ഷിക്കാഗോയിൽ പോലീസ് ക്രമക്കേട് കേസുകൾക്ക് 260.8 മില്യൺ ഡോളർ നഷ്ടപരിഹാരം; 17 പേർക്ക് അനുകൂലമായി ചരിത്രപരമായ തീരുമാനം

NOVEMBER 4, 2026, 8:50 AM

ഷിക്കാഗോ: ചെയ്യാത്ത കൊലപാതകങ്ങളുടെ പേരിൽ പതിറ്റാണ്ടുകളോളം ജയിലിൽ കഴിയേണ്ടിവന്ന 17 പേർക്ക് 260.8 മില്യൺ ഡോളർ നഷ്ടപരിഹാരം നൽകാൻ ഷിക്കാഗോ സിറ്റി കൗൺസിൽ അനുമതി നൽകി. മുൻ ഷിക്കാഗോ പോലീസ് ഡിറ്റക്ടീവ് റെയ്‌നാൾഡോ ഗ്വെറ്റേയുടെ അന്വേഷണങ്ങളിലെ ഗുരുതര ക്രമക്കേടുകളുമായി ബന്ധപ്പെട്ട 16 കേസുകളിലാണ് ഈ ഒത്തുതീർപ്പ്.

2026 ഒക്ടോബർ 14നാണ് സിറ്റി കൗൺസിൽ നഷ്ടപരിഹാരത്തിന് അംഗീകാരം നൽകിയത്. 49 അംഗങ്ങൾ തീരുമാനത്തെ അനുകൂലിച്ചു. എതിർവോട്ടുകളൊന്നുമുണ്ടായിരുന്നില്ല. അമേരിക്കയിലെ ഏറ്റവും വലിയ പോലീസ് ക്രമക്കേട് നഷ്ടപരിഹാര ഒത്തുതീർപ്പുകളിൽ ഒന്നാണിത്.

1980കളിലും 1990കളിലും നടന്ന കൊലപാതക അന്വേഷണങ്ങളിലാണ് ഗ്വെറേറയ്‌ക്കെതിരെ ഗുരുതര ആരോപണങ്ങൾ ഉയർന്നത്. സാക്ഷികളെ ഭീഷണിപ്പെടുത്തുക, മൊഴികൾ മാറ്റിപ്പറയാൻ സമ്മർദം ചെലുത്തുക, തെറ്റായ പോലീസ് റിപ്പോർട്ടുകൾ തയ്യാറാക്കുക, നിരപരാധികളെ കുറ്റകൃത്യങ്ങളിൽ കുടുക്കുക തുടങ്ങിയ ആരോപണങ്ങളാണ് കേസുകളുടെ അടിസ്ഥാനം.

നഷ്ടപരിഹാരം ലഭിക്കുന്ന 17 പേരും ചേർന്ന് ഏകദേശം 383 വർഷമാണ് ജയിലിൽ കഴിഞ്ഞത്. അറസ്റ്റിലാകുമ്പോൾ ഇവർക്ക് 14 മുതൽ 28 വയസ്സുവരെയായിരുന്നു പ്രായം. പിന്നീട് ഇവർക്കെതിരായ കൊലപാതക ശിക്ഷാവിധികൾ കോടതികൾ റദ്ദാക്കി.

ഷിക്കാഗോ മേയർ ബ്രാൻഡൻ ജോൺസന്റെ ഭരണകൂടമാണ് ഒത്തുതീർപ്പ് മുന്നോട്ടുവച്ചത്. കേസുകൾ വിചാരണയിലേക്ക് നീങ്ങിയാൽ നഗരത്തിന് ഒരു ബില്യൺ ഡോളറിലധികം നഷ്ടപരിഹാരം നൽകേണ്ടിവന്നേക്കാമെന്ന് നിയമവിദഗ്ധർ മുന്നറിയിപ്പ് നൽകിയിരുന്നു.

2027 മുതൽ 2028 വരെയുള്ള രണ്ടുവർഷക്കാലത്ത് നാല് ഗഡുക്കളായി നഷ്ടപരിഹാരം നൽകാനാണ് തീരുമാനം. ഗ്വെറേറയുടെ അന്വേഷണങ്ങളുമായി ബന്ധപ്പെട്ട കേസുകളിൽ 43 പേരെ ഇതിനകം കുറ്റവിമുക്തരാക്കിയിട്ടുണ്ട്. എന്നാൽ കൂടുതൽ കേസുകളിൽ നിയമപോരാട്ടങ്ങൾ തുടരുകയാണ്.

തെറ്റായ അന്വേഷണങ്ങളിലൂടെ നിരപരാധികൾക്ക് നഷ്ടപ്പെട്ട ജീവിതവർഷങ്ങൾക്ക് പണംകൊണ്ട് പൂർണപരിഹാരം നൽകാനാവില്ലെങ്കിലും, നീതി നിഷേധിക്കപ്പെട്ടവർക്കുള്ള സുപ്രധാന അംഗീകാരമായാണ് തീരുമാനം വിലയിരുത്തപ്പെടുന്നത്. അതേസമയം, വൻ നഷ്ടപരിഹാരത്തുക ഷിക്കാഗോ നഗരത്തിന്റെ സാമ്പത്തിക സംവിധാനത്തിനും വലിയ ബാധ്യതയാകും.

അനിൽ മറ്റത്തിക്കുന്നേൽ