'തന്റെ സ്വന്തം നേട്ടത്തിന് വേണ്ടിയല്ല, ഒരുപാട് ജീവനുകള്‍ രക്ഷിക്കാനാണ് താനിത് ചെയ്യുന്നത്'; പുടിനുമായി ചര്‍ച്ച നടത്തുന്നത് ഉക്രെയിന് വേണ്ടി വില പേശാനല്ലെന്ന് ഡൊണാള്‍ഡ് ട്രംപ്

AUGUST 15, 2025, 11:42 AM

വാഷിങ്ടണ്‍: ഉക്രെയിന് വേണ്ടി വില പേശാനല്ല റഷ്യന്‍ പ്രസിഡന്റ് വ്ളാഡിമിര്‍ പുടിനുമായി താന്‍ ചര്‍ച്ച നടത്തുന്നതെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. ഇരുനേതാക്കളും തമ്മിലുള്ള കൂടിക്കാഴ്ചയ്ക്കായി അലാസ്‌കയിലേക്ക് പോകുന്നതിന് വിമാനത്തില്‍ കയറിപ്പോഴാണ് ട്രംപ് ഇത്തരത്തില്‍ പ്രതികരിച്ചത്. താന്‍ യുഎസ് പ്രസിഡന്റല്ലായിരുന്നെങ്കില്‍ പുടിന്‍ ഉക്രെയിന്‍ മുഴുവന്‍ പിടിച്ചടക്കുമായിരുന്നുവെന്നും ട്രംപ് കൂട്ടിച്ചേര്‍ത്തു.

യുദ്ധം അവസാനിപ്പിക്കാന്‍ വിസമ്മതിച്ചാല്‍ പുടിന് വളരെ കഠിനമായ പ്രത്യാഘാതങ്ങള്‍ നേരിടേണ്ടിവരുമെന്ന് താങ്കള്‍ മുമ്പ് പറഞ്ഞിരുന്നുവെന്ന് ഒരു മാധ്യമ പ്രവര്‍ത്തകന്‍ ട്രംപിനെ ഓര്‍പ്പിച്ചപ്പോള്‍ അദ്ദേഹത്തിന്റെ പ്രതികരണം , അത് സാമ്പത്തികമായി വളരെ കഠിനമായിരിക്കും എന്നാണ്.

തന്റെ സ്വന്തം നേട്ടത്തിനു വേണ്ടിയല്ല താന്‍ ഇത് ചെയ്യുന്നത്. തനിക്ക് ഇതിന്റെ ആവശ്യമില്ല. തനിക്ക് തന്റെ രാജ്യത്ത് ശ്രദ്ധ കേന്ദ്രീകരിക്കാനാണ് താല്‍പ്പര്യം. പക്ഷേ, ഒരുപാട് ജീവനുകള്‍ രക്ഷിക്കാനാണ് താനിത് ചെയ്യുന്നതെന്ന് ട്രംപ് കൂട്ടിച്ചേര്‍ത്തു. അലാസ്‌കന്‍ നഗരമായ ആങ്കറേജിന്റെ വടക്കേയറ്റത്ത് സ്ഥിതി ചെയ്യുന്ന യുഎസിന്റെ ജോയിന്റ് ബേസ് എല്‍മെന്‍ഡോര്‍ഫ്-റിച്ചാര്‍ഡ്‌സണ്‍ (ജെബിഇആര്‍) സേനാതാവളമാണ് ചരിത്രപരമായ ട്രംപ്-പുടിന്‍ ഉച്ചകോടിയുടെ വേദി.

റഷ്യയില്‍ നിന്ന് 1867 ല്‍ യുഎസ് വാങ്ങിയ പ്രദേശമാണ് അലാസ്‌ക. യുഎസിന്റെ ആര്‍ട്ടിക് കേന്ദ്രീകരിച്ചുള്ള ദൗത്യങ്ങള്‍ നടത്തുന്നത് ഈ താവളം കേന്ദ്രീകരിച്ചാണ്. റഷ്യന്‍ സംഘത്തെ സേനാ താവളത്തില്‍ സ്വീകരിക്കുന്നതിനെ തുടക്കത്തില്‍ യുഎസ് എതിര്‍ത്തിരുന്നെങ്കിലും അതിസുരക്ഷാ മാനദണ്ഡങ്ങളെല്ലാം ജെബിഇആറില്‍ പാലിക്കപ്പെടുമെന്നുള്ളതിനാല്‍ പിന്നീട് സമ്മതിക്കുകയായിരുന്നു. നേരത്തേ ജുനാവു, ഫെയര്‍ബാങ്ക്സ്, ആങ്കറേഡ് നഗരങ്ങളാണ് വേദിക്കായി പരിഗണിച്ചിരുന്നത്. ചില അലാസ്‌കക്കാര്‍ തങ്ങളുടെ സ്വകാര്യ വസതികള്‍ പോലും കൂടിക്കാഴ്ചയ്ക്ക് വിട്ടു നല്‍കാന്‍ സന്നദ്ധരായിരുന്നു.