കന്യാസ്ത്രീകളുടെ അറസ്റ്റ്: ഷിക്കാഗോ എക്യുമെനിക്കൽ കൗൺസിൽ അപലപിച്ചു

AUGUST 18, 2025, 7:08 AM

ഛത്തീസ്ഗഡിൽ നടന്ന അനീതിപരവും അകാരണവും അന്യായവുമായ കന്യാസ്ത്രീകളുടെ അറസ്റ്റിനെതിരെ ഷിക്കാഗോ എക്യുമെനിക്കൽ സമൂഹം ശക്തമായി പ്രതിഷേധിക്കുകയും അപലപിക്കുന്ന പ്രമേയം പാസാക്കുകയും ചെയ്തു. ഓഗസ്റ്റ് 12-ാം തീയതി സെന്റ്‌മേരീസ് മലങ്കര കാത്തലിക് ദേവാലയത്തിൽ കൂടിയ കൗൺസിൽ മീറ്റിംഗിൽ എക്യുമെനിക്കൽ പ്രസിഡന്റ് റവ. ഫാ. തോമസ് മാത്യു അദ്ധ്യക്ഷം വഹിച്ചു.

വൈസ് പ്രസിഡന്റ് റവ. ബിജു യോഹന്നാന്റെ പ്രാരംഭ പ്രാർത്ഥനക്കുശേഷം ബഞ്ചമിൻ തോമസ് (ജോ. സെക്രട്ടറി) ഏവരെയും സ്വാഗതം ചെയ്തു. അദ്ധ്യക്ഷത പ്രസംഗത്തിൽ ഫാ. തോമസ് മാത്യു, കന്യാസ്ത്രീകളുടെ അന്യായമായ അറസ്റ്റിനെ അപലപിച്ച് സംസാരിച്ചു. മത വിശ്വാസങ്ങൾ അനുഷ്ടിക്കുവാനും പ്രോത്സാഹിപ്പിക്കുവാനും പ്രചരിപ്പിക്കുവാനും ഭരണഘടന അവകാശം നൽകുന്നുണ്ട്.

കന്യാസ്ത്രീകളുടെ അറസ്റ്റിലൂടെ ഭരണഘടനയുടെ ലംഘനവും മതസ്വാതന്ത്ര്യത്തിന്റെയും ന്യൂനപക്ഷങ്ങളുടെ അവകാശങ്ങളുടെ മേലുള്ള കടന്നു കയറ്റവുമാണ് നടന്നിരിക്കുന്നത്. ഇത് ഒറ്റപ്പെട്ട സംഭവമല്ല. തുടർന്ന് അപലപിക്കാനുള്ള പ്രമേയം, റവ. ബിജു യോഹന്നാൻ അവതരിപ്പിച്ചു. ഇന്ത്യാ മഹാരാജ്യത്തിലെ വർഗ്ഗീയ ഘടകങ്ങൾ ന്യൂനപക്ഷങ്ങളെ ഭയപ്പെടുത്തുക, വസ്തുവകകൾ നശിപ്പിക്കുക, മത ചടങ്ങുകൾ തടസ്സപ്പെടുത്തുക, ശാരീരികവും മാനസികവുമായി പീഡിപ്പിക്കുക, അപമാനിക്കുക എന്നത് ഒരുകാലത്തും അനുവദനീയമല്ല.

ഓരോ വർഷവും ഏതാണ്ട് 800 ഓളം ആക്രമണങ്ങളാണ് ക്രൈസ്തവർക്ക് നേരെ നടന്നിരിക്കുന്നത്. സംസ്‌കാരം, പൈതൃകം, ഭാഷാ, ജാതി, മത, വർഗ്ഗം എന്നിവകൊണ്ട് ഭാരതം വ്യത്യസ്ഥമാണ്. നാനാത്വത്തിൽ ഏകത്വം എന്ന തത്വത്തിന് ഏറ്റ വിലയ ഒരു പ്രഹമാണ് ഈ അതിക്രമത്തിലൂടെ നടന്നത്. പ്രമേയത്തിലൂടെ ക്രൈസ്തവരുടെ മേൽ നടക്കുന്ന അതിക്രമങ്ങളെയും കന്യാസ്ത്രീ അറസ്റ്റിനെയും ശക്തമായി അപലപിക്കുകയും, പ്രമേയം ഐകകണ്‌ഠേന പാസാക്കുകയും ചെയ്തു. പ്രമേയം ഇന്ത്യൻ കോൺസുൽ ജനറലിനും ഇല്ലിനോയി സെനറ്റേഴ്‌സിനും സമർപ്പിക്കുന്നതിനും യോഗം തീരുമാനിച്ചു.

റവ. ജെയിംസ് തോമസ്, സാം തോമസ് എന്നിവർ അറസ്റ്റിനെതിരെ പ്രതിഷേധിച്ച് സംസാരിച്ചു. ജോർജ് പണിക്കർ മീറ്റിംഗിൽ സംബന്ധിച്ച ഏവർക്കും നന്ദി അറിയിച്ചു. റവ. ജെയിംസ് തോമസ് സമാപന പ്രാർത്ഥന നടത്തി. കൗൺസിൽ സെക്രട്ടറി അച്ചൻകുഞ്ഞ് മാത്യു മീറ്റിംഗിൽ നടപടിക്രമങ്ങൾ നിയന്ത്രിച്ചു.

സാം തേക്കനേൽ, ജോൺസൻ വള്ളിയിൽ, പി.ആർ.ഒ