വാഷിംഗ്ടണ്‍: പ്രസിഡന്റ് ഡൊണാള്‍ഡ് ട്രംപിന്റെ രണ്ടാം ഭരണകാലത്തെയും യു.എസ് കോണ്‍ഗ്രസിനെയും കുറിച്ച് അമേരിക്കന്‍ ജനത തങ്ങളുടെ കൃത്യമായ വിധി രേഖപ്പെടുത്തുന്ന 2026-ലെ ഇടക്കാല തിരഞ്ഞെടുപ്പില്‍ ഡെമോക്രാറ്റിക് പാര്‍ട്ടിക്ക് പ്രകടമായ മേല്‍ക്കൈ. ഹൗസ് ഓഫ് റെപ്രസെന്റേറ്റീവ്‌സിലെ മുഴുവന്‍ സീറ്റുകളിലേക്കും സെനറ്റിലെ മൂന്നിലൊന്ന് സീറ്റുകളിലേക്കും നടന്ന പോരാട്ടത്തില്‍ ജനങ്ങള്‍ ട്രംപിന്റെ നയങ്ങള്‍ക്കെതിരെ വോട്ട് ചെയ്തതിന്റെ പ്രാഥമിക സൂചനകളാണ് പുറത്തുവരുന്നത്. മൂന്ന് ഡസനോളം ഗവര്‍ണര്‍ പദവികളിലേക്കും ആയിരക്കണക്കിന് സംസ്ഥാന തല നിയമസഭാ കൗണ്‍സിലുകളിലേക്കും ഇതിനോടൊപ്പം വോട്ടെടുപ്പ് നടന്നു.
ഡെമോക്രാറ്റുകള്‍ക്ക് സെനറ്റിലെ ഭൂരിപക്ഷ പോരാട്ടത്തില്‍ വലിയ ഊര്‍ജ്ജം നല്‍കുന്നതായിരുന്നു നോര്‍ത്ത് കരോലിനയിലെ വിജയം. കഴിഞ്ഞ 20 വര്‍ഷമായി ഡെമോക്രാറ്റുകളെ അകറ്റിനിര്‍ത്തിയിരുന്ന നോര്‍ത്ത് കരോലിനയില്‍ മുന്‍ ഗവര്‍ണര്‍ റോയ് കൂപ്പര്‍ വന്‍ വിജയം നേടി. ട്രംപ് നേരിട്ട് പിന്തുണച്ച റിപ്പബ്ലിക്കന്‍ പാര്‍ട്ടി സ്ഥാനാര്‍ത്ഥിയും മുന്‍ ആര്‍.എന്‍.സി അധ്യക്ഷനുമായ മൈക്കിള്‍ വാറ്റ്ലിയെയാണ് കൂപ്പര്‍ പരാജയപ്പെടുത്തിയത്. വിരമിച്ച റിപ്പബ്ലിക്കന്‍ സെനറ്റര്‍ തോം ടില്ലിസിന്റെ സീറ്റിലേക്ക് നടന്ന പോരാട്ടത്തില്‍, വിലക്കയറ്റവും ജീവിതച്ചെലവും കുറയ്ക്കുമെന്ന വാഗ്ദാനവും മെഡിക്കെയ്ഡ് വിപുലീകരണത്തിലെ അദ്ദേഹത്തിന്റെ മുന്‍കാല പരിചയവുമാണ് കൂപ്പറിന് സ്വതന്ത്ര വോട്ടര്‍മാര്‍ക്കിടയില്‍ വലിയ ജനപ്രീതി നല്‍കിയത്.
