പുതിയ തീരുവകള്‍ സാമ്പത്തിക വളര്‍ച്ച കുറച്ചേക്കാം: കാനഡയ്ക്ക് മുന്നറിയിപ്പുമായി സെന്‍ട്രല്‍ ബാങ്ക്

SEPTEMBER 21, 2026, 2:05 PM

ഒട്ടാവ: അമേരിക്കയുമായുള്ള തുടര്‍ച്ചയായ വ്യാപാര തര്‍ക്കങ്ങളും പശ്ചിമേഷ്യയിലെ രൂക്ഷമായ യുദ്ധസാഹചര്യങ്ങളും കാനഡയുടെ സാമ്പത്തിക രംഗത്തെ തിരിച്ചടിയിലാക്കുമെന്ന് ബാങ്ക് ഓഫ് കാനഡ ഗവര്‍ണര്‍ ടിഫ് മക്ലെം. നിലവിലെ തിരിച്ചടികള്‍ രാജ്യത്തിന്റെ നാലാം പാദത്തിലെ സാമ്പത്തിക വളര്‍ച്ച പകുതിയായി കുറയ്ക്കുമെന്നും അദ്ദേഹം ചൂണ്ടിക്കാട്ടി.

ഹാലിഫാക്‌സില്‍ നടത്തിയ പ്രസംഗത്തിലാണ് അന്താരാഷ്ട്രതലത്തിലെ ഭൗമരാഷ്ട്രീയ ഭിന്നതകളും വിതരണ ശൃംഖലയിലെ തടസ്സങ്ങളും സൃഷ്ടിക്കുന്ന ഭീഷണികളെക്കുറിച്ച് അദ്ദേഹം വ്യക്തമാക്കിയത്.

വ്യാപാര യുദ്ധം ആരംഭിച്ചതിന് ശേഷം പല ബിസിനസ്സുകളും പുതിയ തീരുവകളുമായി പൊരുത്തപ്പെട്ടു തുടങ്ങിയിരുന്നു. ഇതിന്റെ ഫലമായി 2026 ന്റെ രണ്ടാം പാദത്തില്‍ കാനഡയുടെ ഊര്‍ജ്ജ ഇതര കയറ്റുമതിയും ബിസിനസ്സ് നിക്ഷേപങ്ങളും ഗണ്യമായ വര്‍ദ്ധനവ് രേഖപ്പെടുത്തി. സാമ്പത്തിക രംഗം കൂടുതല്‍ കരുത്താര്‍ജ്ജിക്കുകയും കമ്പനികള്‍ പുതിയ അവസരങ്ങള്‍ ലക്ഷ്യമിടുകയും ചെയ്യുന്നതിനിടയിലാണ് വ്യാപാര ചര്‍ച്ചകളിലെ തിരിച്ചടിയും പശ്ചിമേഷ്യയിലെ പുതിയ സംഘര്‍ഷങ്ങളും വീണ്ടും അനിശ്ചിതത്വം സൃഷ്ടിച്ചിരിക്കുന്നത്.

യു.എസ് വ്യാപാര നയങ്ങളിലെ അസ്ഥിരത കനേഡിയന്‍ കമ്പനികളുടെ നിക്ഷേപങ്ങളെയും ജീവനക്കാരെ നിയമിക്കുന്നതിനെയും ബാധിച്ചേക്കാം. ഇതിനുപുറമെ പശ്ചിമേഷ്യയിലെ യുദ്ധം കാരണം ഇന്ധനവില വര്‍ദ്ധിക്കുന്നത് രാജ്യത്തെ പണപ്പെരുപ്പം മൂന്ന് ശതമാനത്തില്‍ തന്നെ ഉയര്‍ന്നുനില്‍ക്കാന്‍ കാരണമാകുന്നുണ്ട്. വിപണിയില്‍ എണ്ണവില വര്‍ദ്ധിച്ച് നില്‍ക്കുന്നത് പണപ്പെരുപ്പം കൂടുതല്‍ സാധനങ്ങളിലേക്ക് പടരാനുള്ള സാധ്യത വര്‍ദ്ധിപ്പിക്കുന്നു.

നിലവിലെ ഈ പ്രതിസന്ധി സാമ്പത്തിക വളര്‍ച്ച കുറയ്ക്കുന്നതോടൊപ്പം പണപ്പെരുപ്പം ഉയര്‍ത്തുകയും ചെയ്യുന്നു എന്നത് വലിയ വെല്ലുവിളിയാണ്. താരിഫുകളുടെ പ്രത്യാഘാതങ്ങള്‍ തടയാനോ ആഗോള ഇന്ധനവില നിയന്ത്രിക്കാനോ നാണയ നയങ്ങള്‍ക്ക് പരിധിയുണ്ടെങ്കിലും, പണപ്പെരുപ്പം ലക്ഷ്യമിട്ട രണ്ട് ശതമാനത്തില്‍ എത്തിക്കുക എന്നതിനാണ് സെന്‍ട്രല്‍ ബാങ്ക് മുന്‍ഗണന നല്‍കുന്നത്. സാഹചര്യങ്ങള്‍ മാറുന്നതിനനുസരിച്ച് സാമ്പത്തിക നയങ്ങളില്‍ ആവശ്യമായ മാറ്റങ്ങള്‍ വരുത്താന്‍ തയ്യാറാണെന്നും മക്ലെം കൂട്ടിച്ചേര്‍ത്തു.