സാഹിത്യകാരനായ ന്യായാധിപൻ എ എം ബഷീർ; എട്ടുമാസത്തിനിടെ വധശിക്ഷ വിധിച്ചത് നാലുപേർക്ക്

JANUARY 20, 2025, 6:25 AM

നെയ്യാറ്റിൻകര: പാറശാല ഷാരോൺ വധക്കേസ് പ്രതി ഗ്രീഷ്മയ്ക്ക് തൂക്കുകയർ വിധിച്ചത് നെയ്യാറ്റിൻകര ജില്ലാ അഡീഷണൽ സെഷൻ‌സ് കോടതി ജഡ്ജി എ എം ബഷീർ‌.

8 മാസത്തിനിടെ നാലാമത്തെ കുറ്റവാളിക്കാണ് ജ‍ഡ്ജി എ എം ബഷീർ വധശിക്ഷ വിധിക്കുന്നത്. 2024 മേയ് മാസത്തിൽ വിഴിഞ്ഞം മുല്ലൂർ ശാന്തകുമാരി വധക്കേസിലാണ് എ എം ബഷീർ ഇതിനുമുമ്പ് വധശിക്ഷ വിധിച്ചത്.

ഒരു സ്ത്രീയും മകനും അടക്കം മൂന്നുപേർക്കാണ് അന്ന് തൂക്കുകയർ വിധിച്ചത്. ഇപ്പോൾ ഗ്രീഷ്മ കൂടിയായതോടെ വധശിക്ഷ കാത്ത് കേരളത്തിലെ ജയിലിൽ കഴിയുന്ന രണ്ടു സ്ത്രീകൾക്കും ശിക്ഷ വിധിച്ചത് ഒരേ ജഡ്ജിയെന്ന പ്രത്യേകതയുമുണ്ട്.

ന്യായാധിപൻ എന്നതിനപ്പുറം സാഹിത്യകാരനെന്ന നിലയിലും പ്രശസ്തനാണ് എ എം ബഷീർ. നിരവധി നോവലുകളുടേയും കഥാ സമാഹാരങ്ങളുടെയും സഞ്ചാര സാഹിത്യ കൃതികളുടെയും രചയിതാവാണ്.

നോവലുകളായ തെമിസ്, ഉറുപ്പ, പച്ച മനുഷ്യൻ, റയട്ട് വിഡോസ്, കഥാസമാഹാരമായ ഒരു പോരാളി ജനിക്കുന്നു, സഞ്ചാര സാഹിത്യകൃതിയായ ജംറയും ഇദ്ദേഹത്തിൻറേതായുണ്ട്. ‘ജെ’ കേസ് എന്ന കേസ് സ്റ്റഡിയും പ്രസിദ്ധീകരിച്ചു. തൃശൂർ വടക്കാഞ്ചേരി സ്വദേശിയാണ്.