അമ്മ വെള്ളത്തിൽ മുക്കി കുഞ്ഞുങ്ങളെ കൊലപ്പെടുത്തിയ സംഭവം: കൊലപാതക കാരണം വിശ്വാസയോഗ്യമല്ലെന്ന് പൊലിസ്

SEPTEMBER 30, 2026, 11:53 PM

പാലക്കാട്: പാലക്കാട് കൊഴിഞ്ഞാമ്പാറയിൽ രണ്ട് കുട്ടികളെ അമ്മ വെള്ളത്തിൽ മുക്കി കൊലപ്പെടുത്തിയ സംഭവത്തിൽ അമ്മയുടെ മൊഴി പുറത്ത്. അഞ്ചും മൂന്നും വയസുള്ള കുട്ടികളെയാണ് അമ്മ നിവേദ്യ വെള്ളത്തിൽ മുക്കി കൊലപ്പെടുത്തിയത്. ആദ്യം അഞ്ചുവയസുകാരി മകളെയാണ് വെള്ളത്തിൽ മുക്കി കൊലപ്പെടുത്തിയതെന്നാണ് നിവേദ്യയുടെ മൊഴി. അഞ്ച് വയസുകാരിയുടെ മരണം ഉറപ്പിച്ച ശേഷം ഇളയ കുട്ടിയെ കൊലപ്പെടുത്തിയെന്നാണ് യുവതി ചോദ്യം ചെയ്യലിൽ പറഞ്ഞത്. വെള്ളത്തിൽ തള്ളിയിട്ട് മുതുകിൽ പിടിച്ച് മുക്കി കൊലപ്പെടുത്തുകയായിരുന്നുവെന്ന് യുവതി മൊഴി നൽകിയിട്ടുണ്ട്.

സ്വതന്ത്ര ജീവിതത്തിന് കുട്ടികൾ തടസമായതിനാൽ കൊലപ്പെടുത്തിയെന്നാണ് യുവതിയുടെ മൊഴി.

സംഭവത്തിൽ കൂടുതൽ പേർക്ക് പങ്കുണ്ടോയെന്നാണ് ഇപ്പോൾ സംശയം നിലനിൽക്കുന്നത്. ചൊവ്വാഴ്ച രാവിലെയാണ് മേനോൻപാറ മണൽകാട് ജോൺ കുമാറിൻറെ മക്കളായ അഞ്ച് വയസുള്ള ജെന്നിഫർ ജൂലിയേറ്റ്, മൂന്ന് വയസുള്ള റോബിൻ ക്രിസ്റ്റോഫർ എന്നിവരെ വീട്ടിലെ കുളിമുറിയിലെ വെള്ള തൊട്ടിയിൽ മരിച്ച നിലയിൽ കണ്ടെത്തിയത്.

പ്രതി നിവേദ്യ മാത്രമാണ് ആ സമയത്ത് വീട്ടിലുണ്ടായിരുന്നത്. ചെറിയ ടാങ്ക് ആയതിനാൽ അഞ്ച് വയസുകാരി മുങ്ങി മരിക്കാനുള്ള സാധ്യത കുറവായിരുന്നു. ഈ സംശയമാണ് അമ്മയെ ചോദ്യംചെയ്യാനുള്ള നീക്കത്തിലേക്ക് പൊലിസിനെ നയിച്ചത്.

സംഭവത്തിൽ ദുരൂഹത നിലനിൽക്കുന്നതിനാൽ യുവതിയെ കൂടുതൽ ചോദ്യം ചെയ്യും.

കൊലപാതക കാരണം വിശ്വാസയോഗ്യമല്ലെന്ന് പൊലിസ് അറിയിച്ചു.പുറത്ത് നിന്ന് സഹായം കിട്ടിയോ എന്നാണ് പൊലിസ് സംശയിക്കുന്നത്.