രാജ്യത്തെ യുവജന പ്രതിഷേധങ്ങളുടെ പശ്ചാത്തലത്തില്‍ സോഷ്യല്‍ മീഡിയയില്‍ ഇപ്പോള്‍ ഏറ്റവും കൂടുതല്‍ ചര്‍ച്ച ചെയ്യപ്പെടുന്ന വാക്കാണ് 'കോക്രോച്ച്' അല്ലെങ്കില്‍ പാറ്റ. അധികാരികളുടെ അവഗണനകള്‍ക്കെതിരെ 'കോക്രോച്ച് ജനതാ പാര്‍ട്ടി' എന്ന പേരില്‍ ഡിജിറ്റല്‍ പ്രതിഷേധവുമായി ലക്ഷക്കണക്കിന് യുവാക്കളാണ് ഇന്‍സ്റ്റാഗ്രാമില്‍ അണിനിരന്നിരിക്കുന്നത്.

എന്നാല്‍ ഈ രാഷ്ട്രീയ പശ്ചാത്തലത്തിനപ്പുറം, സ്റ്റാര്‍ട്ടപ്പ്-ബിസിനസ് ലോകത്ത് ഏറെ നാളായി ചര്‍ച്ച ചെയ്യപ്പെടുന്ന, നിലവില്‍ വന്‍ ട്രെന്‍ഡിംഗായി മാറിയ ഒരു ആശയമുണ്ട്'കോക്രോച്ച് സ്റ്റാര്‍ട്ടപ്പുകള്‍'. എന്താണ് ഈ പാറ്റാ സിദ്ധാന്തം? എങ്ങനെ കെട്ടിപ്പടുക്കാം ഇത്തരം ഒരു ബിസിനസ്?

എന്താണ് കോക്രോച്ച് സ്റ്റാര്‍ട്ടപ്പ്?

ഏത് കടുത്ത പ്രതിസന്ധിയിലും, ആണവാക്രമണത്തെപ്പോലും അതിജീവിച്ച് നിലനില്‍ക്കാന്‍ ശേഷിയുള്ള ജീവിയാണ് പാറ്റ. ഇതേ സ്വഭാവം ബിസിനസില്‍ പകര്‍ത്തി, വിപണിയിലെ തകര്‍ച്ചയോ സാമ്പത്തിക മാന്ദ്യമോ ഉണ്ടായാല്‍ പോലും തളരാതെ അതിജീവിക്കാന്‍ തക്കവണ്ണം കെട്ടിപ്പടുക്കുന്ന സ്റ്റാര്‍ട്ടപ്പുകളെയാണ് 'കോക്രോച്ച് സ്റ്റാര്‍ട്ടപ്പുകള്‍' എന്ന് വിളിക്കുന്നത്. കോടികളുടെ വിദേശ നിക്ഷേപത്തെയോ വലിയ മനുഷ്യ വിഭവശേഷിയെയോ മാത്രം ആശ്രയിക്കാതെ, സ്വന്തം കാലില്‍ നില്‍ക്കാന്‍ ശേഷിയുള്ള സുസ്ഥിരമായ ബിസിനസ് മോഡലുകളാണ് ഇവരുടേത്.

എങ്ങനെ ഒരു കോക്രോച്ച് സ്റ്റാര്‍ട്ടപ്പ് കെട്ടിപ്പടുക്കാം?

വ്യവസായ വിദഗ്ദ്ധരുടെ അഭിപ്രായത്തില്‍, ധൂര്‍ത്തുകളില്ലാത്ത മിതവ്യയവും സാഹചര്യങ്ങള്‍ക്കനുസരിച്ച് മാറാനുള്ള വേഗതയുമാണ് ഇത്തരം സ്റ്റാര്‍ട്ടപ്പുകളുടെ കരുത്ത്. ഇത് കെട്ടിപ്പടുക്കാന്‍ ശ്രദ്ധിക്കേണ്ട പ്രധാന കാര്യങ്ങള്‍:

യഥാര്‍ത്ഥ ലക്ഷ്യങ്ങളില്‍ മാത്രം ശ്രദ്ധിക്കുക: അനാവശ്യമായ വിപണി ആകര്‍ഷണങ്ങള്‍ക്ക് പിന്നാലെ പോകാതെ, ബിസിനസിന്റെ കാതലായ ലക്ഷ്യങ്ങളില്‍ മാത്രം ഇവര്‍ ശ്രദ്ധ കേന്ദ്രീകരിക്കുന്നു.

