ജെഫ് ബെസോസിന്റെ അമ്മയും ആമസോണിൽ ആദ്യകാലത്ത് നിക്ഷേപിച്ചവരിലൊരാളുമായ ജാക്കി ബെസോസ് വ്യാഴാഴ്ച മിയാമിയിൽ അന്തരിച്ചതായി റിപ്പോർട്ട്. 78 വയസ്സായിരുന്നു. ജെഫ് ബെസോസ് സോഷ്യൽ മീഡിയയിൽ പറഞ്ഞത് അനുസരിച്ച്, അമ്മയ്ക്ക് ലൂയി ബോഡി ഡിമെൻഷ്യ (Lewy body dementia) എന്ന നാഡീവ്യൂഹ സംബന്ധമായ രോഗമുണ്ടായിരുന്നു എന്നാണ് പുറത്തു വരുന്ന വിവരം.

1995-ൽ ജാക്കി ബെസോസ് ഭർത്താവിനൊപ്പം 2,45,000 ഡോളറിലധികം തുകയാണ് ആമസോണിൽ നിക്ഷേപിച്ചത്. ജെഫ് ബെസോസ് 1994-ൽ സ്ഥാപിച്ച ഓൺലൈൻ പുസ്തകവിൽപ്പനക്കട ആയ ആമസോൺ ഇന്ന് ഏകദേശം 2.5 ട്രില്യൺ ഡോളറിന്റെ മൂല്യമുള്ള ലോകത്തിലെ വലിയ കമ്പനിയായി വളരുകയായിരുന്നു.

ജാക്കി ബെസോസ് 1946 ഡിസംബർ 29-ന് വാഷിംഗ്ടൺ ഡി.സി യിൽ ആണ് ജനിച്ചത്. അൽബുകർക്യൂയിലാണ് വളർന്നത്. 17-ാം വയസ്സിൽ ജെഫിനെ പ്രസവിച്ചു. 1964-ൽ സ്കൂളിൽ പഠിക്കുമ്പോൾ ഗർഭിണിയായിരുന്ന അവളെ പുറത്താക്കാൻ സ്കൂൾ ശ്രമിച്ചു. എന്നാൽ പിതാവ് ഇടപെട്ടതിനാൽ പഠനം പൂർത്തിയാക്കാൻ കഴിഞ്ഞു. എന്നാൽ ഡിപ്ലോമ സ്വീകരിക്കാനായി സ്റ്റേജിൽ കയറാൻ അവളെ അധികൃതർ അനുവദിച്ചില്ല.

പിന്നീട് ജാക്കി ബെസോസ് നൈറ്റ് സ്കൂളിൽ ചേർന്ന് ബാങ്കിൽ ജോലി തുടങ്ങി. പ്രൊഫസർമാർ കുഞ്ഞിനെ കൊണ്ടുവരാൻ അനുവദിക്കുന്ന ക്ലാസുകളാണ് അവർ തിരഞ്ഞെടുത്തിരുന്നത്. “അമ്മ രണ്ടു ഡഫൽ ബാഗുകളുമായി ക്ലാസിൽ എത്തും — ഒന്നിൽ പുസ്തകങ്ങൾ, മറ്റൊന്നിൽ ഡയപ്പർ, ബോട്ടിൽ, എന്നെ ശാന്തമായി ഇരുത്താനുള്ള സാധനങ്ങൾ,” എന്ന് ജെഫ് മുൻപ് ഒരിക്കൽ പറഞ്ഞിട്ടുണ്ട്.

ആ കാലയളവിലാണ് അവർ ക്യൂബയിൽ നിന്ന് കുടിയേറിയ മിഗ്വൽ ബെസോസിനെ പരിചയപ്പെടുകയും വിവാഹം കഴിക്കുകയും ചെയ്തത്. അവർക്ക് ഏകദേശം 60 വർഷത്തെ ദാമ്പത്യജീവിതത്തിൽ ദമ്പതികൾക്ക് ജെഫിനൊപ്പം ക്രിസ്റ്റീന, മാർക്ക് എന്നീ രണ്ട് മക്കളും ഉണ്ടായി.

45-ാം വയസ്സിൽ ജാക്കി ബെസോസ് വീണ്ടും കോളേജിൽ ചേർന്ന് ന്യൂജേഴ്സിയിലെ സെന്റ് എലിസബത്ത് സർവകലാശാലയിൽ നിന്ന് സൈക്കോളജിയിൽ ബിരുദം നേടി. 2020-ൽ ജാക്കി ബെസോസിന് ലൂയി ബോഡി ഡിമെൻഷ്യ സ്ഥിരീകരിച്ചതായി ബെസോസ് ഫാമിലി ഫൗണ്ടേഷൻ അറിയിച്ചു. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്