വത്തിക്കാൻ മാധ്യമവിഭാഗത്തിന്റെ തലപ്പത്ത് ചരിത്രത്തിലാദ്യമായി വനിത; മോൺസെ അൽവരാഡോ ചുമതലയേറ്റു

NOVEMBER 8, 2026, 9:52 PM

വത്തിക്കാൻ സിറ്റി: കത്തോലിക്കാ സഭയുടെ ചരിത്രത്തിൽ പുതിയൊരു അധ്യായം കുറിച്ചുകൊണ്ട്, വത്തിക്കാന്റെ വാർത്താവിനിമയ വിഭാഗമായ ഡിക്കാസ്റ്ററി ഫോർ കമ്മ്യൂണിക്കേഷന്റെ പ്രിഫെക്ടായി മെക്‌സിക്കൻ-അമേരിക്കൻ മാധ്യമപ്രവർത്തക മരിയ മോൺസെറാത്ത് (മോൺസെ) അൽവരാഡോ ചുമതലയേറ്റു. ലെയോ പതിനാലാമൻ മാർപാപ്പ നടത്തിയ നിയമനം 2026 നവംബർ 1 മുതൽ പ്രാബല്യത്തിൽ വന്നു. ഈ പദവിയിലെത്തുന്ന ആദ്യ വനിതയും ആദ്യ അൽമായ വനിതയും ഇറ്റലിക്കാരിയല്ലാത്ത ആദ്യ വ്യക്തിയുമാണ് അവർ.

1986ൽ മെക്‌സിക്കോ സിറ്റിയിൽ ജനിച്ച അൽവരാഡോ ബാല്യത്തിൽ അമേരിക്കയിലേക്ക് കുടിയേറി. ഫ്‌ളോറിഡ ഇന്റർനാഷണൽ യൂണിവേഴ്‌സിറ്റിയിൽ നിന്ന് ബിരുദവും ജോർജ് വാഷിംഗ്ടൺ യൂണിവേഴ്‌സിറ്റിയിൽ നിന്ന് ബിരുദാനന്തര ബിരുദവും നേടി. മതസ്വാതന്ത്ര്യ സംരക്ഷണത്തിനായി പ്രവർത്തിക്കുന്ന അമേരിക്കയിലെ പ്രമുഖ നിയമസംഘടനയായ ബെക്കറ്റ് ഫണ്ട് ഫോർ റിലീജിയസ് ലിബർട്ടിയിൽ ഒരു ദശാബ്ദത്തിലേറെ വിവിധ നേതൃത്വസ്ഥാനങ്ങളിൽ സേവനമനുഷ്ഠിച്ചു.

2021ൽ ആഗോള കത്തോലിക്കാ മാധ്യമശൃംഖലയായ EWTN-ൽ ചേർന്ന അവർ വാർത്താ അവതാരകയായും EWTN News In Depth പരിപാടിയുടെ അവതാരകയായും ശ്രദ്ധ നേടി. 2023ൽ EWTN Newsന്റെ പ്രസിഡന്റും ചീഫ് ഓപ്പറേറ്റിംഗ് ഓഫീസറുമായി നിയമിതയായി. അന്താരാഷ്ട്ര ടെലിവിഷൻ, അച്ചടി, ഡിജിറ്റൽ മാധ്യമ പ്രവർത്തനങ്ങൾക്ക് നേതൃത്വം നൽകിയ വിപുലമായ പരിചയവും അവർക്കുണ്ട്.

വത്തിക്കാൻ ന്യൂസ്, വത്തിക്കാൻ റേഡിയോ, ദിനപത്രമായ L'Osservatore Romano, ഹോളി സീ പ്രസ് ഓഫീസ്, പ്രസിദ്ധീകരണഅച്ചടി വിഭാഗങ്ങൾ തുടങ്ങിയവയുടെ പ്രവർത്തനങ്ങൾ ഏകോപിപ്പിക്കുന്ന സുപ്രധാന ഉത്തരവാദിത്വമാണ് പുതിയ പ്രിഫെക്ടിനുള്ളത്. വിവിധ ഭാഷകളിലൂടെയും ആധുനിക ഡിജിറ്റൽ മാധ്യമങ്ങളിലൂടെയും സഭയുടെ സന്ദേശം ലോകമെമ്പാടുമുള്ള ജനങ്ങളിലേക്ക് എത്തിക്കുക എന്നതാണ് ഈ വിഭാഗത്തിന്റെ പ്രധാന ദൗത്യം.

സഭയുടെ വാർത്താവിനിമയ സംവിധാനങ്ങളെ കൂടുതൽ സജീവവും ജനകീയവും ആധുനികവുമാക്കണമെന്ന ലെയോ പതിനാലാമൻ മാർപാപ്പയുടെ കാഴ്ചപ്പാടിന്റെ ഭാഗമായാണ് ഈ നിയമനം വിലയിരുത്തപ്പെടുന്നത്. അൽവരാഡോയുടെ സർഗാത്മകതയും മാധ്യമരംഗത്തെ അനുഭവസമ്പത്തും പ്രവർത്തനമികവും മാർപാപ്പ പ്രത്യേകം പ്രശംസിച്ചിട്ടുണ്ട്.

മുൻ പ്രിഫെക്ട് പൗലോ റുഫീനിയുടെ പിൻഗാമിയായാണ് അൽവരാഡോ ചുമതലയേറ്റത്. സഭയുടെ ഭരണനേതൃത്വത്തിൽ വനിതകൾക്കും അൽമായ വിശ്വാസികൾക്കും കൂടുതൽ ഉത്തരവാദിത്വങ്ങൾ ലഭിക്കുന്നതിന്റെ ശ്രദ്ധേയമായ ഉദാഹരണമാണ് ഈ നിയമനം.

ആധുനിക മാധ്യമലോകത്തിന്റെ സാധ്യതകൾ പ്രയോജനപ്പെടുത്തി സുവിശേഷസന്ദേശം കൂടുതൽ ഫലപ്രദമായി ലോകജനതയിലേക്ക് എത്തിക്കുക എന്ന മഹത്തായ ദൗത്യമാണ് പുതിയ നേതൃത്വത്തിനു മുന്നിലുള്ളത്. ആഗോള കത്തോലിക്കാ സഭയുടെ മാധ്യമചരിത്രത്തിൽ ഈ നിയമനം ഒരു പുതിയ നാഴികക്കല്ലായി മാറുകയാണ്.

2026 ജൂൺ 2നാണ് ലെയോ പതിനാലാമൻ മാർപാപ്പ മോൺസെ അൽവരാഡോയെ വത്തിക്കാന്റെ വാർത്താവിനിമയ വിഭാഗത്തിന്റെ പ്രിഫെക്ടായി നിയമിച്ചുകൊണ്ടുള്ള ഔദ്യോഗിക പ്രഖ്യാപനം നടത്തിയത്. തുടർന്ന്, 2026 നവംബർ 1ന് മുൻ പ്രിഫെക്ട് പൗലോ റുഫീനിയുടെ പിൻഗാമിയായി അവർ ഔദ്യോഗികമായി ചുമതലയേറ്റു.

ഡോ. ജോർജ് എം. കാക്കനാട്ട്