സ്ഥിരമായി ആറുമണിക്കൂറിൽ കുറവാണ് ഉറക്കമെങ്കിൽ ഹൃദ്രോഗസാധ്യത 48 ശതമാനമായും സ്ട്രോക്ക് ഉണ്ടാകാനുള്ള സാധ്യത 15 ശതമാനമായും ഉയരാം. ഹൃദയത്തെ സംരക്ഷിക്കുന്ന ഒരു പ്രധാന ഘടകമാണ് മതിയായ ഉറക്കം. മുതിർന്നവർക്ക് ഓരോ രാത്രിയും 7 മുതൽ 9 മണിക്കൂർ വരെ ഉറക്കം ആവശ്യമാണ്.

2022-ൽ അമേരിക്കൻ ഹാർട്ട് അസോസിയേഷൻ, ആരോഗ്യകരമായ ഹൃദയത്തിന് ആവശ്യമായ എട്ട് ഘടകങ്ങളിൽ ഒന്നായി ഉറക്കത്തെ ഉൾപ്പെടുത്തിയിട്ടുണ്ട്. മതിയായ ഉറക്കം ലഭിക്കുമ്പോൾ രക്തസമ്മർദം 10-20% വരെ കുറയുന്ന 'ഡിപ്പിങ്' എന്ന പ്രതിഭാസം ഉണ്ടാകുന്നു. പാരാസിംപതെറ്റിക് നാഡികളുടെ ഉത്തേജനമാണ് ഇതിന് കാരണം.

കൃത്യമായി ഉറക്കം ലഭിക്കാതെ വരുമ്പോൾ രക്തസമ്മർദം വർദ്ധിക്കുകയും ഇത് ഹൃദയാരോഗ്യത്തിന് വെല്ലുവിളിയാകുകയും ചെയ്യും. സ്ഥിരമായ ഉറക്കക്കുറവ് ശരീരത്തിൽ ദോഷകരമായ പല മാറ്റങ്ങൾക്കും വഴിയൊരുക്കും. ധമനികളിൽ വീക്കം ഉണ്ടാക്കുന്ന സൈറ്റോകൈനുകളുടെ അളവ് കൂടുന്നതും ഇതിൽപ്പെടുന്നു.

ഉറക്കമില്ലായ്മ വിശപ്പ് വർദ്ധിപ്പിക്കുന്ന ഗ്രലിൻ ഹോർമോണിന്റെ അളവ് കൂട്ടുകയും ലെപ്റ്റിൻ ഹോർമോണിന്റെ അളവ് കുറയ്ക്കുകയും ചെയ്യുന്നതിലൂടെ അമിതമായി ഭക്ഷണം കഴിക്കാൻ പ്രേരിപ്പിക്കുന്നു. ഇത് ശരീരഭാരം കൂടുന്നതിനും കാരണമാകും. കൂർക്കംവലിക്കുന്നതും ഉറക്കത്തിൽ ശ്വാസം കിട്ടാതെ ഞെട്ടിയുണരുന്നതുമായ ഒബ്സ്ട്രക്റ്റീവ് സ്ലീപ് അപ്നിയ (OSA) എന്ന അവസ്ഥ രക്തസമ്മർദം, ഹൃദയമിടിപ്പിലെ ക്രമക്കേടുകൾ എന്നിവയ്ക്ക് കാരണമാകും.

ഇടയ്ക്കിടെ മുറിഞ്ഞുപോകുന്ന ഉറക്കം സിംപതറ്റിക് നാഡികളെ ഉത്തേജിപ്പിക്കുകയും സ്ട്രെസ് ഹോർമോണുകളുടെ ഉത്പാദനം വർദ്ധിപ്പിക്കുകയും ചെയ്യും. ഇത് രക്തസമ്മർദവും ഹൃദയമിടിപ്പും കൂട്ടുന്നു. നിയന്ത്രിക്കപ്പെടാതെ ദീർഘകാലം നിലനിൽക്കുന്ന ഉയർന്ന രക്തസമ്മർദം ധമനികളുടെ ഉൾപാളികളിലെ കോശങ്ങൾക്ക് തകരാറുണ്ടാക്കും.

ഇത് ധമനീവീക്കത്തിനും എൽ.ഡി.എൽ. കൊളസ്ട്രോൾ ധമനീഭിത്തിയിൽ അടിഞ്ഞുകൂടുന്നതിനും കാരണമാകും. തുടർന്ന് പ്ലാക്കും രക്തക്കട്ടയും രൂപപ്പെട്ട് ഹൃദയാഘാതത്തിലേക്ക് നയിച്ചേക്കാം.

ദീർഘകാലം ഉയർന്ന രക്തസമ്മർദം നിയന്ത്രിക്കപ്പെടാതെയിരുന്നാൽ ഹൃദയഭിത്തികൾക്ക് കട്ടികൂടുകയും ഹൃദയത്തിന്റെ പ്രവർത്തനങ്ങൾക്ക് കൂടുതൽ ഓക്സിജൻ ആവശ്യമായി വരികയും ചെയ്യും.

ഉയർന്ന എൽ.ഡി.എൽ കൊളസ്ട്രോൾ, പ്രമേഹം, പുകവലി എന്നിവ കൂടിയാകുമ്പോൾ ഹൃദയാഘാതം, സ്ട്രോക്ക്, ഹൃദയസ്തംഭനം എന്നിവയുടെ സാധ്യത വർദ്ധിക്കുന്നു.

English Summary: Lack of adequate sleep, specifically less than six hours consistently, significantly increases the risk of heart disease by 48% and stroke by 15%. Good sleep is a vital lifestyle medicine for heart health, with adults needing 7-9 hours nightly. The American Heart Association recognized sleep as one of eight essential factors for cardiovascular health in 2022. Insufficient sleep elevates blood pressure and can lead to dangerous bodily changes, including increased inflammatory markers and hormones that stimulate overeating, contributing to weight gain. Conditions like obstructive sleep apnea further heighten risks for hypertension and irregular heart rhythms.

Tags: Malayalam News, News Malayalam, Latest Malayalam News, Vachakam News, Sleep, Heart Attack, Health, Heart Disease, Sleep Deprivation, Stroke Risk, Health Tips Malayalam

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്