യാഥാര്‍ത്ഥ്യ ബോധം: ഉല്‍പന്നത്തിന്റെ പോരായ്മകളെക്കുറിച്ചോ വിപണിയിലെ തിരിച്ചടികളെക്കുറിച്ചോ ഫണ്ടിംഗ് കുറവിനെക്കുറിച്ചോ സ്ഥാപകര്‍ സ്വയം കബളിപ്പിക്കാറില്ല. യാഥാര്‍ത്ഥ്യങ്ങള്‍ മനസിലാക്കി മുന്‍കൂട്ടി പ്രതിരോധ നടപടികള്‍ സ്വീകരിക്കുന്നു.

സുസ്ഥിരമായ വരുമാനം: തുടക്കം മുതല്‍ തന്നെ കൃത്യമായ വരുമാനം ഉണ്ടാക്കുന്നതിലാണ് ഇവരുടെ ശ്രദ്ധ.

കോക്രോച്ച് മോഡലിന്റെ ഗുണങ്ങള്‍

വന്‍കിട നിക്ഷേപങ്ങള്‍ വാരിയെറിഞ്ഞ് പെട്ടെന്ന് വളരുന്ന 'യൂണികോണ്‍' കമ്പനികളേക്കാള്‍ ഈ പ്രതിസന്ധി ഘട്ടത്തില്‍ കോക്രോച്ച് കമ്പനികള്‍ക്ക് ചില സവിശേഷ ഗുണങ്ങളുണ്ട്. പ്രതിസന്ധികളെ അതിജീവിക്കാനുള്ള ശേഷിയാണ് അതില്‍ പ്രധാനം. കുറഞ്ഞ വിഭവങ്ങള്‍ കൊണ്ട് പ്രവര്‍ത്തിച്ച് ശീലിച്ചതിനാല്‍ സാമ്പത്തിക മാന്ദ്യങ്ങളെയും അപ്രതീക്ഷിത വിപണി ആഘാതങ്ങളെയും നേരിടാന്‍ ഇവര്‍ക്ക് പ്രത്യേക ശേഷിയുണ്ട്. അനാവശ്യമായ ഓഫീസ് അലങ്കാരങ്ങളോ ആഡംബരങ്ങളോ ഇവര്‍ ഒഴിവാക്കുന്നു. സ്വന്തം വരവ് അറിഞ്ഞുമാത്രം ചിലവഴിക്കുന്നതിനാല്‍ കൂടുതല്‍ കാലം വിപണിയില്‍ പിടിച്ചുനില്‍ക്കാന്‍ സാധിക്കും.

വളരെ വേഗത്തിലുള്ളതും അപകടം പിടിച്ചതുമായ വളര്‍ച്ചയ്ക്ക് പകരം, ഇവര്‍ പതുക്കെയുള്ളതും എന്നാല്‍ സുസ്ഥിരവുമായ വളര്‍ച്ചയാണ് ലക്ഷ്യമിടുന്നത്. ഇത് സ്ഥാപകരുടെ മാനസികാരോഗ്യത്തെയും ബിസിനസ് സ്റ്റെബിലിറ്റിയെയും സഹായിക്കും. തുടക്കത്തില്‍ കുറഞ്ഞ ചിലവില്‍ ബിസിനസ് ചെയ്യുന്നതിനാല്‍, വിപണിയില്‍ പുതിയ ഐഡിയകള്‍ പരീക്ഷിച്ച് പരാജയപ്പെട്ടാല്‍ പോലും വലിയ പരിക്കുകളില്ലാതെ മുന്നോട്ട് പോകാന്‍ ഇവര്‍ക്ക് സാധിക്കും.

