മുഖ്യമന്ത്രി വി.ഡി. സതീശന്റെ പത്രസമ്മേളനം കണ്ടപ്പോൾ ഒരു ചോദ്യം ഉയർന്നു: മന്ത്രിസഭായോഗത്തിലെ തീരുമാനങ്ങൾ ജനങ്ങളോട് വിശദീകരിക്കാനുള്ള വേദി എപ്പോഴാണ് മാധ്യമവിചാരണയുടെ അരങ്ങായി മാറിയത്?

സർക്കാരിനോട് കഠിനമായ ചോദ്യങ്ങൾ ചോദിക്കേണ്ടത് മാധ്യമങ്ങളുടെ കടമയാണ്. മറുപടിയിൽ വ്യക്തതയില്ലെങ്കിൽ വീണ്ടും ചോദിക്കണം. വൈരുധ്യമുണ്ടെങ്കിൽ ചൂണ്ടിക്കാട്ടണം. എന്നാൽ മുഖ്യമന്ത്രി പറയുന്നത് കേൾക്കാൻ പോലും അവസരം നൽകാതെ ഇടപെടലുകളും ബഹളവും തുടരുമ്പോൾ ജനങ്ങൾക്ക് ലഭിക്കേണ്ട വിവരം വഴിയിൽ നഷ്ടപ്പെടുന്നു. പത്രസമ്മേളനങ്ങളിലെ ഈ അലങ്കോലം ഒഴിവാക്കണം.

ഓരോ മുഖ്യമന്ത്രിക്കും ഓരോ ശൈലിയുണ്ട്. കെ. കരുണാകരൻ ചോദ്യങ്ങളെ നേരിട്ട രീതിയിലാവണമെന്നില്ല വി.ഡി. സതീശൻ പ്രതികരിക്കുന്നത്. മാധ്യമങ്ങൾ ആഗ്രഹിക്കുന്ന വാക്കുകൾ തന്നെ മുഖ്യമന്ത്രിയുടെ വായിൽനിന്ന് വരണമെന്ന് നിർബന്ധിക്കാനുമാവില്ല. അദ്ദേഹം പറയുന്നത് പൂർണമായി കേൾക്കുക; അതിനുശേഷം ആവശ്യമെങ്കിൽ കൂടുതൽ മൂർച്ചയോടെ ചോദിക്കുക. അതാണ് ജനങ്ങളോടുള്ള ഉത്തരവാദിത്തം.

സെക്രട്ടേറിയറ്റിലെ പത്രസമ്മേളനങ്ങളിൽ കരുണാകരനോട് മാധ്യമപ്രവർത്തകർ നിശിതമായ ചോദ്യങ്ങൾ ചോദിച്ചിട്ടുണ്ട്. വാക്കേറ്റം ഉണ്ടാകുമെന്നു ചുറ്റുമുള്ളവർ കരുതിയ നിമിഷങ്ങളിൽ പോലും ഒരു കണ്ണിറുക്കലിലൂടെ അന്തരീക്ഷത്തിലെ പിരിമുറുക്കം കുറയ്ക്കുന്ന അദ്ദേഹത്തിന്റെ രീതി മറക്കാനാവില്ല. അന്നും ചോദ്യങ്ങൾ കടുപ്പമുള്ളവയായിരുന്നു. എന്നാൽ ചോദ്യത്തിനും മറുപടിക്കും ഇടം നൽകുന്ന ഒരു ക്രമമുണ്ടായിരുന്നു.

കാലം മാറി. മാധ്യമപ്രവർത്തനത്തിന്റെ ശൈലിയും മാറണം. പത്രസമ്മേളനം തത്സമയം കാണുന്ന ജനങ്ങൾക്ക് ആരാണ് ചോദിച്ചതെന്നും എന്താണ് മറുപടി ലഭിച്ചതെന്നും ഇന്ന് നേരിട്ട് അറിയാം. അതിനാൽ ബഹളത്തിലൂടെ വാർത്തയുടെ അജണ്ട നിശ്ചയിക്കാമെന്ന ധാരണ വിലപ്പോവില്ല. ഈ മാറ്റം തിരിച്ചറിയാത്ത മാധ്യമങ്ങൾ ജനങ്ങളുടെ മുന്നിൽ അപഹാസ്യരാകും.

പ്രവാസലോകത്തും ഇത്തരം വാർത്താസമീപനം നിരാശയുണ്ടാക്കുന്നുണ്ട്. പ്രവാസികൾ നേരിടുന്ന പ്രശ്‌നങ്ങളെക്കാൾ, വിദേശത്തെത്തുന്ന ഒരു മന്ത്രിയുടെ സ്വകാര്യ സന്ദർശനം പോലും വിവാദമാക്കുന്നതിലാണ് ചിലരുടെ ശ്രദ്ധ. പൊതുതാൽപര്യമുള്ള ചോദ്യങ്ങൾ തീർച്ചയായും ചോദിക്കണം. എന്നാൽ പ്രവാസികളുടെ ചടങ്ങുകളിലും കൂടിക്കാഴ്ചകളിലും പങ്കെടുക്കുന്നതിനെ മാത്രം സംശയത്തോടെ കാണുന്നതെന്തിനെന്ന് ആത്മപരിശോധന നടത്തണം. പ്രവാസികൾ കേരളത്തിന്റെ ഭാഗമാണ്. അവരുടെ ജീവിതവും പ്രശ്‌നങ്ങളും വാർത്തകളിൽ ഇടം അർഹിക്കുന്നു.

മുഖ്യമന്ത്രിക്കും ഇതിൽ ഉത്തരവാദിത്തമുണ്ട്. മന്ത്രിസഭായോഗത്തിനു ശേഷമുള്ള പത്രസമ്മേളനത്തിന് അടുക്കും ചിട്ടയും ഉറപ്പാക്കണം. പ്രകോപനത്തിൽ വീഴാതെ ചോദ്യങ്ങൾക്ക് വ്യക്തമായി മറുപടി പറയണം. മാധ്യമങ്ങൾ ചോദ്യാവകാശം വിനിയോഗിക്കട്ടെ; മുഖ്യമന്ത്രി മറുപടി പറയട്ടെ. രണ്ടും കേട്ട് തീരുമാനിക്കാൻ ജനങ്ങളെ അനുവദിക്കണം.

ജെയിംസ് കൂടൽ

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1