ഇന്ത്യൻ വംശജരായ എൻജിനീയർമാരുടെ വാർഷിക ഗാല നവംബർ 21ന് ഷിക്കാഗോയിൽ; ബോളിവുഡ് സംഗീതനിശയും പ്രമുഖരുടെ സാന്നിധ്യവും

NOVEMBER 11, 2026, 7:00 AM

ഷിക്കാഗോ: അമേരിക്കയിലെ ഇന്ത്യൻ വംശജരായ എൻജിനീയർമാരുടെയും സാങ്കേതികവിദഗ്ധരുടെയും കൂട്ടായ്മയായ അമേരിക്കൻ അസോസിയേഷൻ ഓഫ് എൻജിനീയേഴ്‌സ് ഓഫ് ഇന്ത്യൻ ഒറിജിൻ (എഎഇഐഒ) സംഘടിപ്പിക്കുന്ന വാർഷിക ഗാല നവംബർ 21 ശനിയാഴ്ച ഓക് ബ്രൂക്കിലെ മാരിയറ്റ് ഹോട്ടലിൽ നടക്കും. വൈകിട്ട് അഞ്ചുമുതൽ രാത്രി പത്തുവരെ നടക്കുന്ന ആഘോഷത്തിൽ സാങ്കേതിക ചർച്ചകൾ, ബിസിനസ് നെറ്റ്‌വർക്കിങ്, അത്താഴവിരുന്ന്, സ്‌കോളർഷിപ്പ് വിതരണം, ബോളിവുഡ് സംഗീതനിശ എന്നിവ ഉൾപ്പെടുത്തിയിട്ടുണ്ട്.

ഇല്ലിനോയി ഗവർണർ ജെ.ബി. പ്രിറ്റ്‌സ്‌കർ, മുൻ യുഎസ് കോൺഗ്രസ് അംഗങ്ങളായ മെലിസ ബീൻ, ഡാനിയൽ ബിസ്, ഇന്ത്യയുടെ കോൺസൽ ജനറൽ ഡോ. അനന്ത് പ്രകാശ്, ഇല്ലിനോയി സംസ്ഥാന ചീഫ് ഇൻഫർമേഷൻ ഓഫീസർ ഹാർദിക് ഭട്ട് തുടങ്ങിയ പ്രമുഖരെ ക്ഷണിതാക്കളായി സംഘാടകർ പ്രഖ്യാപിച്ചിട്ടുണ്ട്.

നിർമിതബുദ്ധി (എഐ) മേഖലയിലെ പുതിയ സാങ്കേതിക മുന്നേറ്റങ്ങൾ, എൻജിനീയറിങ് രംഗത്തെ സാധ്യതകൾ, വ്യവസായ സഹകരണം എന്നിവയെക്കുറിച്ചുള്ള ചർച്ചകളും പരിപാടിയുടെ ഭാഗമായിരിക്കും. ഇന്ത്യൻ വംശജരായഎൻജിനീയർമാർക്കും സംരംഭകർക്കും പരസ്പരം പരിചയപ്പെടാനും പുതിയ അവസരങ്ങൾ കണ്ടെത്താനുമുള്ള വേദിയായാണ് ഗാല സംഘടിപ്പിക്കുന്നത്. ആഘോഷത്തിന്റെ പ്രധാന ആകർഷണമായി ബോളിവുഡ് ഗായകരായ ഭാവന ചൗധരിയും നിമേഷ് നാഗറും അവതരിപ്പിക്കുന്ന സംഗീതനിശ അരങ്ങേറും. ഹിന്ദി ചലച്ചിത്ര ഗാനങ്ങളും ജനപ്രിയ സംഗീതാവതരണങ്ങളും ഉൾപ്പെടുന്ന പരിപാടി ആഘോഷങ്ങൾക്ക് മാറ്റുകൂട്ടും.

എഎഇഐഒ പ്രസിഡന്റ് ഗ്ലാഡ്‌സൺ വർഗീസിന്റെ നേതൃത്വത്തിലാണ് പരിപാടിയുടെ ഒരുക്കങ്ങൾ നടക്കുന്നത്. സംഘടനയുടെ ജീവകാരുണ്യ പ്രവർത്തനങ്ങൾക്കും വിദ്യാഭ്യാസ സംരംഭങ്ങൾക്കും പിന്തുണ നൽകുന്നതും ഗാലയുടെ ലക്ഷ്യങ്ങളിൽ ഒന്നാണ്. പ്രവേശനനിരക്ക് സാധാരണ സീറ്റുകൾക്ക് 75 ഡോളറും വിഐപി സീറ്റുകൾക്ക് 100 ഡോളറുമാണ്.

കൂടുതൽ വിവരങ്ങൾക്കും രജിസ്‌ട്രേഷനും 847-648- 3300 എന്ന നമ്പറിൽ ബന്ധപ്പെടാവുന്നതാണ്.

വേദി: ഗ്രാൻഡ് ബോൾറൂം, ഓക് ബ്രൂക്ക് മാരിയറ്റ് ഹോട്ടൽ, 1401 22nd Street, Oak Brook, Illinois.

അമേരിക്കയിലെ ഇന്ത്യൻ എൻജിനീയറിങ് സമൂഹത്തിന്റെ ഐക്യവും പ്രൊഫഷണൽ സഹകരണവും ശക്തിപ്പെടുത്തുന്നതിനൊപ്പം സാങ്കേതികവിദ്യയും കലയും ഒരുമിക്കുന്ന ആഘോഷമായിരിക്കും ഈ വർഷത്തെ എഎഇഐഒ വാർഷിക ഗാലയെന്ന് സംഘാടകർ പ്രതീക്ഷിക്കുന്നു.

അനിൽ മറ്റത്തിക്കുന്നേൽ