ഹൂസ്റ്റൺ: ഹൂസ്റ്റണിലെ 20 ഇടവകകളുടെ സംയുക്ത കൂട്ടായ്മയായ ഇന്ത്യൻ ക്രിസ്ത്യൻ എക്യുമെനിക്കൽ കമ്മ്യൂണിറ്റി ഓഫ് ഹൂസ്റ്റൺ (ICECH) സംഘടിപ്പിക്കുന്ന പ്രഥമ എക്യുമെനിക്കൽ ഫെസ്റ്റിന്റെ ഒരുക്കങ്ങൾ പുരോഗമിക്കുന്നു. ഇന്ത്യൻ ക്രൈസ്തവ സമൂഹത്തിന്റെ ഐക്യവും സൗഹൃദവും സാംസ്‌കാരിക വൈവിധ്യവും ആഘോഷിക്കുന്ന ഈ മഹോത്സവം സെപ്തംബർ 12 ശനിയാഴ്ച ഫ്രെസ്‌നോയിലെ സെന്റ് ജെയിംസ് ബാങ്ക്വറ്റ് ഹാളിൽ നടക്കും.

വൈകുന്നേരം 5 മുതൽ രാത്രി 9 വരെയാണ് ഫെസ്റ്റ്. വിവിധ ഇടവകകളിൽ നിന്നുള്ള കലാസാംസ്‌കാരിക പരിപാടികൾ ഫെസ്റ്റിന്റെ പ്രധാന ആകർഷണങ്ങളായിരിക്കും. വിവിധ സഭകളുടെ കലാപാരമ്പര്യവും സാംസ്‌കാരിക വൈവിധ്യവും പ്രതിഫലിപ്പിക്കുന്ന പരിപാടികൾ അവതരിപ്പിക്കുന്നതിനായി ഇടവകകളിലെ ടീമുകൾ ഇതിനോടകം തയ്യാറെടുപ്പുകൾ ആരംഭിച്ചിട്ടുണ്ട്.

ഫെസ്റ്റിന്റെ പ്രത്യേക ആകർഷണമായി ഹൂസ്റ്റണിലെ പ്രമുഖ കലാകാരനായ മെവിൻ ജോൺ എബ്രഹാം രചനയും സംവിധാനവും നിർവഹിക്കുന്ന 'ദി റെഡീമർ' എന്ന ബൈബിൾ ലഘുനാടകം (മലയാളം)  അരങ്ങേറും. ക്രിസ്തീയ സന്ദേശവും കലാമികവും സമന്വയിപ്പിക്കുന്ന ഈ അവതരണം പ്രേക്ഷകർക്ക് വേറിട്ട അനുഭവമാകുമെന്നാണ് സംഘാടകരുടെ പ്രതീക്ഷ.

നാടകത്തിൽ അണിനിരക്കുന്ന 40ൽ പരം കലാപ്രതിഭകൾ അവരുടെ അഭിനയ മികവ് പ്രകടിപ്പിക്കും

മിസ്സോറി സിറ്റി മേയർ റോബിൻ ഇലക്കാട്ട് ഫെസ്റ്റ് ഉദ്ഘാടനം ചെയ്യും. സ്റ്റാഫോർഡ് സിറ്റി മേയർ കെൻ മാത്യു, ഡിസ്ട്രിക്ട് കോർട്ട് ജഡ്ജി സുരേന്ദ്രൻ കെ. പട്ടേൽ, ജഡ്ജി ജൂലി മാത്യു, ക്യാപ്ടൻ മനു പൂപ്പാറയിൽ തുടങ്ങി സാമൂഹിക, സാംസ്‌കാരിക രംഗങ്ങളിലെ പ്രമുഖരും വൈദിക ശ്രേഷ്ഠരും ചടങ്ങിൽ പങ്കെടുക്കും.

എക്യുമെനിക്കൽ 'തട്ടുകട'യും 'ചായക്കട'യും

കലാപരിപാടികൾക്കൊപ്പം രുചിയുടെ വൈവിധ്യവും ഫെസ്റ്റിന്റെ പ്രധാന ആകർഷണമായിരിക്കും. ഇതിന്റെ ഭാഗമായി എക്യുമെനിക്കൽ അടുക്കളയും 'തട്ടുകട'യും ഒരുക്കിയിട്ടുണ്ട്. കേരളത്തിന്റെ തനത് രുചികൾ ഉൾപ്പെടെ വൈവിധ്യമാർന്ന ഇന്ത്യൻ വിഭവങ്ങളാണ് സന്ദർശകർക്കായി തയ്യാറാക്കുന്നത്.

കപ്പയും മീൻകറിയും, മലബാർ പൊറോട്ടയും ബീഫ് കറിയും, മസാല ദോശയും ഉൾപ്പെടെയുള്ള വിഭവങ്ങൾ തട്ടുകടയിൽ ലഭ്യമാകും. കൂടാതെ ചായയും കടിയും  കടികളും ലഭിക്കുന്ന 'ചായക്കട'യും ഫെസ്റ്റിന് നാടൻ രുചിയുടെ വേറിട്ട അനുഭവം നൽകും.

ഹൂസ്റ്റണിലെ പാചക രംഗത്ത് ഏറെ പരിചയസമ്പത്തുള്ള മൈസൂർ തമ്പി എക്യുമെനിക്കൽ അടുക്കളയുടെ മേൽനോട്ടം വഹിക്കും. ഫെസ്റ്റിൽ പങ്കെടുക്കുന്നവർക്കായി $15, $10 നിരക്കുകളിലുള്ള ഭക്ഷണ കൂപ്പണുകൾ ബന്ധപ്പെട്ട ഇടവകകളിലെ ICECH പ്രതിനിധികളിൽ നിന്നും ലഭിക്കുന്നതാണ്.

ആത്മീയതയും ഇന്ത്യൻ പാരമ്പര്യവും സാംസ്‌കാരിക വൈവിധ്യവും സൗഹൃദവും ഒരുമയും ആഘോഷിക്കുന്ന ഈ മഹോത്സവത്തിലേക്ക് ഹൂസ്റ്റണിലെ മുഴുവൻ മലയാളി സമൂഹത്തെയും സംഘാടകർ സ്‌നേഹപൂർവം സ്വാഗതം ചെയ്തു. ഫെസ്റ്റിന്റെ വിജയത്തിനായി കഇഋഇഒ കമ്മിറ്റിയും എക്യുമെനിക്കൽ ഫെസ്റ്റ് കമ്മിറ്റിയും വിവിധ പ്രവർത്തനങ്ങളുമായി സജീവമായി മുന്നോട്ടുപോകുകയാണ്.

കൂടുതൽ വിവരങ്ങൾക്ക്: റവ. ഫാ. ഡോ. ഐസക് ബി. പ്രകാശ് (പ്രസിഡന്റ്): 832-997-9788, റവ.ഫാ. ഡോ.ബിന്നി ഫിലിപ്പ് (വൈസ് പ്രസിഡന്റ്) 281-886-2013, ഷാജൻ ജോർജ് (സെക്രട്ടറി): 832-452-4195, രാജൻ അങ്ങാടിയിൽ (ട്രഷറർ): 713-459-4704, ജീമോൻ റാന്നി (ഫെസ്റ്റ് കൺവീനർ): 832-873-0023, മിൽറ്റ മാത്യു (പ്രോഗ്രാം കോർഡിനേറ്റർ): 832-744-9691.

ജീമോൻ റാന്നി, ഫെസ്റ്റ് കൺവീനർ & പിആർഓ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്