പ്രിയപ്പെട്ട ഫോമാ അംഗങ്ങളേ,

ഫോമാ ജനറൽ ബോഡി യോഗത്തിൽ കൈക്കൊണ്ട തീരുമാനങ്ങളുടെയും തുടർന്ന് നാഷണൽ കൗൺസിൽ നടത്തിയ ചർച്ചകളുടെയും നടപടികളുടെയും അടിസ്ഥാനത്തിൽ, സൺഷൈൻ റീജിയനുമായി ബന്ധപ്പെട്ട പ്രാദേശിക പുനഃസംഘടന ഔദ്യോഗികമായി രേഖപ്പെടുത്തുകയും സ്ഥിരീകരിക്കുകയും ചെയ്യുന്നതിനായാണ് ഈ അറിയിപ്പ്.

2025 ഒക്ടോബർ 25ന് ചേർന്ന ഫോമാ ജനറൽ ബോഡി യോഗത്തിൽ, അംഗങ്ങളുടെ കൂടുതൽ പങ്കാളിത്തം ഉറപ്പാക്കുന്നതിനും പ്രാദേശിക പ്രാതിനിധ്യം ശക്തിപ്പെടുത്തുന്നതിനും ഫോമായുടെ പ്രവർത്തനങ്ങളിലും വിവിധ ഇടപെടലുകളിലും കൂടുതൽ സജീവമായ പങ്കാളിത്തം പ്രോത്സാഹിപ്പിക്കുന്നതിനുമായി, ചില ഫോമാ റീജിയനുകളെ ഭൂമിശാസ്ത്രപരമായി വിഭജിക്കുന്നതിനുള്ള ഭേദഗതികൾ അംഗീകരിച്ചിരുന്നു. ഇതിന്റെ ഭാഗമായി വെസ്റ്റേൺ റീജിയൻ, സതേൺ റീജിയൻ, സൺഷൈൻ റീജിയൻ, എംപയർ റീജിയൻ എന്നീ റീജിയനുകൾ വിഭജിക്കപ്പെട്ട കാര്യം ഏവർക്കും അറിവുള്ളതാണല്ലോ.

തിരഞ്ഞെടുപ്പിന് മുമ്പുതന്നെ വെസ്റ്റേൺ റീജിയനെ മൂന്ന് റീജിയനുകളായി വിഭജിക്കുകയും സൺഷൈൻ റീജിയനെ രണ്ട് റീജിയനുകളായി വിഭജിക്കുന്നതിന് അംഗീകാരം നൽകുകയും ചെയ്തിരുന്നു. ഫോമാ 2026ലെ അധികാര കൈമാറ്റ നടപടികളുടെ ഭാഗമായി, ജനറൽ ബോഡി അംഗീകരിച്ച ഈ വിഭജനങ്ങൾ സൺഷൈൻ റീജിയനും എംപയർ റീജിയനും 2026 ഒക്ടോബർ 17ന് നടക്കുന്ന അധികാര കൈമാറ്റ ചടങ്ങിന് മുമ്പായി പൂർത്തിയാക്കണമെന്ന് നാഷണൽ കൗൺസിൽ പിന്നീട് തീരുമാനിച്ചു.

സൺഷൈൻ റീജിയന്റെ വിഭജനം നടപ്പാക്കുന്നതുമായി ബന്ധപ്പെട്ട് ചർച്ച ചെയ്യുന്നതിനായി 2026 സെപ്തംബർ 7ന് നാഷണൽ കൗൺസിൽ യോഗം ചേർന്നു. യോഗത്തിൽ സൺഷൈൻ റീജിയൻ വിഭജിച്ച് രൂപീകരിക്കാനുദ്ദേശിക്കുന്ന പുതിയ റീജിയന്റെ ആർ.വി.പിയെയും പ്രതിനിധികളെയും നാഷണൽ കൗൺസിൽ അംഗങ്ങളെ സംബന്ധിച്ചുമുള്ള പട്ടിക അവതരിപ്പിച്ചു. എന്നാൽ, നിർദേശിക്കപ്പെട്ട പുതിയ നാഷണൽ കൗൺസിൽ പ്രതിനിധികളെയും ആർ.വി.പിയെയും സംബന്ധിച്ച് നേരത്തെ തങ്ങൾക്ക് വിവരം ലഭിച്ചിരുന്നില്ലെന്ന് ചില നാഷണൽ കൗൺസിൽ അംഗങ്ങൾ യോഗത്തിൽ വ്യക്തമാക്കി.

ചർച്ചയ്ക്കിടെ സൺഷൈൻ റീജിയനിൽ തിരഞ്ഞെടുപ്പ് നടത്താവുന്നതാണെന്ന് ഫോമാ പ്രസിഡന്റ് നാഷണൽ കൗൺസിലിനെ അറിയിച്ചു. അതേസമയം, നിലവിലുള്ള സൺഷൈൻ റീജിയൻ നാഷണൽ കൗൺസിൽ അംഗങ്ങളെയും പ്രാദേശിക പ്രതിനിധികളെയും ആദ്യം ബന്ധപ്പെടുകയും, തുടർനടപടികൾ സ്വീകരിക്കുന്നതിന് മുമ്പ് അവരുടെ അഭിപ്രായങ്ങളും നിർദേശങ്ങളും ചർച്ചയിൽ ഉൾപ്പെടുത്തുകയും വേണമെന്ന് ഫോമായുടെ നിയുക്ത പ്രസിഡന്റ് ബിജു തോണിക്കടവിലും മെട്രോ ആർ.വി.പി ജോഷ്വ മാത്യുവും നിർദേശിച്ചു. അന്തിമ തീരുമാനമെടുക്കും മുമ്പ് തിരഞ്ഞെടുപ്പ് കൂടാതെ തന്നെ അഭിപ്രായ സമന്വയം ഉണ്ടാക്കണമെന്ന് സൺഷൈൻ റീജിയൻ ആർ.വി.പി ജോമോൻ ആന്റണിയും വ്യക്തമാക്കി.

