വാഷിംഗ്ടൺ: അവധിക്കാലത്തിന് മുമ്പായി എല്ലാ സൈനികർക്കും 3.8% ശമ്പളവർധന അനുവദിക്കുന്ന പ്രതിരോധ ബിൽ പാസാക്കി യുഎസ് നിയമനിർമ്മാതാക്കൾ. 2026 ജനുവരി 1 മുതൽ പ്രാബല്യത്തിൽ വരുന്ന ഈ വർധന, കോൺഗ്രസിന്റെ വാർഷികമായി പാസാക്കേണ്ട പ്രതിരോധ നയബില്ലിലെ പ്രധാന വ്യവസ്ഥകളിലൊന്നാണ്.

900 ബില്യൺ ഡോളർ മൂല്യമുള്ള ബിൽ ഡിസംബർ 17-ന് സെനറ്റിൽ 77–20 എന്ന വോട്ടിന് ആണ് പാസായത്. സൈനിക അടിസ്ഥാനസൗകര്യങ്ങൾ ശക്തിപ്പെടുത്തുന്നതിനായി വലിയ തുകയാണ് ബില്ലിൽ അനുവദിച്ചിരിക്കുന്നത്.

ബില്ലിൽ ഉൾപ്പെടുന്നത് എന്തൊക്കെ എന്ന് നോക്കാം.

• പുതിയ ഡൈനിംഗ് സൗകര്യങ്ങൾ, സ്കൂളുകൾ, ചൈൽഡ് കെയർ സെന്ററുകൾ നിർമ്മിക്കാൻ നൂറുകണക്കിന് മില്യൺ ഡോളർ
• സൈനിക ആശുപത്രികളുടെ നവീകരണം
• നോർത്ത് കരോലിനയിലെ ലംബീ ഗോത്രത്തിന് (Lumbee Tribe) ഫെഡറൽ അംഗീകാരം

നാഷണൽ ഡിഫൻസ് ഓതറൈസേഷൻ ആക്ട് (NDAA) എന്നറിയപ്പെടുന്ന ഈ ബില്ലിന് ഇരുപാർട്ടികളുടെ പിന്തുണ ലഭിച്ചു എന്നാണ് പുറത്തു വരുന്ന റിപ്പോർട്ട്. സെനറ്റ് മേജോറിറ്റി ലീഡർ ജോൺ ത്യൂൺ (റിപ്പബ്ലിക്കൻ) ഈ ശമ്പളവർധനയെ “അർഹമായത്” എന്ന് വിശേഷിപ്പിച്ചു. “രാജ്യത്തിന്റെ സുരക്ഷയും സമാധാനവും ഉറപ്പാക്കാൻ ആവശ്യമായ ശക്തമായ സൈന്യത്തിന് ഈ ബിൽ സഹായകമാണ്,” എന്ന് അദ്ദേഹം പറഞ്ഞു.

എന്നാൽ ബില്ലിനെതിരെ വിമർശനങ്ങളും എതിർപ്പുകളും ഉണ്ടായി. സെനറ്റിലെ ഡെമോക്രാറ്റിക് നേതാവ് പാറ്റി മറി ബില്ലിനെതിരെ വോട്ട് ചെയ്തു. ട്രംപ് ഭരണകൂടത്തിന്റെ വെനിസ്വേലയിലെ സൈനിക നടപടികളെ നിയന്ത്രിക്കാൻ ബിൽ മതിയായ നടപടികൾ ഉൾപ്പെടുത്തിയില്ലെന്നും, അവ “നിയമവിരുദ്ധം” ആണെന്നും എതിർത്തവർ ആരോപിച്ചു. ഇത് കൂടാതെ, സൈനികർക്കായി IVF (കൃത്രിമ ഗർഭധാരണം) ചികിത്സാ കവറേജ് വിപുലീകരിക്കുന്ന വ്യവസ്ഥ ബില്ലിൽ നിന്ന് ഒഴിവാക്കിയതിലും അവർ എതിർപ്പ് അറിയിച്ചു. “ഈ ഭരണകൂടം സൈന്യത്തെ രാഷ്ട്രീയവൽക്കരിക്കുന്നതും ആയുധമാക്കുന്നതും നമ്മെ ആശങ്കപ്പെടുത്തണം,” എന്ന് പാറ്റി മറി പ്രതികരിച്ചു.