മറ്റൊരു നിര്‍ണായക പോരാട്ടത്തില്‍, ന്യൂ ഹാംഷെയറിലെ സെനറ്റ് സീറ്റില്‍ ഡെമോക്രാറ്റിക് പ്രതിനിധി ക്രിസ് പാപ്പാസ് വിജയം കണ്ടു. റിപ്പബ്ലിക്കന്‍ സ്ഥാനാര്‍ത്ഥിയായ മുന്‍ സെനറ്റര്‍ ജോണ്‍ സുനുനുവിനെ പരാജയപ്പെടുത്തിയാണ് പാപ്പാസ് ഡെമോക്രാറ്റുകളുടെ പ്രധാനപ്പെട്ട ഈ സീറ്റ് സംരക്ഷിച്ചത്. അമേരിക്കയെ വേട്ടയാടുന്ന ഉയര്‍ന്ന ഊര്‍ജ്ജ പ്രതിസന്ധിക്കും ഇന്ധനവില വര്‍ദ്ധനവിനും ട്രംപ് തുടക്കമിട്ട ഇറാന്‍ യുദ്ധമാണ് കാരണമെന്ന് ആരോപിച്ചാണ് പാപ്പാസ് പ്രചാരണം നടത്തിയത്. കോടീശ്വരനായ ഇലോണ്‍ മസ്‌ക് പാപ്പാസിനെതിരെ ലക്ഷക്കണക്കിന് ഡോളര്‍ ചെലവഴിച്ച് പരസ്യ പ്രചാരണം നടത്തുകയും ട്രംപിന്റെ രാഷ്ട്രീയ സമിതിയായ 'മാഗ ഇന്‍ക്' 14 ദശലക്ഷത്തിലേറെ ഡോളര്‍ വിനിയോഗിക്കുകയും ചെയ്തിട്ടും പാപ്പാസിന്റെ വിജയം തടയാനായില്ല.
ജോര്‍ജിയയില്‍ ഡെമോക്രാറ്റിക് സെനറ്റര്‍ ജോണ്‍ ഓസോഫ് വന്‍ ഭൂരിപക്ഷത്തോടെ വീണ്ടും തിരഞ്ഞെടുക്കപ്പെടുകയും ചെയ്തു. ട്രംപ് പിന്തുണച്ച റിപ്പബ്ലിക്കന്‍ പ്രതിനിധി മൈക്ക് കോളിന്‍സിനെ വലിയ വോട്ട് വ്യത്യാസത്തിലാണ് ഓസോഫ് പരാജയപ്പെടുത്തിയത്. 2028-ലെ ഡെമോക്രാറ്റിക് പ്രസിഡന്റ് സ്ഥാനാര്‍ത്ഥിയാകാന്‍ സാധ്യതയുള്ള വ്യക്തിയായി വിലയിരുത്തപ്പെടുന്ന ഓസോഫ്, തന്റെ എതിരാളിയേക്കാള്‍ 126 ദശലക്ഷത്തിലധികം ഡോളര്‍ സമാഹരിച്ചാണ് അതിശക്തമായ തിരഞ്ഞെടുപ്പ് പ്രചാരണം നടത്തിയത്. ഇതോടൊപ്പം വിര്‍ജീനിയയില്‍ നിന്നുള്ള സെനറ്റര്‍ മാര്‍ക്ക് വാര്‍ണറും വിജയം ഉറപ്പിച്ചു.
തിരഞ്ഞെടുപ്പ് ഫലങ്ങള്‍ പുറത്തുവരുമ്പോള്‍ ട്രംപിന്റെ ജനപ്രീതി എക്കാലത്തെയും താഴ്ന്ന നിലവാരമായ 32 ശതമാനത്തില്‍ തുടരുകയാണ്. റോയിട്ടേഴ്‌സ്/ഇപ്‌സോസ് പുറത്തുവിട്ട പുതിയ സര്‍വേ പ്രകാരം വോട്ടര്‍മാര്‍ പൊതുവായി ഡെമോക്രാറ്റിക് പാര്‍ട്ടിക്കാണ് കൂടുതല്‍ മുന്‍ഗണന നല്‍കുന്നത്. ഇന്ധനവില വര്‍ദ്ധനവ്, ജീവിതച്ചെലവുകള്‍, ഇറാന്‍ യുദ്ധം എന്നിവ വോട്ടര്‍മാര്‍ക്കിടയില്‍ വലിയ അതൃപ്തി ഉണ്ടാക്കിയിട്ടുണ്ട്. ഇതോടെ തിരഞ്ഞെടുപ്പ് വാഗ്ദാനമായി ട്രംപ് മുന്നോട്ടുവെച്ച, മുതിര്‍ന്ന പൗരന്മാര്‍ക്ക് 5,000 ഡോളര്‍ നല്‍കുന്ന പദ്ധതിയെ ഡെമോക്രാറ്റുകളും ചില റിപ്പബ്ലിക്കന്‍മാരും വലിയ തോതില്‍ വിമര്‍ശിച്ചിരുന്നു. 1.2 ട്രില്യണ്‍ ഡോളര്‍ ചെലവ് വരുന്ന ഈ പദ്ധതി രാജ്യത്ത് പണപ്പെരുപ്പം കൂട്ടുമെന്ന് സാമ്പത്തിക വിദഗ്ദ്ധര്‍ മുന്നറിയിപ്പ് നല്‍കുന്നു.
