പീൽ ഡിസ്ട്രിക്ട് സ്‌കൂൾ ബോർഡ് തിരഞ്ഞെടുപ്പിൽ വീണ്ടും ചരിത്രവിജയം; ഹാട്രിക് നേട്ടവുമായി മലയാളി വനിത സൂസൻ ബെഞ്ചമിൻ

NOVEMBER 11, 2026, 7:52 PM

ഒന്റാരിയോ പ്രവിശ്യയിലുള്ള മിസിസാഗ നഗരത്തിൽ നടന്ന സ്‌കൂൾ തിരഞ്ഞെടുപ്പിൽ മലയാളി വനിത സൂസൻ ബെഞ്ചമിന് ഉജ്ജ്വല വിജയം. പീൽ ഡിസ്ട്രിക്ട് സ്‌കൂൾ ബോർഡിൽ വാർഡ് 5 ഇംഗ്ലീഷ് പബ്ലിക് ട്രസ്റ്റിയായാണ് സൂസൻ ബെഞ്ചമിൻ വീണ്ടും തിരഞ്ഞെടുക്കപ്പെട്ടിരിക്കുന്നത്. 2026 ഒക്ടോബർ 26ന് നടന്ന തിരഞ്ഞെടുപ്പിൽ 6,643 വോട്ടുകളുടെ വലിയ ഭൂരിപക്ഷത്തോടെയാണ് അവർ വിജയക്കൊടി പാറിച്ചത്.

ഇതോടെ വാർഡ് 5ൽ നിന്നുള്ള സ്‌കൂൾ ബോർഡ് ട്രസ്റ്റിയായി സൂസൻ ബെഞ്ചമിൻ തുടർച്ചയായ മൂന്നാം തവണയാണ് അധികാരത്തിലെത്തുന്നത്. 2018ൽ ഒന്റാരിയോയിലെ ഏതെങ്കിലുമൊരു സ്‌കൂൾ ബോർഡിൽ ട്രസ്റ്റിയായി തിരഞ്ഞെടുക്കപ്പെടുന്ന ആദ്യ മലയാളി വനിത എന്ന ചരിത്രനേട്ടം അവർ സ്വന്തമാക്കിയിരുന്നു. പിന്നീട് 2022ലും ഇപ്പോൾ 2026ലും വിജയം ആവർത്തിച്ചുകൊണ്ട് കാനഡയിലെ പൊതുരംഗത്ത് മലയാളികളുടെ അഭിമാനമായി മാറിയിരിക്കുകയാണ് സൂസൻ.

അധ്യാപന രംഗത്ത് ദീർഘകാലത്തെ സമ്പന്നമായ പ്രവർത്തന പാരമ്പര്യമുള്ള വ്യക്തിയാണ് സൂസൻ ബെഞ്ചമിൻ. കാനഡയിലേക്ക് കുടിയേറുന്നതിന് മുൻപ് മുംബൈയിലെ പ്രശസ്തമായ എസ്.ഐ.ഇ.എസ് കോളേജിൽ 25 വർഷത്തോളം അവർ അധ്യാപികയായി സേവനമനുഷ്ഠിച്ചിരുന്നു. തുടർന്ന് കാനഡയിലെത്തിയ ശേഷം പീൽ ഡിസ്ട്രിക്ട് സ്‌കൂൾ ബോർഡിൽ തന്നെ 16 വർഷം സ്‌പെഷ്യൽ എഡ്യൂക്കേഷൻ അധ്യാപികയായി പ്രവർത്തിച്ച ശേഷമാണ് വിരമിച്ചത്.

കഴിഞ്ഞ എട്ട് വർഷമായി പീൽ ഡിസ്ട്രിക്ട് സ്‌കൂൾ ബോർഡിലെ വിവിധ പ്രധാന സമിതികളുടെ അധ്യക്ഷയായി സൂസൻ ബെഞ്ചമിൻ മികച്ച പ്രവർത്തനമാണ് കാഴ്ചവെക്കുന്നത്. എല്ലാ വിഭാഗം വിദ്യാർത്ഥികൾക്കും തുല്യവും സമഗ്രവുമായ വിദ്യാഭ്യാസം ഉറപ്പാക്കുന്നതിനായി നിരവധി പദ്ധതികൾക്ക് അവർ നേതൃത്വം നൽകി. കൂടാതെ തന്റെ പരിധിയിലുള്ള സ്‌കൂളുകളിൽ പുതിയ മൾട്ടിപർപ്പസ് സ്‌പോർട്‌സ് കോംപ്ലക്‌സ് നിർമ്മിക്കുന്നതിലും സൂസൻ നിർണ്ണായക പങ്കുവഹിച്ചു.

വിദ്യാഭ്യാസ രംഗത്തിന് പുറമെ സാമൂഹിക സന്നദ്ധ പ്രവർത്തനങ്ങളിലും സൂസൻ ബെഞ്ചമിൻ സജീവമാണ്. പിന്നാക്ക പ്രദേശങ്ങളിലെ ജനങ്ങളുടെ ഉന്നമനത്തിനായി പ്രവർത്തിക്കുന്ന വിവിധ സംഘടനകളിൽ അവർ മുൻനിരയിലുണ്ട്. സ്ത്രീകൾ, യുവാക്കൾ എന്നിവരുടെ ശാക്തീകരണത്തിനും മാനസികാരോഗ്യ സംരക്ഷണത്തിനും വേണ്ടി പ്രവർത്തിക്കുന്ന കൂട്ടായ്മകളിലും അവർ സജീവമായി ഇടപെടുന്നു.

ടൊറന്റോയിലെ സെന്റ് ഗ്രിഗോറിയോസ് ഓർത്തഡോക്‌സ് പള്ളിയിലെ സജീവ അംഗം കൂടിയാണ് സൂസൻ ബെഞ്ചമിൻ. മുൻപ് സൺഡേ സ്‌കൂൾ ഹെഡ്മിസ്ട്രസായും അവർ പ്രവർത്തിച്ചിട്ടുണ്ട്. മലങ്കര ഓർത്തഡോക്‌സ് സഭയുടെ ചരിത്രത്തിൽ ഇടവക മാനേജിംഗ് കമ്മിറ്റി സെക്രട്ടറിയായി തിരഞ്ഞെടുക്കപ്പെടുന്ന ആദ്യ വനിത എന്ന ബഹുമതിയും സൂസൻ ബെഞ്ചമിന് സ്വന്തമാണ്.