ഇന്ത്യൻ ഒളിമ്പിക് അസോസിയേഷൻ തിരഞ്ഞെടുപ്പിലെ തോൽവിയ്ക്ക് പിന്നാലെ പരാതിയുമായി ഉഷാ ക്യാമ്പ്

NOVEMBER 9, 2026, 11:00 PM

ദില്ലി: ഇന്ത്യൻ ഒളിമ്പിക് അസോസിയേഷൻ തെരഞ്ഞെടുപ്പുമായി ബന്ധപ്പെട്ട് പിടി ഉഷയും എതിർ വിഭാഗവും തമ്മിലുള്ള ഭിന്നത രൂക്ഷമാകുന്നു. തെരഞ്ഞെടുപ്പ് ഫലം അട്ടിമറിക്കപ്പെട്ടിട്ടുണ്ടോയെന്ന സംശയമാണ് ഉഷ ഉയർത്തുന്നത്.

തന്നെ പദവിയിൽ നിന്ന് പുറത്താക്കാൻ ആസൂത്രിത നീക്കങ്ങൾ നടന്നതായി ആരോപിച്ച പി.ടി. ഉഷ ക്യാമ്പ് ശക്തമായ പ്രതിഷേധത്തിലാണ്. വിഷയത്തിൽ പ്രധാനമന്ത്രിക്കും അന്താരാഷ്ട്ര ഒളിമ്പിക് കമ്മിറ്റിക്കും പരാതി നൽകുന്ന കാര്യം ഉഷ ക്യാമ്പിന്‍റെ പരിഗണനയിലുണ്ട്.

ഇന്ത്യൻ ഒളിമ്പിക് അസോസിയേഷൻ (ഐഒഎ) ഭരണസമിതി തിരഞ്ഞെടുപ്പിന് മുന്നോടിയായി നടന്ന സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിങ് മെറിറ്റ് (എസ്ഒഎം) വോട്ടെടുപ്പിൽ നിലവിലെ പ്രസിഡന്‍റ് പി.ടി. ഉഷയ്ക്ക് തോൽവിയായിരുന്നു ഫലം. വനിതാ വിഭാഗത്തിൽ മൂന്ന് വോട്ടിന് ഉഷ അഞ്ചാം സ്ഥാനത്തായി. വനിതാ വിഭാഗത്തിൽ മത്സരിച്ച ആറു പേരിൽ നിന്ന് ഏറ്റവും കൂടുതൽ വോട്ട് ലഭിച്ച നാല് പേരാണ് ഐഒഎ ജനറൽ കൗൺസിലിലേക്ക് തിരഞ്ഞെടുക്കപ്പെടുക. മലയാളി താരമായ അഞ്ജു ബോബി ജോർജ്, സൈന നെഹ്‌വാൾ, റാണി രാംപാൽ, ഡോള ബാനർജി എന്നിവരാണ് എസ്ഒഎം തെരഞ്ഞെടുപ്പില്‍ ഏറ്റവും കൂടുതല്‍ വോട്ട് നേടി ജനറല്‍ കൗണ്‍സിലെത്തിയത്. ഇതില്‍ അഞ്ജു ബോബി ജോർജ് ആണ് ഏറ്റവും കൂടുതൽ വോട്ടുകൾ നേടി ഒന്നാം സ്ഥാനത്തെത്തിയത്.

അതേസമയം പി.ടി. ഉഷയെ ഇന്ത്യൻ ഒളിമ്പിക് അസോസിയേഷനിൽ നിന്ന് പൂർണമായി മാറ്റിനിർത്താനുള്ള നീക്കങ്ങൾ വിവിധ കായിക സംഘടനകളുടെ ഭാഗത്തുനിന്ന് നടക്കുന്നതായാണ് സൂചന. ഐഒഎ ജനറൽ അസംബ്ലിയിൽ വിവിധ സംഘടനകളുടെ പ്രതിനിധിയായി ഉഷയെ അംഗീകരിക്കില്ലെന്ന വിവരവും പുറത്തുവരുന്നുണ്ട്.

അതേസമയം കായികതാരങ്ങളിൽ നിന്നാണ് ഒളിമ്പിക് അസോസിയേഷൻ പ്രസിഡന്‍റിനെ തിരഞ്ഞെടുക്കുന്നതെങ്കിൽ ഗഗൻ നാരംഗ്, സൈന നെഹ്‌വാൾ എന്നിവരുടെ പേരുകളാണ് നിലവിൽ പരിഗണനയിലുള്ളത്. അതോടൊപ്പം, മത്സരിക്കാൻ അത്ലറ്റിക്സ് ഫെഡറേഷൻ ഓഫ് ഇന്ത്യ ഉന്നതരിൽ നിന്ന് മലയാളി താരം അഞ്ജു ബോബി ജോർജിന് മേൽ ശക്തമായ സമ്മർദ്ദമുണ്ട്.