ഗാസയിലെ റഫയിലെ അഭയാര്‍ത്ഥി ക്യാമ്പില്‍ ഇസ്രായേല്‍ നടത്തിയ വ്യോമാക്രമണത്തില്‍ കുട്ടികളടക്കം 45 പേര്‍ കൊല്ലപ്പെട്ടിരിക്കുന്നു. റാഫയിലെ പ്രവര്‍ത്തനം നിര്‍ത്തിവയ്ക്കാന്‍ അന്താരാഷ്ട്ര നീതിന്യായ കോടതി ഇസ്രായേലിനോട് ഉത്തരവിട്ടതിന് തൊട്ടുപിന്നാലെയായിരുന്നു ആക്രമണം. സംഭവം അന്താരാഷ്ട്രതലത്തില്‍ വിമര്‍ശനങ്ങള്‍ക്ക് ഇടയാക്കിയിട്ടുണ്ട്.

ഞായറാഴ്ച വൈകിയാണ് ഇസ്രായേല്‍ റാഫയ്ക്ക് നേരെ ആക്രമണം ആരംഭിച്ചത്. യുദ്ധക്കെടുതിയില്‍ ഗാസയിലെ അവസാന അഭയ കേന്ദ്രമായി കണക്കാക്കപ്പെട്ടിരുന്ന റാഫയില്‍ ആണ് ഇസ്രായേല്‍ സൈന്യം ആക്രമണ പരമ്പര നടത്തിയത്. ഇവിടെ എല്ലാ സൈനിക പ്രവര്‍ത്തനങ്ങളും നിര്‍ത്തിവയ്ക്കാന്‍ യുഎന്‍ ഉന്നത കോടതി കഴിഞ്ഞയാഴ്ചയാണ് ഉത്തരവിട്ടത്. എന്നാല്‍ ഇസ്രായേല്‍ ഈ നിലപാട് തള്ളിയിരുന്നു. അതേസമയം റാഫക്ക് ഐക്യദാര്‍ഢ്യം പ്രഖ്യാപിച്ച് കൊണ്ട് എല്ലാ കണ്ണുകളും റഫയില്‍ എന്ന ക്യാംപെയ്ന്‍ സോഷ്യല്‍ മീഡിയയില്‍ ശക്തമാകുകയാണ്. നിരവധി സെലിബ്രിറ്റികള്‍ #AllEyesOnRafah എന്ന ഹാഷ്ടാഗ് ഉപയോഗിച്ച് പിന്തുണാ സന്ദേശങ്ങള്‍ പങ്കിട്ടിട്ടുണ്ട്.

ഈ മാസം ആദ്യം ഗാസക്ക് സമീപം ഇസ്രായേല്‍ സൈനിക ആക്രമണം ശക്തമാക്കുകയും അതിര്‍ത്തിയുടെ നിയന്ത്രണം പിടിച്ചെടുക്കുകയും ചെയ്യുകയായിരുന്നു. അതിനുമുമ്പ് റാഫ മാനുഷിക സഹായത്തിനുള്ള ഒരു പ്രധാന പ്രവേശന കേന്ദ്രമായിരുന്നു. എന്നാല്‍ റാഫയിലെ പോരാട്ടം ഒരു ദശലക്ഷത്തിലധികം പാലസ്തീനികള്‍ പലായനം ചെയ്യാന്‍ ഇടയാക്കി. അവരില്‍ ഭൂരിഭാഗവും ഇതിനകം ഇസ്രായേലും ഹമാസും തമ്മിലുള്ള യുദ്ധത്തില്‍ പലായനം ചെയ്തു. തങ്ങള്‍ പോകുന്നിടത്തെല്ലാം ഇസ്രായേല്‍ ആക്രമണത്തിന് ഇരയാകുന്നുണ്ടെന്നും കഴിഞ്ഞ കുറച്ച് മാസങ്ങളായി ഗാസ മുനമ്പില്‍ മുകളിലേക്കും താഴേക്കും നീങ്ങുകയാണെന്നും പാലസ്തീനികള്‍ പറയുന്നു.

മധ്യ ഗാസയിലും തെക്കന്‍ നഗരമായ ഖാന്‍ യൂനിസിലും ഓപ്പറേഷന്‍ നടത്തുന്നതിന് മുമ്പ് വടക്ക് ഭാഗത്തുള്ളവരോട് പലായനം ചെയ്യാന്‍ ഇസ്രായേല്‍ സൈന്യം പറഞ്ഞപ്പോള്‍ ലക്ഷക്കണക്കിന് ആളുകള്‍ തെക്ക് റാഫയിലേക്ക് പലായനം ചെയ്തിരുന്നു. റാഫയിലെ ആരോഗ്യ കേന്ദ്രങ്ങളിലും പരിസരങ്ങളിലും ഇസ്രായേല്‍ ഷെല്ലാക്രമണം കാരണം നിലവില്‍ ഒരെണ്ണം മാത്രമേ ഇപ്പോഴും പ്രവര്‍ത്തനക്ഷമമാക്കിയിട്ടുള്ളൂ എന്ന് ഹമാസിന്റെ നിയന്ത്രണത്തിലുള്ള ഗാസയിലെ ആരോഗ്യ മന്ത്രാലയം പ്രസ്താവനയില്‍ പറഞ്ഞു.

അതേസമയം ആഗോള എതിര്‍പ്പുകള്‍ മറികടന്ന് റാഫ ആക്രമണവുമായി മുന്നോട്ട് പോകുമെന്ന് ഇസ്രായേല്‍ പറഞ്ഞു. ഇസ്രായേലി ടാങ്കുകള്‍ ഇപ്പോള്‍ മധ്യത്തിലും തെക്കുപടിഞ്ഞാറന്‍ റാഫയിലും ഉണ്ടെന്ന് ഗാസ സുരക്ഷാ ഉദ്യോഗസ്ഥര്‍ പറഞ്ഞു. അതിനിടെ റാഫ നഗരത്തിലെ മാരകമായ ആക്രമണത്തിന് ശേഷം ശക്തമായ നിലപാട് സ്വീകരിക്കാന്‍ യു.എസ് നിര്‍ബന്ധിതമാകുകയാണ്. ഒക്ടോബര്‍ ഏഴിന് തെക്കന്‍ ഇസ്രായേലില്‍ ഹമാസിന്റെ ആക്രമണത്തിന് ശേഷമാണ് ഗാസയില്‍ യുദ്ധം ആരംഭിച്ചത്. ഇസ്രായേലിന്റെ തിരിച്ചടിയില്‍ ഗാസയില്‍ 36,096 പേര്‍ കൊല്ലപ്പെട്ടിരുന്നു.

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1