വികസിച്ചുകൊണ്ടിരിക്കുന്ന 2026-ലെ എൽ നിനോ പ്രതിഭാസം 1997 ഒക്ടോബറിലെ ശക്തമായ എൽ നിനോയുമായി സമാനമാണെന്ന് നാസയുടെ ഏറ്റവും പുതിയ ഭൂപടങ്ങൾ വ്യക്തമാക്കുന്നു. ആഗോളതലത്തിൽ 5.7 ട്രില്യൺ ഡോളറിന്റെ സാമ്പത്തിക നഷ്ടത്തിന് കാരണമായ സംഭവമായിരുന്നു 1997-ലെ എൽ നിനോ. നിലവിലെ എൽ നിനോ 1997-ലെ പ്രതിഭാസത്തെ മറികടക്കാനുള്ള സാധ്യതയുണ്ടെന്ന് നാസയിലെ ഓഷ്യാനോഗ്രാഫർ ജോഷ് വില്ലിസ് സൂചിപ്പിക്കുന്നു.
സാധാരണയിലും കൂടുതൽ ചൂടായിരിക്കും എൽ നിനോ സമയത്ത് മധ്യ, കിഴക്കൻ ഉഷ്ണമേഖലാ പസഫിക് സമുദ്രത്തിന്റെ ഉപരിതലം. എല്ലാ രണ്ടോ ഏഴോ വർഷം കൂടുമ്പോൾ ഈ പ്രതിഭാസം സ്വാഭാവികമായി തിരിച്ചെത്താറുണ്ട്. 2026 ജനുവരിയിൽ, പടിഞ്ഞാറൻ പസഫിക്കിലെ മൈക്രോനേഷ്യക്കടുത്ത് കെൽവിൻ തരംഗം എന്നറിയപ്പെടുന്ന ചൂടുവെള്ളത്തിന്റെ ഒരു തള്ളിച്ച ഉപഗ്രഹങ്ങൾ കണ്ടെത്തിയിരുന്നു.
ഏപ്രിൽ ആദ്യത്തോടെ ഈ കെൽവിൻ തരംഗങ്ങൾ കിഴക്കൻ പസഫിക്കിൽ എത്തുകയും അവിടുത്തെ ഉപരിതല താപനില ഉയരാൻ തുടങ്ങുകയും ചെയ്തു. ചില പ്രദേശങ്ങളിൽ സമുദ്രനിരപ്പ് 1 മുതൽ 1.3 അടി (30 മുതൽ 40 സെന്റീമീറ്റർ) വരെ ഉയർന്നു. എന്നാൽ, ഇന്തോനേഷ്യയിലും വടക്കൻ ഓസ്ട്രേലിയയിലും സമുദ്രനിരപ്പ് സാധാരണ നിലയേക്കാൾ ആറ് മുതൽ എട്ട് ഇഞ്ച് (15 മുതൽ 20 സെന്റീമീറ്റർ) വരെ താഴുകയും ചെയ്തു.
എൽ നിനോ പ്രതിഭാസം ഇത്തവണ എങ്ങനെയാണ് വികസിക്കുന്നതെന്ന് മനസ്സിലാക്കാൻ നാസയിലെ ശാസ്ത്രജ്ഞർ സാറ്റലൈറ്റ് അൾട്ടിമെട്രി ഉപയോഗിക്കുന്നുണ്ട്. 1997-ലെയും 2026-ലെയും ഉപഗ്രഹ വിവരങ്ങൾ നാസ താരതമ്യം ചെയ്തു. 1997-ലെ ടോപെക്സ്/പോസിഡോൺ ഉപഗ്രഹത്തിൽ നിന്നുള്ള അളവുകളും ഏറ്റവും പുതിയ സെന്റിനൽ-6 മൈക്കിൾ ഫ്രെയ്ലിച്ച് ഉപഗ്രഹത്തിൽ നിന്നുള്ള നിരീക്ഷണങ്ങളും ഇവർ പരിശോധിച്ചു.
രണ്ട് ഭൂപടങ്ങളിലും മധ്യ, കിഴക്കൻ ഭൂമധ്യരേഖാ പസഫിക്കിൽ നിന്ന് തെക്കേ അമേരിക്കയിലേക്ക് വ്യാപിക്കുന്ന അസാധാരണമായി ഉയർന്ന സമുദ്രനിരപ്പാണ് കാണിക്കുന്നത്. തുടർച്ചയായ ദൗത്യങ്ങളിലൂടെ ശേഖരിച്ച ഏകദേശം 35 വർഷത്തെ ഉപഗ്രഹ നിരീക്ഷണങ്ങൾ നാസയ്ക്ക് ലഭ്യമാണ്. 1997-ലെ പ്രതിഭാസത്തെക്കാൾ പെട്ടന്നാണ് നിലവിലെ എൽ നിനോ വികസിച്ചതെന്ന് നാസ ഓഷ്യാനോഗ്രാഫർ ജോഷ് വില്ലിസ് പറയുന്നു.
നാസയുടെ ജെറ്റ് പ്രൊപ്പൽഷൻ ലബോറട്ടറിയിലെ സീ-ലെവൽ മിഷനുകളിൽ പ്രവർത്തിക്കുന്ന ജോഷ് വില്ലിസ്, വികസിച്ചുകൊണ്ടിരിക്കുന്ന ഈ പ്രതിഭാസം 1997-ലെതിനേക്കാൾ വലുതാകുമെന്നാണ് വിശ്വസിക്കുന്നത്. ലോകത്തിലെ കാലാവസ്ഥാ പാറ്റേണുകളെ സ്വാധീനിക്കാനുള്ള കഴിവ് എൽ നിനോയ്ക്കുണ്ട്. സാധാരണയായി ദുർബലമായ മൺസൂൺ മഴയുമായി ഇത് ബന്ധപ്പെട്ടിരിക്കുന്നു.
2027-ന്റെ ആദ്യ മൂന്ന് മാസങ്ങളിൽ ശക്തമായ എൽ നിനോ സാഹചര്യങ്ങൾക്ക് 83% സാധ്യതയുണ്ടെന്നാണ് NOAA-യുടെ ഒക്ടോബർ പ്രവചനം വ്യക്തമാക്കുന്നത്.
English Summary: NASA maps indicate the 2026 El Nino resembles the powerful 1997 event which caused 5.7 trillion dollars in global economic losses. NASA oceanographer Josh Willis suggests the current El Nino is on track to surpass the 1997 episode. NOAA predicts an 83 percent chance of strong to very strong El Nino conditions in early 2027. Satellite data from 1997 and 2026 show unusually high sea levels across the central and eastern equatorial Pacific, with sea levels swelling 1 to 1.3 feet in some areas due to warm water expansion.
Tags: Malayalam News, News Malayalam, Latest Malayalam News, Vachakam News, El Nino, NASA, NOAA, Climate Change, Weather, Pacific Ocean
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
