തുടർക്കഥയാകുന്നുവോ? ദേശീയപാത 66 ൽ വീണ്ടും അപകടം

SEPTEMBER 15, 2026, 12:38 AM

തൃശൂർ: സംസ്ഥാനത്ത് നിർമാണം പുരോഗമിക്കുന്ന ദേശീയ പാത 66 ലെ വർധിച്ചു വരുന്ന അപകടങ്ങൾ കുറയ്ക്കാൻ ദേശീയ പാതാ അതോറിറ്റിയുടെ അടിയന്തര ഇടപെടലുണ്ടാകുമെന്ന് അധികൃതരുടെ ഉറപ്പ് ലഭിച്ചിരുന്നു.

കഴിഞ്ഞ 15 ദിവസത്തിനിടയിൽ നാല് അപകടങ്ങളും ഏറ്റവും ഒടുവിൽ കയ്‌പ്പമംഗലത്തുണ്ടായ അപകടത്തിൽ എട്ട് തമിഴ്‌നാട് സ്വദേശികളായ വിദ്യാർഥികൾ മരിച്ച സംഭവങ്ങളും മലയാളികൾ കണ്ടതാണ്.

എന്നാൽ വീണ്ടും അപകടങ്ങൾ ഇവിടെ തുടർക്കഥയാകുകയാണ്. നാട്ടികയിൽ കേടായി നിർത്തിയിട്ടിരുന്ന തടി ലോറിയുടെ പിന്നിൽ ടാങ്കർ ലോറി ഇടിച്ചുകയറിയാണ് ഇന്ന് പുലര്‌ച്ചെ അപകടമുണ്ടായത്.

അപകടത്തിൽ ടാങ്കർ ലോറി ഡ്രൈവർക്ക് ഗുരുതര പരിക്കേറ്റിട്ടുണ്ട്. കണ്ണൂർ സ്വദേശി സിദ്ദിഖിന്റെ കാലിനാണ് ഗുരുതരമായി പരിക്കേറ്റത്. ഇന്ന് പുലർച്ചെ രണ്ട് മണിയോടെ നാട്ടിക സെന്ററിന് സമീപമായിരുന്നു അപകടമുണ്ടായത്.