കാനഡയിലെ വിന്നിപെഗിൽ നിന്നുള്ള ഒരു ദമ്പതികൾ, വെസ്റ്റ്‌ജെറ്റ് വിമാനത്തിലെ ഇക്കണോമി ക്ലാസ് സീറ്റുകളിൽ വന്ന പുതിയ മാറ്റങ്ങൾ കാരണം വലിയ ബുദ്ധിമുട്ടുകൾ നേരിട്ടതായി പറയുന്നു. സൗകര്യപ്രദമായി ഇരിക്കാനായി അധിക പണം നൽകേണ്ടി വന്നു എന്നും ഇതിനായി ഡോക്ടറുടെ രേഖകൾ സമർപ്പിക്കേണ്ടി വന്നു എന്നതുമാണ് അവർ വ്യക്തമാക്കുന്നത്.

കഴിഞ്ഞ വർഷം വെസ്റ്റ്‌ജെറ്റ്, ബോയിംഗ് 737 മോഡൽ വിമാനങ്ങളിലെ സീറ്റുകൾ പുനഃക്രമീകരിക്കുമെന്ന് പ്രഖ്യാപിച്ചിരുന്നു. 43 വിമാനങ്ങളിൽ ഒരു അധിക സീറ്റ് നിര കൂടി ചേർക്കുകയും, കാബിൻ പല വിഭാഗങ്ങളായി തിരിക്കുകയും ചെയ്തിരുന്നു. ഇതിലൂടെ കൂടുതൽ ടിക്കറ്റുകൾ വിൽക്കാൻ കഴിയുമെങ്കിലും, സ്റ്റാൻഡേർഡ് ഇക്കണോമി ക്ലാസ് സീറ്റുകളിലെ കാല് വയ്ക്കാനുള്ള സ്ഥലം (legroom) കുറയുകയായിരുന്നു.

അതേസമയം ഈ മാറ്റങ്ങൾ സുരക്ഷയെ ബാധിക്കില്ലെന്നും, കുറഞ്ഞ നിരക്കിൽ യാത്രാ ഓപ്ഷനുകൾ നൽകാനാണെന്നുമായിരുന്നു കമ്പനി പറയുന്നത്. 

എന്നാൽ ജെറമി ഡയസ് എന്ന യാത്രക്കാരൻ പറയുന്നത്, ഈ വാഗ്ദാനങ്ങൾ പ്രായോഗികമായി ശരിയായില്ലെന്നാണ്. ഡയസിന്റെയും പങ്കാളിയുടെയും വിന്നിപെഗ്–ടൊറന്റോ യാത്രയ്ക്കിടെയാണ് പ്രശ്നങ്ങൾ തുടങ്ങിയത്. 6 അടി 5 ഇഞ്ച് ഉയരമുള്ള തന്റെ പങ്കാളിക്ക്, മുമ്പ് തന്നെ വിമാനത്തിലെ സീറ്റുകളിൽ ഇരിക്കുന്നത് ബുദ്ധിമുട്ടായിരുന്നുവെന്ന് ആണ് ഡയസ് പറയുന്നത്. സീറ്റുകളുടെ പുതിയ ക്രമീകരണം  വന്നതോടെ അവസ്ഥ കൂടുതൽ മോശമായി. യാത്രയ്ക്ക് മുൻപ് വെസ്റ്റ്‌ജെറ്റുമായി ബന്ധപ്പെടുകയും, തന്റെ പങ്കാളിക്ക് അധിക സൗകര്യം ആവശ്യമാണെന്ന് അറിയിക്കുകയും ചെയ്തതായി ഡയസ് പറയുന്നു. അപ്പോൾ ഉയരം സ്ഥിരീകരിക്കുന്ന ഒരു ഡോക്ടർ സർട്ടിഫിക്കറ്റ് നൽകിയാൽ മതിയെന്ന് വെസ്റ്റ്‌ജെറ്റ് അറിയിച്ചതായും അദ്ദേഹം വ്യക്തമാക്കുന്നു.

ഡോക്ടറുടെ കുറിപ്പ് സമർപ്പിച്ച ശേഷം, കൂടുതൽ ഒരു മെഡിക്കൽ ഫോറം കൂടി പൂരിപ്പിക്കണം എന്ന് വെസ്റ്റ്‌ജെറ്റ് പിന്നീട് അറിയിച്ചു. ആ ഫോം 12 പേജുള്ള ഒരു ഡോക്യുമെന്റ് ആയിരുന്നുവെന്നും, ആരോഗ്യ വിവരങ്ങളും ഡോക്ടറുടെ ഒപ്പും ആവശ്യമായിരുന്നുവെന്നും ഡയസ് പറഞ്ഞു. എന്നാൽ ഡോക്ടർ ഈ ഫോം പൂരിപ്പിക്കാൻ വിസമ്മതിച്ചു. ഒരു യാത്രക്കാരന്റെ ഉയരത്തിനായി ഇത്രയും വിശദമായ മെഡിക്കൽ വിവരങ്ങൾ ആവശ്യപ്പെടുന്നത് അനാവശ്യമാണെന്ന് ഡോക്ടർ വ്യക്തമാക്കി എന്നും അദ്ദേഹം പറയുന്നു.

അവസാനം, മറ്റ് മാർഗമില്ലാതെ, ഡയസും പങ്കാളിയും അധിക പണം നൽകി സീറ്റ് അപ്‌ഗ്രേഡ് ചെയ്യേണ്ടിവന്നു. പിന്നീട് അവർ ഈ വിഷയത്തിൽ കാനഡിയൻ ട്രാൻസ്പോർട്ടേഷൻ ഏജൻസിയിൽ പരാതി നൽകി. എന്നാൽ ഈ പരാതി പരിഗണിക്കാൻ വർഷങ്ങൾ എടുത്തേക്കാമെന്നും ഡയസ് പറയുന്നു.

ഇതിനിടെ, ഈ വിഷയത്തിൽ പൊതുജന വിമർശനം ശക്തമായതോടെ, സീറ്റുകളുടെ പുനഃക്രമീകരണം വീണ്ടും പരിശോധിക്കുമെന്ന് വെസ്റ്റ്‌ജെറ്റ് അറിയിച്ചു. കമ്പനി ജീവനക്കാർക്ക് അയച്ച ആഭ്യന്തര സന്ദേശത്തിൽ, ഇക്കണോമി ക്ലാസ് സീറ്റുകളെക്കുറിച്ചുള്ള അവലോകനം വേഗത്തിലാക്കുമെന്നും, ഉടൻ തീരുമാനമുണ്ടാകാമെന്നും വ്യക്തമാക്കിയിട്ടുണ്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്