ഷാരൂഖ് ഖാന്റെ 'ഡങ്കി'യും പ്രഭാസിന്റെ പാൻ-ഇന്ത്യൻ ചിത്രമായ 'സാലറും' ഈ ക്രിസ്മസിന് തിയേറ്ററുകളിൽ ഏറ്റുമുട്ടാൻ ഒരുങ്ങുകയാണ്. നേരത്തെ സെപ്തംബർ 28ന് റിലീസ് ചെയ്യാനിരുന്ന ചിത്രം ചില സാങ്കേതിക കാരണങ്ങളാൽ മാറ്റിവെക്കുകയായിരുന്നു. 

രണ്ട് ചിത്രങ്ങളും ഡിസംബർ 22ന് തിയറ്ററുകളിലെത്തുമെന്നാണ് റിപ്പോർട്ടുകൾ. ഡങ്കി ക്രിസ്മസിന് റിലീസ് ചെയ്യുമെന്ന് ഷാരൂഖ് ഖാൻ നേരത്തെ വ്യക്തമാക്കിയിരുന്നു.റിലീസ് വാർത്ത സ്ഥിരീകരിച്ചുകൊണ്ട് ട്രേഡ് അനലിസ്റ്റ് തരൺ ആദർശ് സോഷ്യൽ മീഡിയയിൽ വിവരം പങ്കുവെച്ചു.

"അതെ, സത്യമാണ്... ഈ ക്രിസ്‌മസിന് SRK Vs പ്രഭാസ്, ഡങ്കി Vs സലാർ... #സലാർ ഈ ക്രിസ്‌മസിന് (22 ഡിസംബർ 2023ന്) എത്തുമെന്ന് പ്രദർശകർ മെയിൽ വഴി അറിയിച്ചിട്ടുണ്ട്.... നിർമ്മാതാക്കളായ #ഹോംബാലെ ഫിലിംസിന്റെ ഔദ്യോഗിക പ്രഖ്യാപനം വെള്ളിയാഴ്ച നടക്കും( 29 സെപ്തംബർ 2023)"

റിലീസ് വൈകിയതിന് നിരവധി പ്രതികരണങ്ങൾ വന്നിട്ടുണ്ട്. ചിത്രം ഈ വർഷം റിലീസ് ചെയ്തേക്കില്ല എന്ന റിപ്പോർട്ടുകൾ പോലും ഉണ്ടായിരുന്നു. വിഎഫ്എക്‌സ് ജോലികൾ കാരണം ചിത്രത്തിന്റെ സെപ്റ്റംബറിലെ റിലീസ് മാറ്റിവച്ചു. ഏറെ പ്രതീക്ഷയോടെ കാത്തിരിക്കുന്ന പ്രഭാസ് ചിത്രമാണ് സലാർ, സംവിധായകൻ  പ്രശാന്ത് നീൽ ആണ്. കെജിഎഫ് പോലെ തന്നെ ബ്രഹ്മാണ്ഡ ചിത്രം നിർമ്മിച്ച നീൽ  പ്രശാന്ത് പ്രഭാസിനൊപ്പം ഒന്നിച്ച ചിത്രം ഏറെ പ്രതീക്ഷയോടെയാണ് റിലീസിന് ഒരുങ്ങുന്നത്. രണ്ട് ഭാഗങ്ങളുള്ള ചിത്രത്തിന്റെ ആദ്യഭാഗമായ 'സലാർ ഒന്നാം ഭാഗം; 'സീസ് ഫയർ' എന്നാണ് ഇതിന് പേരിട്ടിരിക്കുന്നത്. പൃഥ്വിരാജും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.

ആദിപുരുഷ് ആണ് ഇതിനു മുൻപിറങ്ങിയ പ്രഭാസ് ചിത്രം. കെജിഎഫും കാന്താരയുമുൾപ്പടെ നിർമ്മിച്ച ഹോംബാലെ ഫിലിംസ് ആണ് പാൻ ഇന്ത്യൻ തലത്തിലൊരുങ്ങുന്ന ബിഗ് ബജറ്റ് ചിത്രത്തിന്റെ നിർമ്മാണം.പികെ, ത്രീ ഇഡിയറ്റ്സ്, മുന്നാഭായി എംബിബിഎസ് തുടങ്ങിയ ഹിറ്റ് ചിത്രങ്ങളൊരുക്കിയ ബോളിവുഡിലെ എക്കാലത്തെയും മികച്ച സംവിധായകൻ രാജ്‌കുമാർ ഹിറാനിയും ഷാരൂഖാനും ഒന്നിക്കുന്ന ആദ്യ ചിത്രമാണ് ഡങ്കി. തപ്‌സി പന്നുവാണ് നായിക. വിക്കി കൗശലും ചിത്രത്തിൽ ഒരു മുഖ്യ വേഷം ചെയ്യുന്നുണ്ട്.

രാജ്‌കുമാർ ഹിറാനിയുടെ സംവിധാനത്തിൽ ഷാരൂഖ് ഖാൻ അഭിനയിക്കുന്നു എന്ന സവിശേഷത ഉള്ളതിനാൽ വലിയ പ്രതീക്ഷയിലാണ് ഷാരൂഖ് ഖാൻ ആരാധകർ. ഷാരൂഖ് ഖാന്റെ ഏറ്റവും പുതിയ റിലീസായ 'ജവാൻ' ബോക്‌സ് ഓഫീസിൽ റെക്കോർഡ് നേട്ടം കൊയ്യുകയാണ്, പഠാനു പുറകെ 1000 കോടി എന്ന നേട്ടം കൈവരിച്ചാണ് ജവാന്റെ മുന്നേറ്റം. തുടർച്ചയായി രണ്ടു ചിത്രങ്ങൾ ആയിരം കോടി ക്ലബിലെത്തുന്ന ഏക താരമെന്ന നേട്ടവും ഷാരൂഖ് സ്വന്തമാക്കിയിരുന്നു.

ഷാരൂഖ് ഖാനെ സംബന്ധിച്ചിടത്തോളം ഈ ഏറ്റുമുട്ടൽ നിർണായകമാണ്. കാരണം ഇതിന് മുമ്പ് പ്രശാന്ത് നീൽ സംവിധാനം ചെയ്ത കെജിഎഫുമായി ഏറ്റുമുട്ടിയ ഷാരൂഖ് ഖാന്റെ സീറോ എന്ന ചിത്രം വൻ പരാജയമായിരുന്നു. 2018ൽ പുറത്തിറങ്ങിയ കെജിഎഫ് വിവിധ റെക്കോർഡുകൾ തകർത്ത് മികച്ച വിജയം നേടി. അതുകൊണ്ട് തന്നെ തങ്ങളുടെ സിനിമകൾ ഏറ്റുമുട്ടുമ്പോൾ ആരു വിജയിക്കുമെന്ന ആകാംക്ഷയിലാണ് പ്രേക്ഷകർ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്