ബീജിംഗ്: ഇറാന്റെ പരമോന്നത നേതാവ് അയത്തുള്ള അലി ഖമേനിയെ വധിച്ച യുഎസ്-ഇസ്രായേൽ നടപടി അംഗീകരിക്കാനാവില്ലെന്ന് ചൈന. ഒരു പരമാധികാര രാഷ്ട്രത്തിന്റെ നേതാവിനെ കൊലപ്പെടുത്തുന്നതും ഭരണം അട്ടിമറിക്കാൻ പ്രേരിപ്പിക്കുന്നതും അന്താരാഷ്ട്ര നിയമങ്ങളുടെ ലംഘനമാണെന്ന് ചൈനീസ് വിദേശകാര്യ മന്ത്രി വാങ് യി പറഞ്ഞു. മേഖലയിൽ കൂടുതൽ രക്തച്ചൊരിച്ചിൽ ഒഴിവാക്കാൻ അടിയന്തരമായി വെടിനിർത്തൽ പ്രഖ്യാപിക്കണമെന്നും ചൈന ആവശ്യപ്പെട്ടു.

റഷ്യൻ വിദേശകാര്യ മന്ത്രി സെർജി ലാവ്‌റോവുമായി നടത്തിയ ഫോൺ സംഭാഷണത്തിലാണ് വാങ് യി ചൈനയുടെ നിലപാട് വ്യക്തമാക്കിയത്. സൈനിക നടപടികൾ ഉടൻ അവസാനിപ്പിച്ച് ചർച്ചകളിലേക്ക് മടങ്ങണം. വാഷിംഗ്ടണിന്റെ സൈനിക ബലപ്രയോഗം ഐക്യരാഷ്ട്രസഭയുടെ ചാർട്ടറുകൾക്കും അന്താരാഷ്ട്ര മാനദണ്ഡങ്ങൾക്കും വിരുദ്ധമാണെന്ന് ചൈനീസ് ഔദ്യോഗിക വാർത്താ ഏജൻസിയായ സിൻഹുവ വിമർശിച്ചു.

സംഘർഷം കടുക്കുന്ന സാഹചര്യത്തിൽ ഇറാനിലും ഇസ്രായേലിലുമുള്ള തങ്ങളുടെ പൗരന്മാരോട് ഉടൻ രാജ്യം വിടാൻ ചൈന നിർദ്ദേശിച്ചു.അസർബൈജാൻ, അർമേനിയ, തുർക്കി, ഇറാഖ് എന്നീ നാല് കരമാർഗ്ഗങ്ങൾ വഴി എത്രയും വേഗം പുറത്തുകടക്കാൻ ആവശ്യപ്പെട്ടു.

ഈജിപ്തിലെ താബ അതിർത്തി വഴി മാറാനോ സുരക്ഷിത സ്ഥാനങ്ങളിലേക്ക് മാറാനോ എംബസി നിർദ്ദേശിച്ചു.മേഖലയിലുണ്ടായ ആക്രമണങ്ങളിൽ ചില ചൈനീസ് പൗരന്മാർക്ക് പരിക്കേറ്റതായും റിപ്പോർട്ടുകളുണ്ട്.

യുദ്ധസാഹചര്യം കണക്കിലെടുത്ത് ഹോങ്കോംഗ് ആസ്ഥാനമായുള്ള കാതേ ഗ്രൂപ്പ് (Cathay Group) മിഡിൽ ഈസ്റ്റിലേക്കുള്ള വിമാന സർവീസുകൾ ശനിയാഴ്ച മുതൽ നിർത്തിവെച്ചു. ദുബായ്, റിയാദ് എന്നിവിടങ്ങളിലേക്കുള്ള യാത്രക്കാരെയും ചരക്ക് നീക്കത്തെയും ഇത് ബാധിച്ചു. മറ്റ് പല പ്രമുഖ എയർലൈനുകളും തങ്ങളുടെ വിമാനങ്ങളുടെ പാത പുനർക്രമീകരിച്ചിരിക്കുകയാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്