യൂണികോണ്‍ കമ്പനികള്‍ പലപ്പോഴും 1 രൂപ വരുമാനം ഉണ്ടാക്കാന്‍ 10 രൂപ വരെ ചിലവഴിക്കാറുണ്ട്. കോക്രോച്ച് സ്റ്റാര്‍ട്ടപ്പുകള്‍ ഇത്തരം അനാവശ്യ റിസ്‌കുകള്‍ പൂര്‍ണ്ണമായും ഒഴിവാക്കുന്നു. ഉപഭോക്താക്കള്‍ നല്‍കുന്ന പണത്തിന് കൃത്യമായ മൂല്യം തിരികെ നല്‍കിയാല്‍ മാത്രമേ ലോങ്ങ് ടേം നിലനില്‍പ്പ് ഉണ്ടാവുകയുള്ളൂ എന്ന് ഇവര്‍ വിശ്വസിക്കുന്നു.

ഏതൊരു ബിസിനസ് മോഡലിനെയും പോലെ കോക്രോച്ച് സ്റ്റാര്‍ട്ടപ്പുകള്‍ക്കും ചില പരിമിതികളുണ്ട്. മന്ദഗതിയിലുള്ള വളര്‍ച്ച വന്‍തോതില്‍ പണം ഒഴുക്കുന്ന വന്‍കിട കമ്പനികളുമായി മത്സരിക്കുമ്പോള്‍ ഇവരുടെ വളര്‍ച്ചാ നിരക്ക് പതുക്കെയായിരിക്കും. വിഭവങ്ങളുടെ കുറവ് ഫണ്ടിംഗ് കുറവായതിനാല്‍ ബിസിനസ് വിപുലീകരണത്തിനും മാര്‍ക്കറ്റിംഗിനും മികച്ച പ്രതിഭകളെ നിയമിക്കുന്നതിനും പരിമിതികളുണ്ടാകും. കൂടിയ ജോലിഭാരം ചെറിയ ടീമും വലിയ ജോലിഭാരവും കാരണം ജീവനക്കാരും സ്ഥാപകരും കടുത്ത മാനസിക സമ്മര്‍ദ്ദത്തിലാകാന്‍ സാധ്യതയുണ്ട്.

വലിയ തകര്‍ച്ചകളെ താങ്ങാനുള്ള ശേഷിക്കുറവ് തുടര്‍ച്ചയായ നിയമപ്രശ്‌നങ്ങളോ അപ്രതീക്ഷിത വിപണി മാറ്റങ്ങളോ ഉണ്ടായാല്‍, വലിയ സാമ്പത്തിക ബാക്ക്-അപ്പ് ഇല്ലാത്തതിനാല്‍ കരകയറാന്‍ ഏറെ സമയമെടുക്കും.

കോക്രോച്ച് ജനതാ പാര്‍ട്ടിയിലൂടെ' ഇന്ത്യന്‍ യുവാക്കള്‍ ഡിജിറ്റല്‍ ലോകത്ത് പ്രതിഷേധത്തിന്റെ പുതിയ വഴി തേടുമ്പോള്‍, ബിസിനസ് ലോകത്ത് പ്രതിസന്ധികളെ അതിജീവിച്ച് വിജയം കൊയ്യാന്‍ യുവ സംരംഭകര്‍ക്ക് വഴികാട്ടിയാവുകയാണ് ഈ 'കോക്രോച്ച് സ്റ്റാര്‍ട്ടപ്പ്' ആശയങ്ങള്‍. വന്‍കിട ഫണ്ടിംഗുകളുടെ ആഡംബരങ്ങളേക്കാള്‍ സ്വന്തം കാലില്‍ നില്‍ക്കുന്നതാണ് ബിസിനസിന്റെ യഥാര്‍ത്ഥ വിജയമെന്ന് ഈ 'പാറ്റാ സിദ്ധാന്തം' നമ്മെ ഓര്‍മ്മിപ്പിക്കുന്നു.

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1