വിശ്വസ്തനായ പട്ടേലിനെ നീക്കുന്നതിനെക്കുറിച്ച് ട്രംപും അദ്ദേഹത്തിന്റെ ഉന്നത സഹായികളും ആലോചിക്കുന്നതായി സ്ഥിതിഗതികളെക്കുറിച്ച് അറിവുള്ള മൂന്ന് പേരെ ഉദ്ധരിച്ചാണ് എംഎസ് നൗ റിപ്പോർട്ട് ചെയ്തത്. എഫ്.ബി.ഐയുടെ ദൈനംദിന കാര്യങ്ങൾ കൈകാര്യം ചെയ്യുന്നതിൽ പട്ടേൽ വേണ്ടത്ര വൈദഗ്ദ്ധ്യം കാണിക്കുന്നില്ലെന്നും, അദ്ദേഹം ഉണ്ടാക്കുന്ന ചില 'നല്ലതല്ലാത്ത' തലക്കെട്ടുകളിൽ പ്രസിഡന്റിന് അതൃപ്തിയുണ്ടെന്നുമാണ് റിപ്പോർട്ടിൽ പറയുന്നത്. പട്ടേലിന് പകരമായി എഫ്.ബി.ഐയിലെ ഉന്നത ഉദ്യോഗസ്ഥനായ ആൻഡ്രൂ ബെയ്‌ലിയെ നിയമിക്കാനും ട്രംപ് ആലോചിക്കുന്നുണ്ടെന്നും സൂചനയുണ്ടായിരുന്നു.

എങ്കിലും, വൈറ്റ് ഹൗസ് പ്രസ് വക്താവ് കരോലിൻ ലീവിറ്റ് ഈ വാർത്ത നിഷേധിച്ച് ഉടൻതന്നെ രംഗത്തെത്തി. എംഎസ് നൗവിന്റെ റിപ്പോർട്ട് "പൂർണ്ണമായും കെട്ടിച്ചമച്ചതാണ്" (completely made up) എന്ന് അവർ എക്സ് പ്ലാറ്റ്‌ഫോമിൽ കുറിച്ചു. വാർത്ത പുറത്തുവന്ന സമയത്ത് പ്രസിഡന്റ് ട്രംപും ഡയറക്ടർ പട്ടേലും ഓവൽ ഓഫീസിൽ കൂടിക്കാഴ്ച നടത്തുകയായിരുന്നുവെന്നും, ട്രംപ് ഈ വാർത്ത കണ്ട് ചിരിച്ചുകൊണ്ട് "ഇത് തീർത്തും തെറ്റാണ്. കാഷ്, നമുക്കൊരുമിച്ച് നിന്ന് ഒരു ചിത്രമെടുത്ത് നിങ്ങൾ മികച്ച ജോലി ചെയ്യുന്നു എന്ന് ലോകത്തെ കാണിക്കാം" എന്ന് പറഞ്ഞതായും ലീവിറ്റ് അറിയിച്ചു. അവർ ഇരുവരും ഒരുമിച്ചുള്ള ചിത്രം സഹിതമാണ് വൈറ്റ് ഹൗസ് നിഷേധക്കുറിപ്പ് പുറത്തുവിട്ടത്.

ട്രംപിന്റെ വിശ്വസ്തനായി കണക്കാക്കപ്പെടുന്ന കാഷ് പട്ടേൽ, 2025 ഫെബ്രുവരിയിലാണ് എഫ്.ബി.ഐയുടെ ഒമ്പതാമത്തെ ഡയറക്ടറായി സ്ഥാനമേറ്റത്. മുൻ ഡയറക്ടർ ക്രിസ്റ്റഫർ എ. റേയുടെ രാജിക്ക് ശേഷമാണ് ട്രംപ് പട്ടേലിനെ നിയമിച്ചത്. റിപ്പോർട്ട് നിഷേധിച്ചെങ്കിലും, തങ്ങളുടെ വാർത്തയിൽ ഉറച്ചുനിൽക്കുന്നുവെന്ന് എംഎസ് നൗ വക്താവ് അറിയിച്ചു.