വാഷിംഗ്ടണ്‍: ഹണ്ടര്‍ ബൈഡനുമായി ബന്ധപ്പെട്ട അന്വേഷണങ്ങളില്‍ യു.എസ് കോണ്‍ഗ്രസിന് മുന്‍പില്‍ തെറ്റായ മൊഴി നല്‍കിയെന്ന ആരോപണത്തില്‍ മുന്‍ എഫ്.ബി.ഐ ഉദ്യോഗസ്ഥര്‍ക്കെതിരെ ചുമത്തിയ ക്രിമിനല്‍ കേസ് ഫെഡറല്‍ കോടതി തള്ളി. ഡൊണാള്‍ഡ് ട്രംപ് ഭരണകൂടത്തിന് കീഴിലുള്ള നീതിന്യായ വകുപ്പ് നിയമ വ്യവസ്ഥയെ രാഷ്ട്രീയ ആയുധമാക്കുകയാണെന്ന് രൂക്ഷമായി വിമര്‍ശിച്ചുകൊണ്ടാണ് യു.എസ് മജിസ്ട്രേറ്റ് ജഡ്ജി സിയാ ഫറൂഖി നിര്‍ണ്ണായക ഉത്തരവ് പുറപ്പെടുവിച്ചത്.
മുന്‍ എഫ്.ബി.ഐ ഉദ്യോഗസ്ഥരായ നിക്കി കോള്‍ ഫ്‌ലോറിസ്, ബ്രാഡ്ലി ബെനവിഡസ് എന്നിവര്‍ക്കെതിരെയെടുത്ത നടപടികളാണ് കോടതി പൂര്‍ണ്ണമായി റദ്ദാക്കിയത്. പ്രസിഡന്റ് ഡൊണാള്‍ഡ് ട്രംപും എഫ്.ബി.ഐ ഡയറക്ടര്‍ കാഷ് പട്ടേലും ചേര്‍ന്നുള്ള തിടുക്കപ്പെട്ട തീരുമാനത്തിന്റെ ഭാഗമാണ് ഈ കേസ് എന്ന് വ്യക്തമാക്കിയ ജഡ്ജി, ഗവണ്‍മെന്റ് കേസ് കൈകാര്യം ചെയ്ത രീതിയെ വിചാരണവേളയില്‍ ശക്തമായി വിമര്‍ശിച്ചു.
സാധാരണ നടപടിക്രമമായ ഗ്രാന്‍ഡ് ജൂറി കുറ്റപത്രത്തിന് പകരം ക്രിമിനല്‍ പരാതിയിലൂടെ പ്രോസിക്യൂഷന് നീങ്ങിയ നടപടിയെ കോടതി രൂക്ഷമായ ഭാഷയില്‍ ചോദ്യം ചെയ്തു. ജുഡീഷ്യല്‍ അനുമതിയില്ലാതെ തടസ്സപ്പെടുത്തല്‍ കുറ്റങ്ങള്‍ അധികമായി ചേര്‍ക്കാന്‍ പ്രോസിക്യൂട്ടര്‍മാര്‍ ശ്രമിച്ചതിനെ തുടര്‍ന്ന്, തിരുത്തിയ പരാതി കോടതി റെക്കോര്‍ഡില്‍ നിന്ന് ജഡ്ജി നീക്കം ചെയ്യുകയായിരുന്നു. തെളിവുകളിലെ സുതാര്യതയില്ലായ്മയും ആരോപണങ്ങളിലെ പരസ്പര വിരുദ്ധതയും പ്രതിഭാഗം അഭിഭാഷകര്‍ വിചാരണ വേളയില്‍ തുറന്നുകാട്ടി.
2020 ലെ പ്രസിഡന്റ് തിരഞ്ഞെടുപ്പിന് മുന്നോടിയായി ഹണ്ടര്‍ ബൈഡന്റെ ലാപ്ടോപ്പുമായി ബന്ധപ്പെട്ട അന്വേഷണ വിവരങ്ങള്‍ മറച്ചുവെച്ചുവെന്നായിരുന്നു ഉദ്യോഗസ്ഥര്‍ക്കെതിരെ ആരോപിച്ചിരുന്നത്. വാഷിംഗ്ടണ്‍ ഫെഡറല്‍ കോടതിയില്‍ പ്രോസിക്യൂഷന് നടത്തുന്ന അധികാര ദുരുപയോഗങ്ങള്‍ക്കെതിരെയും അനാവശ്യമായ തടങ്കല്‍ നടപടികള്‍ക്കെതിരെയും മുന്‍പും കര്‍ശന നിലപാടുകള്‍ സ്വീകരിച്ചിട്ടുള്ള ന്യായാധിപനാണ് ജഡ്ജി സിയാ ഫറൂഖി.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
