തിരുവല്ല: അമേരിക്കൻ മലയാളികളുടെ ഏറ്റവും വലിയ ഫെഡറേഷനായ ഫോമായുടെ പുതിയ ഭരണ സമിതി പ്രഖ്യാപിച്ച 'ഫോമാ 20-20 ഹൗസിങ് പ്രോജക്ടി'ന്റെ ആദ്യ വീടിന് തിരുവല്ല എം.എൽ.എ അഡ്വ. വർഗീസ് മാമൻ തറക്കല്ലിട്ടു. ഫോമാ 2028ൽ ഇരുപതാം വാർഷികം ആഘോഷിക്കുമ്പോൾ കേരളത്തിലെ അർഹരായ നിർധന കുടുംബങ്ങൾക്ക് 20 വീടുകൾ നിർമിച്ചുനൽകുക എന്ന ലക്ഷ്യത്തോടെയാണ് പദ്ധതിക്ക് തുടക്കമിട്ടിരിക്കുന്നത്.

പത്തനംതിട്ട ജില്ലയിലെ മല്ലപ്പള്ളി താലൂക്കിൽ കല്ലൂപ്പാറ പഞ്ചായത്തിലെ ചെങ്ങരൂരിലുള്ള ചൂരക്കുട്ടിക്കൽ കുടുംബത്തിനുവേണ്ടിയാണ് പദ്ധതിയുടെ ആദ്യ വീട് നിർമിക്കുന്നത്. ഭവനരഹിതരായ കുടുംബങ്ങൾക്ക് സുരക്ഷിതമായൊരു വീടൊരുക്കുക എന്നത് കേവലം ഒരു നിർമാണപ്രവർത്തനമല്ല, മറിച്ച് അവരുടെ ജീവിതത്തിൽ പ്രതീക്ഷയുടെയും ആത്മവിശ്വാസത്തിന്റെയും പുതിയ അധ്യായം തുറക്കലാണെന്ന സന്ദേശമാണ് ഈ പദ്ധതിയിലൂടെ ഫോമാ മുന്നോട്ടുവയ്ക്കുന്നത്.

തറക്കല്ലിടൽ ചടങ്ങിൽ സംസാരിച്ച അഡ്വ. വർഗീസ് മാമൻ എം.എൽ.എ, അർഹരായ കുടുംബങ്ങൾക്ക് കൈത്താങ്ങാകുന്ന ഫോമയുടെ ഭവനപദ്ധതിക്ക് ആശംസകൾ നേർന്നു.

വിദേശത്ത് താമസിക്കുമ്പോഴും കേരളത്തിന്റെ സാമൂഹികവും മാനുഷികവുമായ ആവശ്യങ്ങൾ തിരിച്ചറിഞ്ഞ് സഹായഹസ്തം നീട്ടുന്ന അമേരിക്കൻ മലയാളികളുടെ പ്രവർത്തനങ്ങൾ മാതൃകാപരമാണ്.

നിർധന കുടുംബങ്ങൾക്ക് സ്വന്തമായി ഒരു വീട് എന്ന സ്വപ്നം സാക്ഷാത്കരിക്കാൻ ഇത്തരം പദ്ധതികൾ സഹായകമാകുമെന്നും അദ്ദേഹം പ്രത്യാശ പ്രകടിപ്പിച്ചു. ചടങ്ങിൽ മല്ലപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്റ് എബി മേക്കരങ്ങാട്ട്, കല്ലൂപ്പാറ പഞ്ചായത്ത് മൂന്നാം വാർഡ് മെമ്പർ അനിൽ തോമസ്, പഞ്ചായത്ത് വികസനകാര്യ സ്റ്റാൻഡിങ് കമ്മിറ്റി ചെയർമാൻ റെജി ചാക്കോ, രണ്ടാം വാർഡ് മെമ്പർ റ്റിബി സൂസൻ മാമൻ തുടങ്ങിയവർ സംസാരിച്ചു.

ഫോമയുടെ 2026-2028 കാലയളവിലേക്കുള്ള എക്‌സിക്യൂട്ടീവ് കമ്മിറ്റി പ്രഖ്യാപിച്ച പ്രധാന പദ്ധതികളിലൊന്നാണ് 'ഫോമാ 20-20 ഹൗസിങ് പ്രോജക്ട്'. 2028ൽ സംഘടനയുടെ ഇരുപതാം വാർഷികം പൂർത്തിയാകുമ്പോഴേക്കും കേരളത്തിലെ അർഹരായ 20 കുടുംബങ്ങൾക്ക് വീടുകൾ നിർമിച്ചുനൽകുകയാണ് ലക്ഷ്യം. ഷിക്കാഗോയിൽ നടന്ന സ്ഥാനാരോഹണ സമ്മേളനത്തിൽ ഫോമാ പ്രസിഡന്റ് ബിജു തോണിക്കടവിൽ പദ്ധതിയുടെ ലക്ഷ്യവും പ്രാധാന്യവും വ്യക്തമാക്കിയിരുന്നു.

ഫോമാ കേരളത്തിന്റെ സാമൂഹികവും മാനുഷികവുമായ ആവശ്യങ്ങളിൽ സജീവമായി ഇടപെടുന്ന സംഘടന കൂടിയാണ്. സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് സഹായം നൽകുക, ചികിത്സാവിദ്യാഭ്യാസ ആവശ്യങ്ങളിൽ കൈത്താങ്ങാകുക, ഭവനരഹിതർക്ക് വീടുകൾ ഒരുക്കുക, സ്ത്രീശാക്തീകരണത്തിനും സാമൂഹിക സുരക്ഷയ്ക്കും പിന്തുണ നൽകുക തുടങ്ങിയ മേഖലകളിൽ സംഘടന വിവിധ ജീവകാരുണ്യ പ്രവർത്തനങ്ങൾ നടത്തിവരുന്നു.

ഇവയുടെ തുടർച്ചയായാണ് 'ഫോമാ 20-20 ഹൗസിങ് പ്രോജക്ട്'. സംഘടനയുടെ 20-ാം വാർഷികാഘോഷത്തെ സാമൂഹിക പ്രതിബദ്ധതയുടെയും സേവനത്തിന്റെയും അടയാളമാക്കി മാറ്റുകയാണ് ഇതിലൂടെ ലക്ഷ്യമിടുന്നത്.

ഫോമാ പ്രസിഡന്റ് ബിജു തോണിക്കടവിൽ, ജനറൽ സെക്രട്ടറി പോൾ പി. ജോസ്, ട്രഷറർ പ്രദീപ് നായർ, വൈസ് പ്രസിഡന്റ് സാമുവൽ മാത്യു, ജോയിന്റ് സെക്രട്ടറി ഡോ. മഞ്ജു പിള്ള, ജോയിന്റ് ട്രഷറർ ജോൺസൺ കണ്ണൂക്കാടൻ എന്നിവർ ചൂരക്കുട്ടിക്കൽ കുടുംബത്തിന് ആശംസകൾ അറിയിച്ചു.

കുടുംബത്തിന്റെ പുതിയ ഭവനമെന്ന സ്വപ്നം യാഥാർഥ്യമാകുന്നതിൽ സന്തോഷം പങ്കുവച്ച നേതാക്കൾ, അർഹരായ കൂടുതൽ കുടുംബങ്ങളിലേക്ക് സഹായമെത്തിക്കുന്നതിനുള്ള പ്രവർത്തനങ്ങൾക്ക് പിന്തുണയും ഭാവുകങ്ങളും നേർന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്