കിർക്കിന്റെ വധവും ഓൺലൈൻ ഫോറങ്ങളിൽ നടക്കുന്ന തീവ്രവാദ ആശയവിനിമയവും ആണ് വിഷയം എന്നാണ് ലഭിക്കുന്ന റിപ്പോർട്ട്.

31 വയസ്സുള്ള ചാർലി കിർക്ക്, Turning Point USA എന്ന കൺസർവേറ്റീവ് വിദ്യാർത്ഥി പ്രസ്ഥാനത്തിന്റെ സഹസ്ഥാപകനും മുൻ പ്രസിഡന്റ് ഡൊണാൾഡ് ട്രംപിന്റെ അടുത്ത കൂട്ടാളിയുമായിരുന്നു. കഴിഞ്ഞ ആഴ്ച 3,000-ത്തോളം പേർ പങ്കെടുത്ത പരിപാടിക്കിടെ ആണ് അദ്ദേഹം വെടിയേറ്റ് മരിച്ചത്.

“ഈ ദുരന്തത്തിനുശേഷവും, രാഷ്ട്രീയ പ്രേരിതമായ മറ്റ് ആക്രമണങ്ങളുമൊക്കെ നടക്കുമ്പോഴും, ഓൺലൈൻ പ്ലാറ്റ്‌ഫോമുകൾ രാഷ്ട്രീയഹിംസയ്ക്ക് വേദിയാകുന്ന സാഹചര്യം കോൺഗ്രസ് പരിശോധിക്കേണ്ട ഉത്തരവാദിത്തമുണ്ട്,” എന്ന് ഹൗസ് ഓവർസൈറ്റ് ആൻഡ് ഗവൺമെന്റ് റീഫോം കമ്മിറ്റിയുടെ ചെയർമാൻ റിപ്പബ്ലിക്കൻ പ്രതിനിധി ജെയിംസ് കോമർ പറഞ്ഞു.

വിഷയത്തിൽ കമ്പനികളുടെ പ്രതികരണം ഇങ്ങനെ ആണ്

ഡിസ്കോർഡ്: “ഈ വിഷയത്തിൽ നിയമനിർമ്മാതാക്കളുമായി ഞങ്ങൾ തുടർച്ചയായി സഹകരിക്കുന്നു. അടുത്ത മാസം നടക്കുന്ന സംഭാഷണത്തെയും സ്വാഗതം ചെയ്യുന്നു,” എന്നാണ് കമ്പനി പറഞ്ഞത്.
റെഡിറ്റ്: അന്വേഷണത്തിൽ തുടരുകയാണെന്നും, പ്രതി റെഡിറ്റിൽ സജീവമായിരുന്നുവെന്ന തെളിവ് ഇതുവരെ കണ്ടെത്തിയിട്ടില്ലെന്നും അറിയിച്ചു. കൂടാതെ, അക്രമം പ്രേരിപ്പിക്കുന്ന ഉള്ളടക്കം, അക്രമത്തെ മഹത്വവൽക്കരിക്കുന്ന ഉള്ളടക്കം എന്നിവയ്ക്കെതിരെ കർശനമായ നയങ്ങൾ നിലവിലുണ്ടെന്ന് കമ്പനി വ്യക്തമാക്കി.
ട്വിച്ച്, സ്റ്റീം: പ്രതികരണമൊന്നും നൽകിയിട്ടില്ല.

അതേസമയം “ഈ ഹിയറിംഗ്, ഓൺലൈൻ ഫോറങ്ങളിൽ നടക്കുന്ന തീവ്രവാദ ചിന്തകളും, രാഷ്ട്രീയമായി പ്രേരിതമായ അക്രമത്തിലേക്ക് ആളുകളെ പ്രേരിപ്പിക്കുന്ന സന്ദേശങ്ങളും പരിശോധിക്കും,” എന്ന് കമ്മിറ്റിയുടെ കത്ത് വ്യക്തമാക്കി.