ചൈനയുടെ മിസൈൽ ഭീഷണിയെ തകർക്കാൻ തായ്‌വാന്റെ സ്ട്രോങ് ബോ ഷീൽഡ് വരുന്നു

AUGUST 24, 2026, 12:36 PM

ചൈനയുടെ വർദ്ധിച്ചുവരുന്ന സൈനിക ശക്തിയെയും മിസൈൽ ശേഷിയെയും പ്രതിരോധിക്കാൻ വമ്പൻ പ്രതിരോധ പദ്ധതിയുമായി തായ്‌വാൻ. രാജ്യത്തിന്റെ സുരക്ഷ ശക്തമാക്കുന്നതിനായി സ്ട്രോങ് ബോ എന്ന പുതിയ വ്യോമ പ്രതിരോധ മിസൈൽ സംവിധാനം വികസിപ്പിക്കാനാണ് തായ്‌വാൻ നീക്കം നടത്തുന്നത്. ഇതിനായി 36.1 ബില്യൺ തായ്‌വാൻ ഡോളറിന്റെ അനുബന്ധ ബജറ്റ് നിർദ്ദേശം പാർലമെന്റിൽ സമർപ്പിക്കാൻ തയ്യാറെടുക്കുകയാണ് പ്രതിരോധ മന്ത്രാലയം.

തായ്‌വാൻ നാഷണൽ ചാങ് ഷാൻ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്‌നോളജി വികസിപ്പിച്ചെടുത്ത ഈ മിസൈൽ പ്രതിരോധ സംവിധാനത്തിന് അന്തരീക്ഷത്തിൽ 70 കിലോമീറ്ററിലധികം ഉയരത്തിലുള്ള മിസൈലുകളെ വരെ കണ്ടെത്തി തകർക്കാനാകും. തായ്‌വാനെ ആക്രമിക്കാൻ ശേഷിയുള്ള ചൈനയുടെ ബാലസ്റ്റിക് മിസൈലുകളെ വഴിമധ്യേ വെച്ച് തന്നെ തകർത്തുകളയുകയാണ് ഈ സംവിധാനത്തിന്റെ പ്രധാന ലക്ഷ്യം. രണ്ട് സ്ട്രോങ് ബോ സിസ്റ്റങ്ങളും 128 ഇന്റർസെപ്റ്റർ മിസൈലുകളും നിർമ്മിക്കാനാണ് നിലവിൽ തായ്‌വാൻ പദ്ധതിയൊരുക്കുന്നത്.

തായ്‌വാൻ കടലിടുക്കിൽ ചൈനയുടെ കടന്നുകയറ്റവും യുദ്ധക്കപ്പലുകളുടെ നീക്കങ്ങളും ശക്തമായ സാഹചര്യത്തിലാണ് ഇത്തരമൊരു നടപടിക്ക് തായ്‌വാൻ വേഗത കൂട്ടിയത്. നിലവിലുള്ള പാട്രിയറ്റ്, ടിയാൻ കുങ് III പ്രതിരോധ സംവിധാനങ്ങൾക്ക് മുകളിലായി ഒരു ആകാശ സുരക്ഷാ കവചം തീർക്കാൻ സ്ട്രോങ് ബോ മിസൈലുകൾക്ക് സാധിക്കും. ആധുനിക എഇഎസ്എ റഡാർ സാങ്കേതികവിദ്യ ഉപയോഗിച്ച് പ്രവർത്തിക്കുന്നതിനാൽ ശത്രുരാജ്യത്തിന്റെ മിസൈലുകളെ വളരെ മുൻകൂട്ടി തന്നെ കണ്ടെത്താൻ ഇതിന് ശേഷിയുണ്ട്.

ചൈനീസ് പീപ്പിൾസ് ലിബറേഷൻ ആർമി തായ്‌വാനെ ലക്ഷ്യമിട്ട് നിരവധി ഹൈപ്പർസോണിക് മിസൈലുകളും ബാലിസ്റ്റിക് മിസൈലുകളും വിന്യസിച്ചിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. ഇതിനെ ചെറുക്കാൻ വിപുലമായ ഒരു മൾട്ടി ലെയർ മിസൈൽ ഡിഫൻസ് നെറ്റ്‌വർക്ക് കെട്ടിപ്പടുക്കുകയാണ് തായ്‌വാൻ ഭരണകൂടം. പുതിയ മിസൈൽ സംവിധാനം പൂർണ്ണ സജ്ജമാകുന്നതോടെ പ്രദേശത്തെ യുദ്ധ ഭീഷണിയിലും നയതന്ത്ര നിലപാടുകളിലും വലിയ മാറ്റങ്ങൾ ഉണ്ടാകുമെന്നാണ് പ്രതിരോധ വിദഗ്ദ്ധർ വിലയിരുത്തുന്നത്.

English Summary:

Taiwan is preparing to deploy its newly developed Strong Bow anti-ballistic missile defense system to counter China expanding missile capabilities and enhance its overall aerial defense network.

Tags:

Taiwan Defense, China Taiwan Tension, Strong Bow Missile System, Military News, International News, Taiwan Missile Shield, Malayalam News, News Malayalam, Latest Malayalam News, Vachakam News