ക്രിസ്തുരൂപം ദേഹത്ത് വീണ് വൈദികൻ മരിച്ചു; കുർബാന ലൈവായി പ്രക്ഷേപണം ചെയ്യുന്നതിനിടെ ദുരന്തം

OCTOBER 18, 2026, 7:38 PM

ഇക്വഡോറിലെ ഗുവായാക്വിലിൽ കുർബാന ലൈവായി പ്രക്ഷേപണം ചെയ്യുന്നതിനിടെ അൾത്താരയിലെ ക്രിസ്തുരൂപം ദേഹത്ത് വീണ് വൈദികൻ ഫാ. പാട്രീഷ്യോ ആൽഫ്രഡോ സാഞ്ചസ് മൊളിനാരി മരണപ്പെട്ടു. പെർപെച്ചുവോ സൊക്കോറോ പള്ളിയിലെ അൾത്താരയിൽ കുർബാനയ്ക്കായി ഒരുങ്ങുന്നതിനിടെയാണ് വലിയ മരത്തിൽ തീർത്ത ക്രിസ്തുരൂപം അദ്ദേഹത്തിന്റെ ദേഹത്തേക്ക് വീണത്. ശനിയാഴ്ചയാണ് സംഭവം നടന്നത്.

ശുശ്രൂഷയുടെ വീഡിയോ ദൃശ്യങ്ങളിൽ, പള്ളിയിൽ ആളുകൾ നിലവിളിക്കുന്നതും വൈദികന്റെ അടുത്തേക്ക് ഓടുന്നതും സഹായത്തിനായി വിളിക്കുന്നതും കാണാം. "ഫാദർ, ഫാദർ... ആംബുലൻസ് വിളിക്കൂ" എന്ന് ഒരു സ്ത്രീ വിളിച്ചുപറയുന്നതും വീഡിയോയിൽ കേൾക്കാം.

ഗുവായാക്വിൽ അതിരൂപത ഫേസ്ബുക്കിൽ പങ്കുവെച്ച കുറിപ്പിലൂടെ ഫാ. സാഞ്ചസ് മൊളിനാരിയുടെ മരണം സ്ഥിരീകരിച്ചു. "നമ്മുടെ പ്രിയപ്പെട്ട ഫാ. പാട്രീഷ്യോ ആൽഫ്രഡോ സാഞ്ചസ് മൊളിനാരി പിതാവിന്റെ ഭവനത്തിലേക്ക് പോയിരിക്കുന്നു," അതിരൂപത സ്പാനിഷിൽ കുറിച്ചു.

ഫാ. സാഞ്ചസ് മൊളിനാരിയുടെ പൗരോഹിത്യ വാർഷികത്തിൽ അതിരൂപത ആശംസകൾ അറിയിച്ച് ഒരു ദിവസത്തിന് ശേഷമാണ് ഈ ദുരന്തമുണ്ടായത്. റെഡെംപ്റ്ററിസ്റ്റ് സഭാംഗമായിരുന്നു അദ്ദേഹം.

ക്രിസ്തുരൂപം വീഴാനുള്ള കാരണം വ്യക്തമല്ല. സംഭവത്തെക്കുറിച്ച് പള്ളി അധികൃതർ ഇതുവരെ ഔദ്യോഗിക വിശദീകരണം നൽകിയിട്ടില്ല.

English Summary: A priest was fatally struck by a falling crucifix during a livestreamed Mass in Guayaquil, Ecuador. Father Patricio Alfredo Sanchez Molinari was preparing for Communion at the altar of Nuestra Señora del Perpetuo Socorro Church when a large wooden crucifix behind him suddenly fell. The incident was captured on video, showing worshippers rushing to his aid and calling for an ambulance. The Archdiocese of Guayaquil confirmed his death in a Facebook statement, noting the tragedy occurred just one day after his ordination anniversary.