സിപിഎമ്മിലെ ചിരിക്കുന്ന മുഖമാണ് സഖാവ് കോടിയേരി ബാലകൃഷ്ണന്. കണ്ണൂരിലെ കല്ലറ തലായി എല് പി സ്കൂള് അദ്ധ്യാപകന് കോടിയേരി മൊട്ടുമ്മല് കുഞ്ഞുണ്ണിക്കുറുപ്പിന്റേയും നാരായണിയമ്മയുടേയും മകന് കോടിയേരി ബാലകൃഷ്ണന്റെ രാഷ്ട്രീയ ജീവിതം തുടങ്ങിയത് സ്കൂള് പഠനകാലത്താണ്.
പതിനെട്ടാം വയസ്സില് സിപിഐഎം ഈങ്ങയില്പ്പീടിക ബ്രാഞ്ച് സെക്രട്ടറി. ഇരുപതാം വയസ്സില് എസ്എഫ്ഐയുടെ സംസ്ഥാന സെക്രട്ടറിയാകുമ്പോഴേക്കും കോടിയേരി ലോക്കല് സെക്രട്ടറി. പക്ഷേ, ഒട്ടും ആയാസരഹിതമായിരുന്നില്ല ആ ബാല്യവും കൗമാരവും.
സ്കൂള് അധ്യാപകനായിരുന്ന അച്ഛന് കുഞ്ഞുണ്ണിക്കൂറുപ്പ് ബാലകൃഷ്ണന്റെ ചെറുപ്പത്തില് തന്നെ മരിച്ചു. പിന്നെ അമ്മ നാരായണി ഒറ്റയ്ക്കാണ് നാല് പെണ്കുട്ടികളേയും ബാലകൃഷ്ണനെയും വളര്ത്തിയത്. പശുവളര്ത്തിയുള്ള വരുമാനം മാത്രമായിരുന്നു കുടുംബത്തിന്. സ്കൂള്കാലത്ത് പാല്വീടുകളില് കൊടുത്ത ശേഷമാണ് ബാലകൃഷ്ണന് ക്ലാസിലേക്കു പോയിരുന്നത്.
എസ്എഫ്ഐയുടെ മുൻഗാമിയായ കെഎസ്എഫിന്റെ യൂണിറ്റ് ആരംഭിച്ച ആദ്യ സെക്രട്ടറിയായിരുന്നു അദ്ദേഹം. പുതുച്ചേരി സർക്കാർ മയ്യഴിയിൽ പ്രീഡിഗ്രി മാത്രമുള്ള ജൂനിയർ കോളേജ് ആരംഭിച്ചപ്പോൾ ആദ്യ ബാച്ചിൽ പ്രവേശനം. അവിടെ ആദ്യത്തെ കോളേജ് യൂണിയൻ ചെയർമാൻ. ആ രാഷ്ട്രീയ പ്രവർത്തനത്തിന്റെ തുടർച്ചയായിരുന്നു തിരുവനന്തപുരത്തേക്കുള്ള സ്ഥലം മാറ്റം.
ഇരുപതാം വയസ്സില് എസ്എഫ്ഐയുടെ സംസ്ഥാന സെക്രട്ടറി ചുമതലയ്ക്കൊപ്പം തിരുവനന്തപുരം യൂണിവേഴ്സിറ്റി കോളജിലെ പഠനം. പിന്നെയുള്ള രാഷ്ട്രീയ ജീവിതത്തില് കണ്ണൂര് ജില്ലാ സെക്രട്ടറി ആയ ആറുവര്ഷം ഒഴികെ ഏറെക്കാലവും തിരുവനന്തപുരമായിരുന്നു കോടിയേരി ബാലകൃഷ്ണന്റെ പ്രവര്ത്തന മണ്ഡലം.
സൗമ്യതയുടെയും അനുരഞ്ജനത്തിന്റെയും രീതികള് അവലംബിക്കുമ്പോഴും നിലപാടുകള് പറയുന്നതില് അയവില്ലാത്ത സമീപനമായിരുന്നു പാര്ട്ടി പൊളിറ്റ് ബ്യുറോ അംഗം കൂടിയായിരുന്ന കോടിയേരിയുടേത്. ഗവര്ണര് ആരിഫ് മുഹമ്മദ് ഖാനുമായുള്ള ഏറ്റുമുട്ടല് വ്യക്തികള് തമ്മിലുള്ളതല്ലെന്നും മോദി സര്ക്കാരിന്റെ ചട്ടുകമായ ഗവര്ണറും മതനിരപേക്ഷതയില് ഉറച്ചുനില്ക്കുന്ന എല്ഡിഎഫ് സര്ക്കാരും തമ്മിലുളള ഭിന്നതയാണ് കാതലായ വസ്തുത എന്നുമുള്ള ദേശാഭിമാനിയിലെ അവസാന ലേഖനം ഇതിന്റെ ഉദാഹരണമാണ്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്