മുഖ്യമന്ത്രി സ്ഥാനത്തേക്ക് ഇനി മത്സരിക്കാനില്ലെന്ന് ഹരീഷ് റാവത്ത്

NOVEMBER 12, 2026, 2:06 AM

ഉത്തരാഖണ്ഡിൽ 2027-ൽ നടക്കുന്ന നിയമസഭാ തിരഞ്ഞെടുപ്പിൽ കോൺഗ്രസിനെ അധികാരത്തിൽ എത്തിക്കുക മാത്രമാണ് തന്റെ ലക്ഷ്യമെന്നും, താൻ ഇനി മുഖ്യമന്ത്രി സ്ഥാനത്തേക്ക് മത്സരത്തിനില്ലെന്നും മുൻ മുഖ്യമന്ത്രി ഹരീഷ് റാവത്ത്. പ്രസ് ട്രസ്റ്റ് ഓഫ് ഇന്ത്യയാണ് ഈ വാർത്ത റിപ്പോർട്ട് ചെയ്തത്.

സംസ്ഥാനവ്യാപകമായി കോൺഗ്രസ് പ്രചാരണ പരിപാടികൾ സംഘടിപ്പിക്കുന്നതിനിടയിലാണ് അദ്ദേഹം ഇക്കാര്യം വ്യക്തമാക്കിയത്. പാർട്ടി കേവല ഭൂരിപക്ഷം നേടിയാൽ മുഖ്യമന്ത്രി പദത്തിനോ മറ്റ് ഔദ്യോഗിക പദവികൾക്കോ താൻ ഇല്ലെന്ന് അദ്ദേഹം വ്യക്തമാക്കി.

മുഖ്യമന്ത്രി സ്ഥാനാർത്ഥിത്വത്തെക്കുറിച്ചുള്ള ഊഹാപോഹങ്ങൾ അടിസ്ഥാനരഹിതമാണെന്ന് സമൂഹമാധ്യമങ്ങളിൽ പങ്കുവെച്ച കുറിപ്പിൽ റാവത്ത് വ്യക്തമാക്കി. പാർട്ടിയിൽ ഈ പദവിക്ക് അർഹരായ ഒട്ടനവധി നേതാക്കളുണ്ടെന്നും, 2027-ൽ ബിജെപി സർക്കാരിനെ പുറത്താക്കി കോൺഗ്രസ് ഭരണം തിരിച്ചുപിടിക്കുകയാണ് തങ്ങളുടെ ഏക ലക്ഷ്യമെന്നും അദ്ദേഹം കൂട്ടിച്ചേർത്തു. തന്റെ രാഷ്ട്രീയ യാത്രയെക്കുറിച്ച് ഓർമിപ്പിച്ച അദ്ദേഹം, ബൂത്ത് തല പ്രവർത്തകനിൽ നിന്ന് കേന്ദ്രമന്ത്രിയും മുഖ്യമന്ത്രിയുമായി ഉയരാൻ അവസരം നൽകിയത് കോൺഗ്രസ്പാർട്ടിയാണെന്നും, തനിക്ക് ഇനി പ്രത്യേക പദവികളിൽ മോഹമില്ലെന്നും കൂട്ടിച്ചേർത്തു.

കോൺഗ്രസ് സർക്കാരിന്റെ കാലത്തെ നേട്ടങ്ങളും തന്റെ ഭരണകാലത്തെ വികസന പ്രവർത്തനങ്ങളും ജനങ്ങളെ ഓർമ്മിപ്പിക്കുന്നതിനൊപ്പം ബിജെപി സർക്കാരിന്റെ പരാജയങ്ങൾ ജനങ്ങളുടെ മുന്നിൽ തുറന്നുകാട്ടാൻ താൻ നിരന്തരം ശ്രമിക്കാറുണ്ടെന്നും ഹരീഷ് റാവത്ത് വ്യക്തമാക്കി. ഉത്തരാഖണ്ഡിന്റെ മകളായ അങ്കിത ഭണ്ഡാരിക്ക് നീതി ലഭ്യമാക്കുകയെന്നതാണ് തന്റെ പ്രധാന ലക്ഷ്യമെന്നും, കൊലപാതകവുമായി ബന്ധപ്പെട്ട 'വിഐപി'യെ നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു. കോൺഗ്രസിന്റെ പ്രധാന രാഷ്ട്രീയ മുൻഗണനകളിൽ ഒന്നായാണ് ഈ വിഷയത്തെ അദ്ദേഹം കാണുന്നത്.

ഇതിനുപുറമേ, സ്കൂൾ കുട്ടികൾക്കുള്ള ഉച്ചഭക്ഷണ പദ്ധതിയിലും ഗർഭിണികൾക്കുള്ള ഭക്ഷ്യധാന്യ വിതരണത്തിലും കോടികളുടെ അഴിമതി നടന്നെന്ന് ഹരീഷ് റാവത്ത് ആരോപിച്ചു. അർഹരായവരുടെ അവകാശങ്ങൾ കവർന്നെടുത്ത് കോടിക്കണക്കിന് രൂപയാണ് ചിലർ തട്ടിയെടുത്തതെന്നും, 210 കോടിയുടെ അഴിമതി ഇതിനോടകം പുറത്തുവന്നിട്ടുണ്ടെന്നും അദ്ദേഹം കുറ്റപ്പെടുത്തി. ഈ തുക ഉപയോഗിച്ച് ആഡംബര ഫാം ഹൗസുകളും ബംഗ്ലാവുകളും നിർമ്മിച്ചവരെ നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു.