കാനഡ-യുഎസ് വ്യാപാര കരാർ തകർന്നാൽ ലക്ഷക്കണക്കിന് പേർക്ക് ജോലി നഷ്ടമാകും; റിപ്പോർട്ട്

AUGUST 12, 2026, 11:09 PM

ഒട്ടാവ: കാനഡ-അമേരിക്ക-മെക്സിക്കോ സ്വതന്ത്ര വ്യാപാര കരാറായ CUSMA തകർന്നാൽ കാനഡയിൽ 1,02,000 തൊഴിലുകളും അമേരിക്കയിൽ 2,14,000 തൊഴിലുകളും നഷ്ടപ്പെടുമെന്ന് റിപ്പോർട്ട്. കനേഡിയൻ-അമേരിക്കൻ ബിസിനസ് കൗൺസിലാണ് മുന്നറിയിപ്പ് നൽകിയത്.

നിലവിലെ കരാർ പുതുക്കുന്നതിന് പകരം പുതിയ രീതിയിൽ പുനഃപരിശോധിക്കുമെന്ന് അമേരിക്ക ജൂലൈയിൽ വ്യക്തമാക്കിയിരുന്നു. ഇതോടെ വടക്കേ അമേരിക്കയിലെ വ്യാപാര രംഗത്ത് അനിശ്ചിതത്വം വർധിച്ചിട്ടുണ്ട്.

അതേസമയം, കനേഡിയൻ ഉൽപ്പന്നങ്ങൾക്ക് 50 ശതമാനം പുതിയ താരിഫ് ഏർപ്പെടുത്തുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചിട്ടുണ്ട്. ഓഗസ്റ്റ് 19 മുതൽ താരിഫ് പ്രാബല്യത്തിൽ വരുമെന്നാണ് പ്രഖ്യാപനം.

കരാർ വിജയകരമായി പുനഃചർച്ച ചെയ്ത് തുടരാനായാൽ 2027ൽ നിലവിലെ സാഹചര്യത്തെ അപേക്ഷിച്ച് അമേരിക്കയിൽ 1,37,000 അധിക തൊഴിലുകളും കാനഡയിൽ 98,000 അധിക തൊഴിലുകളും സൃഷ്ടിക്കപ്പെടുമെന്നാണ് റിപ്പോർട്ടിലെ വിലയിരുത്തൽ.

എന്നാൽ CUSMA തകർന്നാൽ കാനഡയിലും അമേരിക്കയിലും വലിയ തൊഴിൽ നഷ്ടമുണ്ടാകുമെന്ന് റിപ്പോർട്ട് മുന്നറിയിപ്പ് നൽകുന്നു.

വ്യാപാര രംഗത്ത് സ്ഥിരതയും വ്യക്തതയും ഉറപ്പാക്കേണ്ടത് ഇരുരാജ്യങ്ങളിലെയും വ്യവസായങ്ങളുടെ പ്രധാന ആവശ്യമാണെന്ന് കനേഡിയൻ-അമേരിക്കൻ ബിസിനസ് കൗൺസിൽ മേധാവി ബെത്ത് ബർക്ക് പറഞ്ഞു. ഇന്നെടുക്കുന്ന തീരുമാനങ്ങൾ പതിറ്റാണ്ടുകളോളം വടക്കേ അമേരിക്കയുടെ സാമ്പത്തിക മത്സരക്ഷമതയെ സ്വാധീനിക്കുമെന്നും അവർ വ്യക്തമാക്കി.

കാനഡയുടെ വ്യാപാര മന്ത്രി ഡൊമിനിക് ലെബ്ലാങ്കും ചീഫ് നെഗോഷിയേറ്റർ ജാനിസ് ഷാരറ്റും നിലവിൽ വാഷിങ്ടണിൽ യുഎസ് ട്രേഡ് റെപ്രസന്റേറ്റീവ് ജാമിസൺ ഗ്രീറുമായി ചർച്ചകൾ നടത്തുകയാണ്.

അമേരിക്കൻ മദ്യ ഉൽപ്പന്നങ്ങൾക്കെതിരായ കാനഡയുടെ നടപടികൾ, യുഎസ് വാഹനങ്ങൾക്കും വാഹന ഭാഗങ്ങൾക്കുമെതിരായ കനേഡിയൻ തിരിച്ചടി, അമേരിക്കൻ പാലുൽപ്പന്നങ്ങളുടെ ഇറക്കുമതിക്ക് കാനഡ ഏർപ്പെടുത്തിയ ക്വോട്ടകൾ എന്നിവയാണ് പുതിയ താരിഫിന് അമേരിക്ക ചൂണ്ടിക്കാട്ടുന്ന കാരണങ്ങൾ.