ബില്ലിലെ ശ്രദ്ധേയമായ മറ്റ് 3 വ്യവസ്ഥകൾ ഇവയാണ് 

1) ബോട്ട് ആക്രമണ ദൃശ്യങ്ങൾ പുറത്തുവിടാത്താൽ പെന്റഗണിന് ശിക്ഷ

കരീബിയൻ കടലിൽ മയക്കുമരുന്ന് കടത്തൽ സംശയിച്ച് ബോട്ടുകളെ ആക്രമിച്ച (11 പേർ കൊല്ലപ്പെട്ടു) സൈനിക ഓപ്പറേഷന്റെ എഡിറ്റ് ചെയ്യാത്ത വീഡിയോ കോൺഗ്രസിന് കാണിക്കാത്ത പക്ഷം,

പ്രതിരോധ സെക്രട്ടറി പീറ്റ് ഹെഗ്സെത്തിന്റെ യാത്രാ ബജറ്റിന്റെ 25% കുറയ്ക്കും എന്ന വ്യവസ്ഥ ബില്ലിൽ ഉണ്ട്.

ഈ സംഭവത്തിൽ രക്ഷപ്പെട്ടവർക്കെതിരെ വെടിവെച്ചത് യുദ്ധകുറ്റമായി കണക്കാക്കാമെന്ന വിമർശനവും ഉയർന്നിരുന്നു.

2) ഹെലികോപ്റ്റർ മുന്നറിയിപ്പ് ഇളവുകൾക്ക് ഇരുപാർട്ടി എതിർപ്പ്

വാഷിംഗ്ടൺ ഡി.സി.യിൽ ചില ഹെലികോപ്റ്ററുകൾക്ക് വിമാനങ്ങൾക്ക് മുന്നറിയിപ്പ് നൽകുന്നതിൽ ഇളവ് അനുവദിക്കുന്ന വ്യവസ്ഥ ബില്ലിൽ ഉൾപ്പെട്ടിട്ടുണ്ട്.

ഇതുപോലുള്ള ഇളവുകളാണ് ജനുവരിയിൽ റീഗൺ നാഷണൽ എയർപോർട്ടിന് സമീപം നടന്ന വിമാനാപകടത്തിന് (67 പേർ മരിച്ചു) കാരണമായതെന്ന് വിമർശകർ പറയുന്നു.

ഇത് തിരുത്താൻ, ഡിസംബർ 17-ന് സെനറ്റ് പുതിയ സുരക്ഷാ ബിൽ ഏകകണ്ഠമായി പാസാക്കി.

3) ലംബീ ഗോത്രത്തിന് ഫെഡറൽ അംഗീകാരം

നോർത്ത് കരോലിനയിലെ ലംബീ ഗോത്രത്തിന് വർഷങ്ങളായുള്ള പോരാട്ടത്തിന് ശേഷം ഫെഡറൽ അംഗീകാരം ലഭിച്ചു.

ഇതോടെ ഗോത്രസമൂഹത്തിന് മില്യൺ ഡോളറുകളുടെ സർക്കാർ പദ്ധതികൾ ലഭ്യമാകും.

ചില മറ്റ് ഗോത്രങ്ങൾ ഇതിനെതിരെ വിമർശനം ഉന്നയിച്ചെങ്കിലും, പ്രസിഡന്റ് ഡോണൾഡ് ട്രംപ് ലംബീ ഗോത്രത്തിന്റെ ശക്തമായ പിന്തുണക്കാരനായിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്