അമ്മയുടെ ബാഗിൽ നിന്ന് തോക്കെടുത്ത് കളിക്കുന്നതിനിടെ നാലു വയസ്സുകാരൻ വെടിയേറ്റ് മരിച്ചു; മാതാവ് അറസ്റ്റിൽ

SEPTEMBER 27, 2026, 11:13 PM

ഫ്‌ളോറിഡ: ഫ്‌ളോറിഡയിൽ അമ്മയുടെ ഹാൻഡ്ബാഗിൽ സൂക്ഷിച്ചിരുന്ന തോക്കെടുത്ത് കളിക്കുന്നതിനിടെ നാലു വയസ്സുകാരൻ അബദ്ധത്തിൽ വെടിയേറ്റ് മരിച്ചു. കുട്ടിയുടെ അമ്മയായ 29 കാരി ഡയമണ്ട് ഫിലിപ്‌സിനെ പോലീസ് അറസ്റ്റ് ചെയ്തു.

സെപ്തംബർ 23ന് 10,000 ഡോളർ ജാമ്യത്തിൽ പുറത്തിറങ്ങിയ ഇവരുടെ അടുത്ത കോടതി വിചാരണ നവംബർ 6ന് നടക്കും.

അടുക്കളയിലെ സ്റ്റൂളിൽ കയറി കൗണ്ടറിൽ വെച്ചിരുന്ന അമ്മയുടെ ബാഗിൽ നിന്ന് കുട്ടി .380 കാലിബർ സ്മിത്ത് & വെസ്സൺ പിസ്റ്റൾ എടുത്ത് അബദ്ധത്തിൽ കുട്ടിക്ക് മുഖത്തേക്ക് വെടിയേൽക്കുകയായിരുന്നു.

പ്രായപൂർത്തിയാകാത്ത കുട്ടികൾക്ക് എളുപ്പത്തിൽ എടുക്കാൻ കഴിയുന്ന രീതിയിൽ തോക്ക് സുരക്ഷിതമല്ലാതെ സൂക്ഷിച്ചതിന് ഡയമണ്ട് ഫിലിപ്‌സിനെതിരെ കുറ്റകരമായ അശ്രദ്ധയ്ക്ക് പോലീസ് കേസെടുത്തു.

പോലീസ് അന്വേഷണത്തിൽ, തോക്ക് ഹോൾസ്റ്റർ ഇല്ലാതെയും സുരക്ഷിതമാക്കാതെയുമാണ് ബാഗിനുള്ളിൽ വെച്ചിരുന്നതെന്ന് കണ്ടെത്തി. കുട്ടികളുടെ സുരക്ഷയ്ക്കായി തോക്കുകൾ എപ്പോഴും സുരക്ഷിതമായി ലോക്ക് ചെയ്ത് സൂക്ഷിക്കേണ്ടതിന്റെ പ്രാധാന്യമാണ് ഈ സംഭവം ഓർമ്മിപ്പിക്കുന്നത്.

പി.പി. ചെറിയാൻ