ഇടപാടുകൾ നടത്താൻ ലോകത്തിലെ ഏറ്റവും മോശം രാജ്യം; കാനഡയ്‌ക്കെതിരെ ആഞ്ഞടിച്ച് ട്രംപ്, കൂടുതൽ തീരുവ ഭീഷണി

AUGUST 24, 2026, 12:38 PM

അമേരിക്കയും കാനഡയും തമ്മിലുള്ള വ്യാപാര തർക്കം അതിരൂക്ഷമായ ഘട്ടത്തിലേക്ക് നീങ്ങുന്നു. കാനഡയുമായുള്ള വ്യാപാര ചർച്ചകൾ തടസ്സപ്പെട്ടതിന് പിന്നാലെ കടുത്ത ആരോപണങ്ങളുമായി അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. ഇടപാടുകൾ നടത്താൻ ലോകത്തിലെ ഏറ്റവും മോശം രാജ്യങ്ങളിലൊന്നാണ് കാനഡയെന്ന് ട്രംപ് പരസ്യമായി വിമർശിച്ചു.

കാനഡയിൽ നിന്നുള്ള ഉൽപ്പാദന ഉൽപന്നങ്ങൾക്ക് കൂടുതൽ നികുതിയും തീരുവയും ചുമത്തുമെന്നാണ് ട്രംപിന്റെ പുതിയ ഭീഷണി. കാറുകൾ, ട്രക്കുകൾ, ഓട്ടോമോട്ടീവ് ഭാഗങ്ങൾ, സ്റ്റീൽ എന്നിവയ്ക്ക് 50 ശതമാനം നികുതി വർദ്ധിപ്പിക്കുമെന്ന് ട്രംപ് വ്യക്തമാക്കി. അമേരിക്കൻ കാർഷിക ഉൽപന്നങ്ങൾക്ക് കാനഡ അമിത നികുതി ചുമത്തി വലിയ സാമ്പത്തിക നഷ്ടമുണ്ടാക്കുന്നുവെന്ന് അദ്ദേഹം ആരോപിച്ചു.

വർഷങ്ങളായി കാനഡ അമേരിക്കയെ ചൂഷണം ചെയ്യുകയാണെന്ന് ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമിലൂടെ കുറ്റപ്പെടുത്തി. അമേരിക്കൻ കർഷകരുടെ ജീവിതം കാനഡയുടെ നയങ്ങൾ കാരണം ദുസ്സഹമായിരിക്കുകയാണ്. ഇരുരാജ്യങ്ങളും തമ്മിൽ നിലനിൽക്കുന്ന 60 ശതകോടി ഡോളറിന്റെ വ്യാപാര കമ്മി ഇനിയും അംഗീകരിക്കാൻ കഴിയില്ലെന്ന് ട്രംപ് തുറന്നടിച്ചു.

അമേരിക്കയിൽ തന്നെ നിർമ്മാണ പ്രവർത്തനങ്ങൾ നടത്തിയാൽ എതെങ്കിലും തരത്തിലുള്ള നികുതി നൽകേണ്ടതില്ലെന്ന് ട്രംപ് ഓർമ്മിപ്പിച്ചു. കാനഡയ്ക്ക് അമേരിക്കയെ ആവശ്യമുണ്ടെങ്കിലും അമേരിക്കയ്ക്ക് കാനഡയുടെ ആവശ്യമില്ലെന്ന കടുത്ത നിലപാടിലാണ് അദ്ദേഹം. വ്യാപാര ചർച്ചകൾ വഴിമുട്ടിയതോടെ കാനഡ തങ്ങളുടെ ചർച്ചാ സംഘത്തെ വാഷിംഗ്ടണിൽ നിന്ന് തിരികെ വിളിച്ചിരുന്നു.

വാഷിംഗ്ടൺ മുന്നോട്ടുവെച്ച പുതിയ നിബന്ധനകൾ അന്യായമാണെന്ന് ചൂണ്ടിക്കാട്ടിയാണ് കനേഡിയൻ പ്രധാനമന്ത്രി മാർക്ക് കാർണി ചർച്ചകൾ നിർത്തിവെച്ചത്. അമേരിക്കയുടെ പുതിയ നികുതി ഭീഷണികൾക്ക് കാനഡയും ശക്തമായ തിരിച്ചടി നൽകുമെന്നാണ് കരുതുന്നത്. ക്രൂഡ് ഓയിൽ, എൽപിജി, വൈദ്യുതി തുടങ്ങിയ നിർണായക ഊർജ്ജ വിതരണങ്ങൾ അമേരിക്കയിലേക്ക് നൽകുന്നത് തടയുന്ന കാര്യം കാനഡയുടെ പരിഗണനയിലുണ്ട്.

വടക്കേ അമേരിക്കൻ ഭൂഖണ്ഡത്തിലെ രണ്ട് വൻശക്തികൾ തമ്മിലുള്ള അന്താരാഷ്ട്ര വ്യാപാര ബന്ധത്തിൽ വലിയ ആശങ്കയാണ് നിലവിലെ സാഹചര്യം സൃഷ്ടിച്ചിരിക്കുന്നത്. ട്രംപിന്റെ കടുത്ത നിലപാടുകൾ കാനഡയുടെ സാമ്പത്തിക മേഖലയെ പ്രതികൂലമായി ബാധിക്കാൻ സാധ്യതയേറെയാണ്. വിഷയം നയതന്ത്ര തലത്തിൽ ചർച്ച ചെയ്യാൻ പുതിയ ശ്രമങ്ങൾ ഉണ്ടാകുമോ എന്നാണ് ആഗോള സാമ്പത്തിക വിദഗ്ധർ ഉറ്റുനോക്കുന്നത്.

English Summary:

US President Donald Trump escalated the trade dispute with Canada calling it the worst nation to deal with and threatening a 50 percent tariff on cars steel and auto parts following the collapse of trade negotiations.

Tags:

Trump Canada Tariffs, US Canada Trade War, Donald Trump, Mark Carney, World News, International Trade Dispute, Trade War News, Malayalam News, News Malayalam, Latest Malayalam News, Vachakam News