ഷിക്കാഗോയിൽ വീട്ടുടമകൾക്ക് നികുതിഭാരം; ചില പ്രദേശങ്ങളിൽ പ്രോപ്പർട്ടി ടാക്‌സ് വർധനവ് 133% വരെ

NOVEMBER 9, 2026, 10:08 PM

ഷിക്കാഗോ: അമേരിക്കയിലെ ഇല്ലിനോയ് സംസ്ഥാനത്തെ കുക്ക് കൗണ്ടിയിൽ വസ്തുനികുതി കുത്തനെ ഉയർന്നത് ആയിരക്കണക്കിന് വീട്ടുടമകളെ സാമ്പത്തിക പ്രതിസന്ധിയിലാക്കുന്നു. പ്രത്യേകിച്ച് ഷിക്കാഗോയുടെ വെസ്റ്റ്, സൗത്ത് പ്രദേശങ്ങളിലാണ് അസാധാരണമായ നികുതി വർധനവ് രേഖപ്പെടുത്തിയിരിക്കുന്നത്.

കുക്ക് കൗണ്ടി ട്രഷറർ മരിയ പാപ്പാസിന്റെ ഓഫീസ് 2025 നവംബർ 17ന് പുറത്തുവിട്ട റിപ്പോർട്ട് പ്രകാരം വെസ്റ്റ് ഗാർഫീൽഡ് പാർക്ക് പ്രദേശത്ത് വീടുകളുടെ മീഡിയൻ വസ്തുനികുതി 133 ശതമാനവും നോർത്ത് ലോൺഡേൽ 99 ശതമാനവും എംഗൽവുഡിൽ 82 ശതമാനവും വർധിച്ചു. ഈ കണക്കുകൾ 2024 നികുതി വർഷത്തെ, 2025ൽ ലഭിച്ച ബില്ലുകളുടേതാണ്.

വെസ്റ്റ് ഗാർഫീൽഡിൽ ഒരു സാധാരണ വീട്ടുടമയുടെ വാർഷിക നികുതിയിൽ ഏകദേശം 2,000 ഡോളറിന്റെയും നോർത്ത് ലോൺഡേലിൽ 1,900 ഡോളറിന്റെയും വർധനവാണ് രേഖപ്പെടുത്തിയത്. ഷിക്കാഗോ നഗരത്തിലാകെ വീടുകളുടെ മീഡിയൻ നികുതിബിൽ 16.7 ശതമാനം ഉയർന്നു. കഴിഞ്ഞ മുപ്പത് വർഷത്തിനിടയിലെ ഏറ്റവും വലിയ ശതമാന വർധനവാണിത്.

ഡൗൺടൗൺ ഷിക്കാഗോയിലെ വാണിജ്യ കെട്ടിടങ്ങളുടെ മൂല്യത്തകർച്ചയും ചില പ്രദേശങ്ങളിൽ വീടുകളുടെ വില ഉയർന്നതുമാണ് നികുതിഭാരത്തിന്റെ ഒരു വലിയ വിഹിതം സാധാരണ വീട്ടുടമകളിലേക്ക് മാറാൻ കാരണമായത്. വാണിജ്യ കെട്ടിടങ്ങളിൽനിന്നുള്ള നികുതിവരുമാനം കുറഞ്ഞതോടെ നഗരത്തിന്റെ മറ്റു ഭാഗങ്ങളിലെ താമസക്കാരുടെ മേൽ കൂടുതൽ ബാധ്യത വന്നതായി അധികൃതരുടെ വിശകലനം വ്യക്തമാക്കുന്നു.

കുറഞ്ഞ വരുമാനമുള്ള കുടുംബങ്ങളെയാണ് ഈ മാറ്റം കൂടുതൽ ബാധിച്ചിരിക്കുന്നത്. നികുതിവർധനവ് കാരണം ചില വീട്ടുടമകൾക്ക് ബില്ലുകൾ പൂർണമായി അടയ്ക്കാൻ കഴിയാത്ത സ്ഥിതിയുണ്ടായി. 2026 മാർച്ചിൽ പ്രസിദ്ധീകരിച്ച മറ്റൊരു ഔദ്യോഗിക പഠനത്തിൽ വെസ്റ്റ് ഗാർഫീൽഡ് പാർക്കിലെ വസ്തുനികുതി പിരിവിന്റെ നിരക്ക് 4.1 ശതമാന പോയിന്റ് കുറഞ്ഞതായി കണ്ടെത്തി.

അതേസമയം, 2026 ഓഗസ്റ്റിൽ പുറത്തുവന്ന ഏറ്റവും പുതിയ വാർഷിക കണക്കുകൾ പ്രകാരം കുക്ക് കൗണ്ടിയിലെ മൊത്തം വസ്തുനികുതി ബാധ്യത വീണ്ടും 743.8 മില്യൺ ഡോളർ ഉയർന്ന് 19.9 ബില്യൺ ഡോളറിലധികമായി. ഇത് മുൻവർഷത്തെ അപേക്ഷിച്ച് 3.9 ശതമാനം വർധനവാണ്.

തുടർച്ചയായ നികുതിവർധനവ് വീടുകളുടെ ഉടമസ്ഥാവകാശം നിലനിർത്തുന്നതിനും കുറഞ്ഞ വരുമാനമുള്ള കുടുംബങ്ങളുടെ സാമ്പത്തിക സുരക്ഷയ്ക്കും വെല്ലുവിളിയാകുന്നതായി ആശങ്ക ഉയരുന്നു. നികുതിബില്ലുകൾ പരിശോധിക്കാനും അർഹമായ നികുതിയിളവുകൾ ലഭിക്കുന്നുണ്ടെന്ന് ഉറപ്പുവരുത്താനും വസ്തുമൂല്യനിർണയത്തിൽ പിഴവുണ്ടെങ്കിൽ നിയമാനുസൃതമായി അപ്പീൽ നൽകാനും വീട്ടുടമകൾക്ക് അവസരമുണ്ട്.

അനിൽ മറ്റത്തിക്കുന്നേൽ