ഈ നിർദേശത്തെ തുടർന്ന്, ജനറൽ ബോഡി തീരുമാനത്തിന് അനുസൃതമായി വിഭജനം അന്തിമമാക്കുന്നതിന് തിരഞ്ഞെടുക്കപ്പെട്ട ഫോമാ പ്രസിഡന്റ് ബന്ധപ്പെട്ട പ്രതിനിധികളുമായി ആവശ്യമായ ചർച്ചകൾ നടത്തുകയുണ്ടായി.

2026 സെപ്തംബർ 9-ാം തിയതി ബുധനാഴ്ച നടന്ന തുടർ യോഗത്തിൽ, നിർദേശിക്കപ്പെട്ട പ്രാദേശിക വിഭജനവും നേതൃത്വ ഘടനയും സംബന്ധിച്ച് നിലവിലുള്ള നാഷണൽ കൗൺസിൽ അംഗങ്ങളെയും ആർ.വി.പിമാരെയും ബന്ധപ്പെടണമെന്ന് തീരുമാനിച്ചു. സെപ്തംബർ 7ലെ യോഗത്തിൽ  നിർദേശിക്കപ്പെട്ട ആർ.വി.പിയെയും നാഷണൽ കൗൺസിൽ അംഗങ്ങളെയും ബന്ധപ്പെട്ട് വിവരം അറിയിക്കുന്നതിനുള്ള ചുമതല പുതിയ പ്രസിഡന്റ് ബിജു തോണിക്കടവിലിനെ കമ്മിറ്റി ഏൽപ്പിച്ചു.

2026 സെപ്തംബർ 11ന്, ബന്ധപ്പെട്ട പ്രതിനിധികളുമായി താൻ ആശയവിനിമയം നടത്തിയെന്നും, പ്രാദേശിക വിഭജനവുമായി മുന്നോട്ടുപോകുന്നതിന് എല്ലാ വിഭാഗങ്ങളും സന്നദ്ധരാണെന്നും ബിജു തോണിക്കടവിൽ എന്നെ അറിയിച്ചു.

അതിനാൽ, ജനറൽ ബോഡി കൈക്കൊണ്ട തീരുമാനത്തിന്റെയും തുടർന്ന് നാഷണൽ കൗൺസിൽ നടത്തിയ ചർച്ചകളുടെയും ബന്ധപ്പെട്ട പ്രതിനിധികളുമായി നടത്തിയ കൂടിയാലോചനകളുടെയും അടിസ്ഥാനത്തിൽ സൺഷൈൻ റീജിയൻ താഴെപ്പറയുന്ന രണ്ട് റീജിയനുകളായി വിഭജിക്കുന്നതാണ്:

സൺഷൈൻ റീജിയൻ

• ആർ.വി.പി: ബാബു തോമസ്, നാഷണൽ കൗൺസിൽ അംഗം: സന്തോഷ്, നാഷണൽ കൗൺസിൽ അംഗം: ജിനോ

സൗത്ത് ഫ്‌ളോറിഡ റീജിയൻ

• ആർ.വി.പി: സുശീൽ, നാഷണൽ കൗൺസിൽ അംഗം: മോൾ മാത്യു, നാഷണൽ കൗൺസിൽ അംഗം: വിപിൻ വിൻസന്റ്

ജനറൽ ബോഡിയുടെ മാർഗനിർദേശങ്ങൾക്കും തീരുമാനത്തിനും അനുസൃതമായാണ് ഈ പുനഃസംഘടന നടപ്പാക്കുന്നത്. കൂടുതൽ ശക്തവും ഭൂമിശാസ്ത്രപരവുമായ പ്രാതിനിധ്യം ഉറപ്പാക്കുക, അംഗങ്ങളുടെ പങ്കാളിത്തം വർധിപ്പിക്കുക, ഫോമായയുടെ പ്രവർത്തനങ്ങളിൽ കൂടുതൽ അംഗങ്ങൾക്ക് സജീവമായി ഇടപെടുന്നതിനുള്ള അവസരങ്ങൾ സൃഷ്ടിക്കുക എന്നിവയാണ് ഈ പുനഃസംഘടനയുടെ സുപ്രധാന ലക്ഷ്യങ്ങൾ.

ഈ അധികാരപ്രാദേശിക പുനഃക്രമീകരണ നടപടികൾ പൂർത്തിയാക്കുന്നതിൽ സഹകരിക്കുകയും പിന്തുണ നൽകുകയും ചെയ്യുന്ന എല്ലാ നാഷണൽ കൗൺസിൽ അംഗങ്ങൾക്കും പ്രാദേശിക നേതാക്കൾക്കും ഫോമാ അംഗങ്ങൾക്കും ആത്മാർത്ഥമായ നന്ദി രേഖപ്പെടുത്തുന്നു.

ആശംസകളോടെ,

എക്‌സിക്യൂട്ടീവ് കമ്മിറ്റിക്കുവേണ്ടി

ബേബി മണക്കുന്നേൽ പ്രസിഡന്റ്, ഫോമാ

ശ്രീകുമാർ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്