അധികാരമൊഴിയുന്നതിന് മുൻപ് ക്യൂബയിൽ സൈനിക നടപടിക്ക് സാധ്യതയെന്ന് ഡോണൾഡ് ട്രംപ്

NOVEMBER 13, 2026, 6:20 AM

വാഷിംഗ്ടൺ: 2029ൽ വൈറ്റ് ഹൗസിൽ നിന്ന് പടിയിറങ്ങുന്നതിന് മുൻപായി ക്യൂബയിൽ സൈനിക ഇടപെടൽ നടത്തുന്ന കാര്യം പരിഗണിക്കുന്നുണ്ടെന്ന് യുഎസ് പ്രസിഡന്റ് ഡോണൾഡ് ട്രംപ് വ്യക്തമാക്കി. വ്യാഴാഴ്ച പ്രമുഖ റേഡിയോ അവതാരകൻ ഹ്യൂ ഹെവിറ്റിന് നൽകിയ അഭിമുഖത്തിലാണ് ട്രംപ് ഇക്കാര്യം വെളിപ്പെടുത്തിയതെന്ന് റിപ്പോർട്ട് ചെയ്യുന്നു.

'സ്ഥാനമൊഴിയുന്നതിന് മുൻപ് ക്യൂബയുടെ കാര്യത്തിൽ ഒരു തീരുമാനമാകണം എന്നാണ് ട്രംപ് അഭിമുഖത്തിൽ പറഞ്ഞത്. ക്യൂബയിലെ കമ്മ്യൂണിസ്റ്റ് ഭരണകൂടത്തെ താഴെയിറക്കുന്നതിനെക്കുറിച്ച് ട്രംപ് മുൻപും സംസാരിച്ചിട്ടുണ്ടെങ്കിലും, സൈനിക നടപടിക്ക് ഒരു സമയപരിധി നിശ്ചയിക്കുന്നത് ഇതാദ്യമായാണ്.

ക്യൂബൻ വംശജരുടെ മകനായ സ്റ്റേറ്റ് സെക്രട്ടറി മാർക്കോ റൂബിയോ ഈ നീക്കത്തിൽ പ്രധാന പങ്കുവഹിക്കുമെന്ന് ട്രംപ് പറഞ്ഞു. അമേരിക്കയിലേക്ക് കുടിയേറിയ ക്യൂബൻ ജനതയ്ക്ക് വേണ്ടിയാണ് താൻ ഈ നടപടി ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.

വെനസ്വേലൻ പ്രസിഡന്റ് നിക്കോളാസ് മഡുറോയെ പുറത്താക്കിയ സൈനിക നീക്കത്തിന് പിന്നാലെ, ക്യൂബയ്ക്ക് മേൽ അമേരിക്ക എണ്ണ ഉപരോധം ഏർപ്പെടുത്തിയിരുന്നു.

ഇത് ക്യൂബയിലെ വൈദ്യുതി വിതരണം തകരാനും കടുത്ത മാനുഷിക പ്രതിസന്ധിക്കും കാരണമായിട്ടുണ്ട്. ഇറാൻ യുദ്ധവും വിലക്കയറ്റവും കാരണം ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടി നേരിട്ട കനത്ത തിരിച്ചടിക്ക് ഒരാഴ്ചയ്ക്ക് ശേഷമാണ് ട്രംപിന്റെ ഈ പുതിയ പ്രസ്താവന വരുന്നത്.

പി.പി. ചെറിയാൻ