ഈ തിരഞ്ഞെടുപ്പില്‍ കോര്‍പ്പറേറ്റ് സ്ഥാപനങ്ങളുടെയും ശതകോടീശ്വരന്മാരുടെയും സ്വാധീനം വന്‍തോതില്‍ പ്രകടമായിരുന്നു. ടെസ്ല, സ്‌പേസ് എക്‌സ് മേധാവി ഇലോണ്‍ മസ്‌ക് മാത്രം ജനപ്രതിനിധി സഭയിലെ റിപ്പബ്ലിക്കന്‍ ഭൂരിപക്ഷം നിലനിര്‍ത്താന്‍ ജൂലൈയ്ക്ക് ശേഷം 276 കോടി മില്യണ്‍ ഉള്‍പ്പെടെ ഈ തിരഞ്ഞെടുപ്പ് ഘട്ടത്തില്‍ ആകെ 366 മില്യണ്‍ ഡോളര്‍ ചെലവഴിച്ചു. രാഷ്ട്രീയ പ്രചാരണങ്ങള്‍ക്കായി കമ്പനികള്‍ ആകെ 737 മില്യണ്‍ ഡോളര്‍ ചെലവഴിച്ചതായി വാച്ച്‌ഡോഗ് ഗ്രൂപ്പായ പബ്ലിക് സിറ്റിസണ്‍ വ്യക്തമാക്കി. ഇതില്‍ പകുതിയിലധികവും ക്രിപ്റ്റോകറന്‍സി, ഓണ്‍ലൈന്‍ ബെറ്റിംഗ്, വന്‍കിട ടെക് കമ്പനികള്‍ എന്നിവരില്‍ നിന്നാണ് വന്നത്.
തിരഞ്ഞെടുപ്പ് ഫലങ്ങള്‍ തത്സമയം പുറത്തുവരുമ്പോള്‍ വാര്‍ത്താ മാധ്യമങ്ങളുടെ റിപ്പോര്‍ട്ടിംഗിനെതിരെയും പോളിംഗ് പ്രവചനങ്ങള്‍ക്കെതിരെയും ട്രംപ് കടുത്ത രോഷം പ്രകടിപ്പിച്ചു. അതേസമയം പ്രമുഖ കൗണ്ടികളിലും സംസ്ഥാനങ്ങളിലും റെക്കോര്‍ഡ് വോട്ടിംഗ് ശതമാനമാണ് രേഖപ്പെടുത്തിയത്. ടെക്‌സസിലെ ഹാരിസ് കൗണ്ടിയിലും സൗത്ത് കരോലിനയിലും വോട്ടര്‍മാരുടെ അഭൂതപൂര്‍വ്വമായ പങ്കാളിത്തം ദൃശ്യമായി. ഭൂരിപക്ഷം ഉറപ്പിക്കാന്‍ നാല് സെനറ്റ് സീറ്റുകളും മൂന്ന് ഹൗസ് സീറ്റുകളും അധികമായി നേടേണ്ട ഡെമോക്രാറ്റുകള്‍ വ്യക്തമായ പുരോഗതി രേഖപ്പെടുത്തുന്നുണ്ടെങ്കിലും കോണ്‍ഗ്രസിന്റെ അന്തിമ ഭൂരിപക്ഷം ആര്‍ക്കെന്ന് വോട്ടെണ്ണല്‍ പൂര്‍ത്തിയാകുന്നതോടെ വ്യക്തമാകും.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20261104021906.jpg)
-20261104021158.jpg)
