ബോളിവുഡില്‍ വിലക്ക് ഏര്‍പ്പെടുത്തി, ദ്രോഹിച്ചു; പ്രിയങ്ക ഇന്ത്യ വിടാൻ കാരണം ഇദ്ദേഹം !

MARCH 28, 2023, 7:26 PM

ബോളിവുഡ് ഉപേക്ഷിച്ച്‌ ഹോളിവുഡിലേക്ക് ചേക്കേറിയതിനെ കുറിച്ച്‌ നടി പ്രിയങ്ക ചോപ്ര പറഞ്ഞ വാക്കുകള്‍ ചര്‍ച്ചയായിരുന്നു.

ബോളിവുഡില്‍ ഒരു മൂലയിലേക്ക് തള്ളപ്പെട്ടുവെന്നും അവിടുത്തെ പൊളിറ്റിക്‌സ് കണ്ട് മടുത്തുവെന്നുമാണ് പ്രിയങ്ക വെളിപ്പെടുത്തിയത്. പ്രിയങ്കയുടെ വാക്കുകളെ പിന്തുണച്ചു കൊണ്ട് നടി കങ്കണ റണാവത്ത് രംഗത്തെത്തി.

കരണ്‍ ജോഹര്‍ വിലക്ക് ഏര്‍പ്പെടുത്തിയതാണ് പ്രിയങ്ക ഇന്ത്യ വിടാന്‍ കാരണമായത് എന്നാണ് കങ്കണ പറയുന്നത്. 'പ്രിയങ്ക ചോപ്രയ്ക്ക് പറയാനുള്ളത് ആളുകള്‍ അവര്‍ക്കെതിരെ തിരിഞ്ഞു, ഭീഷണിപ്പെടുത്തി അവരെ സിനിമകളില്‍ നിന്നും പുറത്താക്കി'.

'ബോളിവുഡില്‍ സ്വയം ഉയര്‍ന്നു വന്ന ഒരു സ്ത്രീയെ ഇന്ത്യ വിടാന്‍ തന്നെ ബോളിവുഡ് നിര്‍ബന്ധിതയാക്കി. കരണ്‍ ജോഹര്‍ അവര്‍ക്ക് വിലക്ക് ഏര്‍പ്പെടുത്തിയത് എല്ലാവര്‍ക്കും അറിയാം. ഷാരൂഖും മൂവി മാഫിയയുമായുള്ള സൗഹൃദത്തെ തുടര്‍ന്ന് കരണ്‍ ജോഹറുമായി അവര്‍ തെറ്റിപ്പിരിഞ്ഞതിനെ കുറിച്ച്‌ മീഡിയ ഒരുപാട് എഴുതിയിട്ടുണ്ട്.'

'പലരും അവരെ ശല്യപ്പെടുത്തിയതിനെ തുടര്‍ന്ന് അവര്‍ക്ക് ഇന്ത്യ വിട്ട് പോകേണ്ടി വന്നു. കരണ്‍ ജോഹറിന്റെ സംഘവും പിആര്‍ മാഫിയയും ചേര്‍ന്നാണ് അവരെ ഇന്ത്യ വിടാന്‍ നിര്‍ബന്ധിതയാക്കിയത്' കങ്കണ ട്വിറ്ററില്‍ കുറിച്ചു.